এযোৰা নহয়, দুযোৰা নহয়, ৫১ যোৰা দৰা কইনা

Rashmi April 19, 2025

ডিজিটেল ডেস্ক : শতাধিক আয়তীৰ মংগল উৰুলি আৰু বিয়া নামেৰে মুখৰিত হ'ল উলুতলী ৰাজহুৱা প্ৰেক্ষাগৃহ। এযোৰা নহয়, দুযোৰা নহয়, ৫১ যোৰা দৰা কইনা ৷ উত্তৰ-পূৰ্বাঞ্চল লোক কল্যাণ সমিতি, জন কল্যাণ সংস্থান জয়পুৰ ( ৰাজস্থান) আৰু গোলাঘাট ধৰ্ম জাগৰণ সমন্বয়ৰ উদ্যোগত, উলুতলী সমূহ গাঁওবাসীৰ লগতে The green Village NGOৰ সহযোগত উলুতলী ৰাজহুৱা শিৱ মন্দিৰৰ প্ৰাংগণত অনুষ্ঠিত হয় সামূহিক বিবাহ সংস্কাৰ। 

আপুনি, মই, আমি সৰ্বসাধাৰণতে দেখা বিবাহসমূহতকৈ ব্যতিক্ৰম দেখা গ'ল এই সমূহীয়া বিবাহ অনুষ্ঠানটি। দুই শতাধিক লোকেৰে লোকাৰণ্য হৈ পৰে এই অনুষ্ঠান। কিয়নো এই অনুষ্ঠানটিত হিন্দু ধৰ্মৰ কেইবাটাও জাতি -জনগোষ্ঠীৰ সমাহাৰে অনুষ্ঠিত হয় বিবাহ অনুষ্ঠানৰ প্ৰথমটি কাৰ্যসূচী জোৰোণ। 

সেয়েহে সামাজিকভাৱে পলমকৈ হ'লেও বিবাহ সম্পন্নৰ বাবে অৰ্ধ শতাধিক দম্পতীৰ অনুষ্ঠানত ভাগ লৈ সামাজিক ৰীতি-নীতি-পৰম্পৰাৰে জোৰোণ কাৰ্যসূচী সম্পন্ন হয়। জাউৰিয়ে জাউৰিয়ে বিয়ানামৰ ধ্বনিৰে মুখৰিত হৈ পৰে সেই অঞ্চলৰ আকাশ-বতাহ। 

জোৰোণ কাৰ্যসূচী শেষ হোৱাৰ পাছত জ্যেষ্ঠজনৰ আশীৰ্বাদ গ্ৰহণ কৰে দৰা-কইনাই। সমূহীয়াকৈ জ্যেষ্ঠজনৰ তথা ভকত-বৈষ্ণৱৰ সেৱা আগবঢ়ায় দৰা-কইনালৈ। বিয়াখনৰ জোৰোণত প্ৰয়োজনীয় যাৱতীয় সকলো সামগ্ৰী দৰা-কইনালৈ উভয়ে প্ৰদান কৰে এই অনুষ্ঠানত। আয়োজক সমিতিয়ে জানিবলৈ দিয়া অনুসৰি, সমাজত যিসকল ব্যক্তিয়ে আৰ্থিক অনাটনৰ বাবে সময়ত নিজৰ বিবাহখন সামাজিকভাৱে অনুষ্ঠিত কৰিব নোৱাৰিলে সেয়েহে এতিয়া সেইসকল লোকে নিজে সমাজক সাক্ষী কৰি সামাজিকভাৱে আগবাঢ়ি নিজেই বিয়াখন সম্পন্ন কৰাৰ উদ্দেশ্যেৰে এই পদক্ষেপ গ্ৰহণ কৰে।

উৎস: প্ৰাগ নিউজ ডিজিটেল

Share This