উমা চেত্রীক সম্বর্ধনা, ৫১ লাখ টকাৰ চে'ক, এ চি এৰ বিশেষ অনুষ্ঠান

dainik janambhumi November 10, 2025

ডিজিটেল ডেস্ক : অসম ক্রিকেট সন্থাই সদ্য সমাপ্ত আই চি চি মহিলা ক্রিকেট বিশ্ব কাপৰ বিজয়ী ভাৰতীয় দলৰ সদস্য উমা চেত্ৰীক তেওঁৰ অসাধাৰণ কৃতিত্বৰ স্বীকৃতি স্বৰূপে দেওবাৰে আন্তৰিকভাৱে ওলগ আৰু সম্বর্ধনা জনায়। তেওঁৰ এই কৃতিত্বক সন্মান জনাই এ চি এই বিশ্ব কাপ বিজয়ী ভাৰতীয় দলৰ অংশ হোৱা উত্তৰ-পূবৰ প্ৰথমগৰাকী মহিলা ক্রিকেটাৰলৈ ৫১ লাখ টকাৰ নগদ পুৰস্কাৰ ঘোষণা কৰে। এ চি এ ষ্টেডিয়াম চৌহদস্থিত ৯১ য়ার্ডছ ক্লাবৰ প্ৰেক্ষাগৃহত হোৱা সম্বর্ধনা অনুষ্ঠানত মুখ্য অতিথি হিচাপে উপস্থিত থাকে বি চি চি আইৰ সচিব দেৱজিৎ শইকীয়া। লগতে এ চি এৰ সভাপতি তৰংগ গগৈ, উপ-সভাপতি ৰমেন দত্ত, যুটীয়া সম্পাদক ৰাজেন্দ্ৰ সিং, কোষাধ্যক্ষ অনুপম ডেকা, এ চি এ এপেক্স কাউন্সিলৰ সদস্য মুকুতা নন্দ ভট্টাচার্য উপস্থিত থাকে। এই উপলক্ষে সন্থাৰ কেইবাটাও জিলা গোটকে ধৰি আন খেলৰ ক্ৰীড়া সন্থাইও উমাক সম্বর্ধনা জনায়। 

দেৱজিত শইকীয়াই উমাৰ এই প্ৰেৰণাদায়ক যাত্ৰাক প্রশংসা কৰি কয়, 'উমাৰ এই সাফল্যই কেৱল অসমক গৌৰৱান্বিত কৰাই নহয়, উত্তৰ-পূবৰ মহিলা ক্ৰিকেটৰ বাবেও এক নতুন অধ্যায় মুকলি কৰিছে। স্থানীয় খেলপথাৰৰ পৰা বিশ্ব মঞ্চলৈ তেওঁৰ যাত্রা হ'ল দৃঢ়তা, অনুশাসন, আৰু সপোন বাস্তৱায়িত হোৱাৰ জীয়া কাহিনী। সমগ্র দেশতে মহিলা ক্রিকেটক শক্তিশালী কৰাৰ বাবে বি চি চি আই প্রতিশ্রুতিবদ্ধ।' উমাক এনেদৰে সন্মান জনোৱাৰ বাবে তেওঁ লগতে অসম ক্রিকেট সন্থাকো প্রশংসা কৰে। এ চি এৰ সভাপতি তৰংগ গগৈয়ে কয়, 'উমাৰ সফলতাক লৈ আমি অসীম গৌৰৱ অনুভৱ কৰিছোঁ। অসমৰ পৰা বিশ্ব কাপ জয় কৰা প্ৰথমগৰাকী মহিলা ক্রিকেটাৰ হিচাপে তেওঁ ইতিহাস ৰচনা কৰিছে। খেলৰ প্ৰতি তেওঁৰ নিষ্ঠা আৰু আৱেগে আমাৰ অঞ্চলত যি সম্ভাৱনা আছে তাকে প্রতিফলিত কৰিছে। ৰাজ্য আৰু জাতিলৈ অধিক গৌৰৱ কঢ়িয়াই অনাৰ বাবে এনে প্রতিভাৱান খেলুৱৈক লালন-পালন কৰাৰ লগতে উৎসাহ যোগোৱাত এ চি এ সদায়েই ব্রতী হৈ থাকিব।' 

অসম ক্রিকেট সন্থাই উমা চেত্ৰীক আন্তৰিক অভিনন্দন জ্ঞাপন কৰাৰ লগতে ক্রিকেট যাত্ৰাত তেওঁৰ অবিৰত সফলতা কামনা কৰে। ইফালে আজিৰ কেবিনেটে বিশ্ব কাপ বিজয়ী ভাৰতীয় দলৰ সদস্য ক্রিকেটাৰ উমা চেত্রীক অভিনন্দন জনায় আৰু ২৫ লাখ টকা সাহায্য আগবঢ়োৱাৰ সিদ্ধান্তত অনুমোদন জনায়। ৰাজ্য চৰকাৰে লগতে ক্রিকেটাৰগৰাকীলৈ ১০ লাখ টকাৰ সাহায্য আগবঢ়াইছিল। আজি কেবিনেটে অনুমোদন জনোৱা আর্থিক সাহায্য ৰাজ্য চৰকাৰে গুৱাহাটীলৈ উমা চেত্ৰীক আমন্ত্রণ জনাই প্রদান কৰিব বা তেওঁৰ ঘৰলৈ চৰকাৰৰ প্ৰতিনিধিয়ে গৈ আগবঢ়াব।

Share This