ৰ-ক নিষিদ্ধৰ পৰামৰ্শ আমেৰিকাৰ ধৰ্মীয় আয়োগৰ 

dainik janambhumi March 27, 2025

ডিজিটেল ডেস্ক : আন্তঃৰাষ্ট্ৰীয় ধৰ্মীয় অধিকাৰ বিষয়ৰ আমেৰিকাৰ এক আয়োগে ভাৰতৰ বহিঃ চোৰাংচোৱা সংস্থা ৰিছাৰ্চ এণ্ড এনালাইছিছ উইঙ(ৰ)ৰ বিৰুদ্ধে নিষেধাজ্ঞা অৰোপ কৰাৰ পৰামৰ্শ আগবঢ়াইছে আমেৰিকা চৰকাৰক। শিখ বিচ্ছিন্নতাবাদীৰ বিৰুদ্ধে হত্যাৰ ষড়যন্ত্ৰত জড়িত থকাৰ বাবে ইউ এছ কমিছন অন ইণ্টাৰনেশ্যনেল ৰিলিজিয়াছ ফ্রীডমে (ইউ এছ চি আই আৰ এফ) এই অনুমোদন জনাইছে। 

শিখ বিচ্ছিন্নতাবাদী নেতা গুৰুপটৱন্ত সিং পান্নুৰ হত্যাৰ ষড়যন্ত্ৰৰ সৈতে ৰ জড়িত থকাৰ অভিযোগৰ সন্দৰ্ভতে আয়োগে এই পৰামৰ্শ আগবঢ়ায়। উল্লেখযোগ্য যে খালিস্তানী নেতা গুৰুপটৱন্ত সিং পান্নুৰ হত্যাৰ ষড়যন্ত্ৰত ৰ-ৰ প্ৰাক্তন এজেন্ট বিকাশ যাদৱক আমেৰিকাই অভিযুক্ত কৰিছিল ।আয়োগে মঙলবাৰে প্ৰকাশ কৰা বার্ষিক প্রতিবেদনত ভাৰতৰ সংখ্যালঘুসকলে নিকৃষ্ট ব্যৱহাৰৰ সন্মুখীন হোৱা বুলিও অভিযোগ কৰা হৈছে। আনহাতে ভাৰতক ধর্মীয় স্বাধীনতাৰ ক্ষেত্ৰত 'বিশেষ উদ্বেগৰ দেশ বুলি' আখ্যা দিবলৈও আমেৰিকা চৰকাৰক এই আয়োগে পৰামৰ্শ আগবঢ়ায়। 

আয়োগে প্রতিবেদনত কয়, 'ধর্মীয় সংখ্যালঘুৰ বিৰুদ্ধে আক্ৰমণ আৰু বৈষম্য বৃদ্ধি পাই থকাৰ বাবে ২০২৪ চনত ভাৰতত ধৰ্মীয় অধিকাৰৰ অৱস্থা শোচনীয় হৈ আছে।' ইয়াত অভিযোগ কৰা হৈছে যে প্রধানমন্ত্রী নৰেন্দ্ৰ মোদী আৰু ভাৰতীয় জনতা পার্টিয়ে (বিজেপি) যোৱা বছৰ লোক সভাৰ নিৰ্বাচনৰ সময়ত মুছলমান আৰু আন ধর্মীয় সংখ্যালঘুৰ বিৰুদ্ধে ঘৃণাপূর্ণ কথা আৰু অপতথ্যৰ প্ৰচাৰ কৰিছিল। ইফালে ইউ এছ চি আই আৰ এফৰ প্ৰতিবেদনক নাকচ কৰি আজি ভাৰতে প্রতিক্রিয়া প্রকাশ কৰি কয় যে ইউ এছ চি আই আৰ এফক 'উদ্বেগৰ প্রতিষ্ঠান' আখ্যা দিব লাগে। ভাৰতৰ বৈদেশিক মন্ত্ৰ্যালয়ৰ মুখপাত্ৰ ৰণধীৰ জয়সৱালে কয় যে ইউ এছ চি আই আৰ এফৰ শেহতীয়া প্ৰতিবেদনত ইয়াৰ 'পক্ষপাতমূলক আৰু ৰাজনৈতিকভাৱে প্ৰৰোচিত মূল্যায়ন'ৰ প্ৰণালী অব্যাহত আছে ।

Share This