ভাৰতীয় সামগ্ৰীত শুল্ক আৰোপৰ ফলত ক্ষতি বেছি হ'ব আমেৰিকাৰহে

dainik janambhumi August 01, 2025

ডিজিটেল ডেস্ক : আমেৰিকাৰ ৰাষ্ট্ৰপতি ড'নাল্ড ট্রাম্পে ভাৰতীয় সামগ্রীত ২৫% শুল্ক আৰোপ কৰিব বুলি কৰা ঘোষণাই ভাৰততকৈ তেওঁৰ নিজৰ দেশকহে অধিক ক্ষতি কৰিব। এখন প্রতিবেদনত প্রকাশ পোৱা মতে, ইয়াৰ ফল ভোগ কৰিব আমেৰিকাৰ প্ৰতিটো পৰিয়ালে। আমেৰিকাৰ য়েল বিশ্ববিদ্যালয়ে এখন প্রতিবেদনত উল্লেখ কৰা মতে, ভাৰতীয় সামগ্ৰীত আৰোপ কৰা ২৫% শুল্কই আমেৰিকাৰ প্ৰতিটো পৰিয়ালৰ আয় ২ লাখ টকা হ্রাস কৰিব। ইয়াৰ লগতে দেশখনত অর্থনৈতিক মন্দাৱস্থাৰ সৃষ্টি হ'ব পাৰে আৰু বৃহৎসংখ্যক লোকে চাকৰি হেৰুৱাব পাৰে। বিশ্ববিদ্যালয়খনে এই বুলি সতৰ্ক কৰি দিয়ে যে ভাৰত আৰু দক্ষিণ কোৰিয়াৰ দৰে সহযোগী দেশৰ বিৰুদ্ধে অধিক হাৰত শুল্ক আৰোপ কৰাৰ ফলত আমেৰিকাৰ নাগৰিকসকল বৃহৎ পৰিমাণৰ ক্ষতিৰ সন্মুখীন হ'ব। ইয়াৰ ফলত ঘৰুৱা ব্যয় বৃদ্ধি পাব আৰু অৰ্থনীতিত মন্দাৱস্থাৰ সৃষ্টি হ'ব। ইয়াত উল্লেখ কৰা অনুসৰি ট্রাম্পৰ শুল্ক বোমাই আমেৰিকাৰ প্ৰতিটো পৰিয়ালৰ আয় প্রায় ২,৪০০ ডলাৰ অৰ্থাৎ প্রায় ২ লাখ টকা হ্রাস কৰিব। ইয়াৰ লগতে দেশখনত নিত্য ব্যৱহাৰ্য সামগ্ৰীৰ দাম বৃদ্ধি হ'ব আৰু ফেডাৰেল ৰিজার্ভে মূল্য বৃদ্ধি প্রতিৰোধ কৰাত কোনো পদক্ষেপ গ্রহণ নকৰে। 

লগতে কোৱা হৈছে যে ট্রাম্পৰ শুল্ক বোমাৰ ফলত প্ৰতিটো উৎপাদিত সামগ্রীত শুল্কৰ হাৰ ১৮.৪% হৈ পৰিব আৰু এই হাৰ ১৯৩০ চনৰ পাছত সর্বাধিক হ'ব। ইয়াৰ লগতে জোতাৰ দৰে চামৰাৰ সামগ্ৰীৰ দাম ৪০%, বস্ত্ৰৰ দাম ৩৮% আৰু খাদ্য সামগ্ৰীৰ দাম ৭% বৃদ্ধি পাব। আনহাতে দেশৰ উন্নয়নতো ই প্রভাৱ পেলাব আৰু জি ডি পিৰ হাৰ ০.৫% হ্রাস পাব। বছৰৰ শেষৰ ফালে ৫ লাখ লোকে চাকৰি হেৰুৱাব বুলি কোৱা হৈছে। ইয়াৰ লগতে নিবনুৱাৰ হাৰ ০.৩% বৃদ্ধি পাব। 

আন এখন পৃথক প্রতিবেদনত জে পি মর্গানেও স্বীকাৰ কৰিছে যে ট্রাম্পৰ শুল্ক নীতিয়ে আমেৰিকাত মূল্য বৃদ্ধি কৰিছে আৰু ইয়াৰ ফলত উপভোক্তাৰ চাহিদা হ্রাস পাইছে। ফলত উন্নয়নৰ গতি স্তিমিত হৈ পৰিছে। অৱশ্যে শুল্কৰ জৰিয়তে চৰকাৰে চলিত বছৰত ১৬৭৭০ কোটি ডলাৰ উপাৰ্জন কৰিব বুলি কোৱা হৈছে। ট্রাম্পৰ ২৫% শুল্কই আমেৰিকাত স্বাস্থ্য খণ্ডতো ব্যাপক প্রভাৱ পেলোৱাৰ আশংকা আছে। ইয়াৰ ফলত অত্যাৱশ্যকীয় ঔষধৰ দাম বৃদ্ধি পাব। উল্লেখযোগ্য যে আমেৰিকালৈ ভাৰতৰ পৰা প্ৰায় ৪৭% ঔষধ আমদানি কৰা হয়। ফলত দেশখনৰ স্বাস্থ্য খণ্ড ব্যাপক ক্ষতিক সন্মুখীন হোৱাৰ সম্ভাৱনা আছে বুলি কোৱা হৈছে।

Share This