ইউটিউব চাই যুৱকে কৰিলে নিজৰ পেটৰ অপাৰেশ্যন

Rashmi March 21, 2025

ডিজিটেল ডেস্কঃ ইউটিউব চাই চাই আজিকালি বহু মানুহে বহু কথা শিকে। ৰন্ধা-বঢ়া, চিলাই, হাতৰ যিকোনো কাম, গান, বাদ্য বজোৱাকে ধৰি নানা কাম মানুহে সহজতে ইউটিউবৰ পৰা শিকি বুজি লয়। এক অৰ্থত ইউটিউবে মানুহৰ জীৱনযাত্ৰাত বহুখিনি অৱদান আগবঢ়াই আহিছে।

কিন্তু ইউটিউবৰ পৰা এক বিশেষ শিক্ষা লৈ এজন যুৱকে এনে এক কাণ্ড কৰিলে যি কথা শুনিলে আপোনাৰ চকু কপালত উঠিব।
এজন যুৱকে পেটৰ বিষত ভুগি থাকিব নোৱৰা হ'ল। তেওঁ ইউটিউব চাই নিজেই কৰিলে নিজৰ পেটৰ অপাৰেশ্যন।

মথুৰাত ঘটিছে এই ঘটনা। যুৱকজনৰ এই কাণ্ডত চিকিৎসকসকলো আচৰিত হৈ পৰিল। অপাৰেচনৰ বাবে যুৱকজনে মেডিকেলৰ পৰা নম্বিং ইনজেকচন, ব্লেড আৰু অন্যান্য সামগ্ৰী লৈ আহিছিল। অপাৰেচনৰ অন্তত পেটটোত ১১টা চিলাই কৰে যুৱকজনে।

ইয়াৰ পিছত যেতিয়া তেওঁৰ অৱস্থা বেয়া হ’ল, তেতিয়া তেওঁ বিষত চিঞৰিবলৈ ধৰিলে। পৰিয়ালৰ লোকে ততাতৈয়াকৈ জিলা চিকিৎসালয়ত ভৰ্তি কৰে যুৱকজনক।

জানিব পৰা অনুসৰি কানহাইয়া ঠাকুৰৰ পুত্ৰ ৰাজা বাবু (৩২) বহু দিন ধৰি পেটৰ বিষত ভুগি আছিল। কেইবাবাৰো চিকিৎসকৰ দ্বাৰা চিকিৎসা কৰা হৈছিল যদিও কোনো সকাহ নাপালে ৰাজা বাবুয়ে। ১৮ বছৰ পূৰ্বে তেওঁৰ এপেণ্ডিক্স অপাৰেচন কৰা হৈছিল, তাৰ পিছত তেওঁ সঘনাই পেটৰ বিষত ভুগিছিল। অহৰহ বিষত বিৰক্ত হৈ তেওঁ নিজেই অপাৰেচনটো কৰাৰ সিদ্ধান্ত ল’লে।

এটাত কোঠাত নিজকে আবদ্ধ কৰি ডাক্তৰৰ দৰে বেজী দি ৰাজা বাবুৱে নিজকে প্ৰথমে অজ্ঞান কৰি পেলালে। ইয়াৰ পিছত তেওঁ অস্ত্ৰোপচাৰৰ ব্লেডেৰে পেটটো ফালি পেলালে। প্ৰথম অৱস্থাত তেওঁ কোনো বিষ অনুভৱ কৰা নাছিল যদিও ঔষধৰ প্ৰভাৱ শেষ হোৱাৰ লগে লগে তেওঁৰ কষ্ট হ’বলৈ ধৰিলে। এই সময়ছোৱাত তেওঁ পেটত ১১টা চিলাইয়ো কৰিছিল। বিষৰ পৰা কোনো সকাহ পোৱা নাছিল ৰাজা বাবুৱে। তেওঁ জোৰেৰে চিঞৰিবলৈ ধৰিলে। যুৱকজনৰ চিঞৰ শুনি পৰিয়ালৰ লোকে দৌৰি গৈ লগে লগে তেওঁক জিলা চিকিৎসালয়লৈ লৈ যায়। সংকটজনক অৱস্থাত চিকিৎসকে যুৱকজনক ভৰ্তি কৰি চিকিৎসা অব্যাহত ৰাখিছে।

চিকিৎসকে কয় যে উপযুক্ত তথ্য অবিহনে এনে পদক্ষেপ লোৱাটো অতি মাৰাত্মক। বৰ্তমান ৰাজা বাবুৰ অৱস্থা সুস্থিৰ। তেওঁৰ চিকিৎসা চলি আছে।

এই ঘটনা চিকিৎসা বিশেষজ্ঞ আৰু সাধাৰণ জনতাৰ বাবে এক সতৰ্কবাণী যে কোনো ধৰণৰ পেছাদাৰী প্ৰশিক্ষণ অবিহনে নিজাববীয়াকৈ অস্ত্ৰোপচাৰ কৰাটো অতি ভয়ংকৰ বুলি প্ৰমাণিত হ’ব পাৰে।

উৎস: প্ৰাগ নিউজ ডিজিটেল

গুৱাহাটীত নিশা ১১ বজালৈকে খোলা থাকিব সুৰাৰ বিপণী