পহলগাম আক্রমণত জড়িত টি আৰ এফক বিশ্ব সন্ত্রাসবাদী সংগঠন ঘোষণা আমেৰিকাৰ

dainik janambhumi July 19, 2025

ডিজিটেল ডেস্ক : পহলগামত ২৬জন নিৰীহ পৰ্যটকক হত্যা কৰা পাকিস্তান-ভিত্তিক সন্ত্রাসবাদী সংগঠন দ্য ৰেজেষ্টেন্স ফ্রণ্টক (টি আৰ এফ) বিশ্ব পৰ্যায়ৰ সন্ত্রাসবাদী সংগঠন ৰূপে ঘোষণা কৰে আমেৰিকাই। উল্লেখযোগ্য যে টি আৰ এফ পাকিস্তান-ভিত্তিক দুর্ধর্ষ সন্ত্রাসবাদী সংগঠন লস্কৰ-ই-টয়বাৰ (এল ই টি) সহযোগী সংগঠন। আমেৰিকাই টি আৰ এফক সন্ত্রাসবাদীৰ দুখন গুৰুত্বপূৰ্ণ তালিকাত অন্তর্ভুক্ত কৰে। আমেৰিকাই সন্ত্রাসবাদী সংগঠনটোক বিদেশী সন্ত্রাসবাদী সংগঠনৰ (এফ টি অ') আৰু বিশেষভাৱে নির্ধাৰণ কৰা বিশ্ব সন্ত্রাসবাদীৰ (এছ ডি জি টি) তালিকাত অন্তর্ভুক্ত কৰে। উল্লেখযোগ্য যে পাকিস্তানৰ পৰা পাৰিচালিত হোৱা টি আৰ এফক লস্কৰ- ই-টয়বাৰ নতুন ৰূপ বুলি কোৱা হয়। আমেৰিকাই কয় যে টি আৰ এফে যোৱা ২২ এপ্রিলত পহলগামত ২৬জন পৰ্যটকক হত্যা কৰা আক্ৰমণটোৰ দায়িত্ব স্বীকাৰ কৰিছিল। ইফালে, আমেৰিকাৰ এই সিদ্ধান্তক আদৰণি জনাইছে ভাৰতৰ বিদেশ মন্ত্রী এছ জয়শংকৰে। 

জয়শংকৰে কয়, 'টি আৰ এফক সন্ত্রাসবাদী সংগঠন ৰূপে ঘোষণা কৰাৰ কাৰণে আমেৰিকাৰ বিদেশ মন্ত্রী মার্কো কবিয়' আৰু আমেৰিকাৰ বিদেশ বিভাগক কৃতজ্ঞতা জ্ঞাপন কৰিছোঁ।' এই পদক্ষেপে ভাৰত আৰু আমেৰিকাৰ সহযোগিতামূলক সুৰক্ষা আৰু সন্ত্রাসবাদৰ বিৰুদ্ধে যুঁজক অধিক শক্তিশালী কৰিব। আমেৰিকাৰ বিদেশ বিভাগে কয় যে পহলগামৰ আক্ৰমণ ২০০৮ চনৰ পাছত ভাৰতত কৰা আটাইতকৈ ভয়াবহ সন্ত্রাসবাদী আক্রমণ। টি আৰ এফে কেৱল নিৰীহ নাগৰিককে নহয় নিৰাপত্তা বাহিনীকো আক্রমণ কৰে। আমেৰিকাই লগতে কয় যে এই সিদ্ধান্তই আমেৰিকাৰ ৰাষ্ট্ৰীয় নিৰাপত্তা আৰু সন্ত্রাসবাদৰ বিৰুদ্ধে দায়বদ্ধতাক প্রকাশ কৰিলে। আমেৰিকাই লগতে এই কথা প্রকাশ কৰে যে টি আৰ এফৰ বিৰুদ্ধে গ্রহণ কৰা ব্যৱস্থা সন্ত্রাসবাদীক ন্যায়ৰ কাঠগড়াত থিয় কৰোৱাৰ বাবে ট্রাম্প প্রশাসনে লোৱা নীতিৰ অংশ। ইফালে, ট্রাম্প প্রশাসনে গ্রহণ কৰা এই পদক্ষেপে সন্ত্রাসবাদৰ প্ৰতি থকা পাকিস্তানৰ ভূমিকাত বিশ্বৰ আগত পুনৰ উদঙাই দেখুৱালে। ইয়াৰ পাছত এতিয়া পাকিস্তানক এফ এ টি এফৰ গ্রে লিষ্টত অন্তর্ভুক্ত কৰাৰ সম্ভাৱনাও বৃদ্ধি পালে। উল্লেখযোগ্য যে টি আৰ এফ ঘাইকৈ জম্মু আৰু কাশ্মীৰত সক্রিয়। এই সন্ত্রাসবাদী সংগঠনটোৱে দেখাত নিৰীহ যেন লোকক সদস্য ভর্তি কৰে আৰু গোপনে সন্ত্রাসবাদী কার্যকলাপ অব্যাহত ৰাখে। ভাৰতে ২০২৩ চনৰ ৫ জানুৱাৰীত টি আৰ এফক সন্ত্রাসবাদী সংগঠন ৰূপে ঘোষণা কৰিছিল। 

ইফালে, টি আৰ এফক আমেৰিকাই এফ টি অ' তালিকাত অন্তৰ্ভূক্ত কৰাৰ পাছত এতিয়া সন্ত্রাসবাদী সংগঠনটোক দেশখনৰ বাবে ভাবুকিৰ সৃষ্টি কৰা সংগঠন বুলি গণ্য কৰা হ'ব। ইয়াৰ লগতে টি আৰ এফলৈ বিত্তীয়, অস্ত্র-শস্ত্র তথা অবৈধ বুলি গণ্য কৰা হ'ব আৰু তেনে ব্যক্তি তথা সংগঠনৰ বিৰুদ্ধে আইনী ব্যৱস্থা গ্রহণ কৰা হ'ব। ইয়াৰ লগতে এছ ডি জি টি তালিকাত অন্তৰ্ভূক্ত কৰাৰ পাছত টি আৰ এফৰ আমেৰিকাত থকা সংগঠনটো বা ইয়াৰ লগত জড়িত থকা ব্যক্তিৰ সকলো সা-সম্পত্তি বাজেয়াপ্ত কৰা হ'ব। ইয়াৰ লগতে আমেৰিকাৰ কোনো সংগঠন তথা ব্যক্তিয়ে টি আৰ এফৰ সৈতে কোনো ধৰণৰ সম্পৰ্ক ৰাখিব নোৱাৰিব।

Share This