বিয়াঘৰত সোমাল নাহৰফুটুকী! লাগিল হুৱা-দুৱা, দৰাই মাৰিলে খিৰিকীৰে জাঁপ

Kakali Deka February 13, 2025

ডিজিটেল ডেস্কঃ বিপদ কেতিয়া, কেনেকৈ আহে সেয়া কোনেও ক’ব নোৱাৰে। এখন বিয়াঘৰত হঠাতে এনে এক বিপদৰ সৃষ্টি হ’ল যে সেই কথা জানিলে আপুনিও আচৰিত হৈ পৰিব।

উত্তৰ প্ৰদেশৰ লক্ষ্ণৌত এক চাঞ্চল্যকৰ ঘটনা সংঘটিত হৈছে। সুন্দৰকৈ চলি আছিল এক বিবাহ অনুষ্ঠান। সকলোৰে মুখত হাঁহি, মনত আনন্দ। ৰীতি-নীতি অনুযায়ী সকলোখিনি ধুনীয়াকৈ চলি আছিল, কিন্তু হঠাতে ৰাইজৰ মাজত লাগিল হুৱা-দুৱা। মুহূৰ্ততে বিয়াঘৰত বিৰাজ কৰিলে আতংকময় পৰিৱেশ।

পৰিস্থিতি এনেকুৱা আছিল যে হাঁহি হাঁহি ফটো তুলি থকা কইনাজনীয়ে বান্ধৱীৰ সৈতে সেই স্থানৰ পৰা পলায়ন কৰে। পৰিয়াল, আত্মীয়-স্বজন, অতিথি সকলোৱে লগালে দৌৰা-ঢপৰা। দৰায়েও জাঁপ মাৰিলে খিৰিকীৰে। আচলতে কি ঘটিছিল তাত? 

ঘটনা অনুসৰি বিয়াঘৰত প্ৰৱেশ কৰিছিল এটা প্ৰকাণ্ড নাহৰফুটুকী। মুখৰ আগত নাহৰফুটুকী দেখি সকলোৰে জীৱ যাওঁ যাওঁ অৱস্থা। হাতৰ মুঠিত প্ৰাণটো বান্ধি সকলোৱে লগালে দৌৰ।

লক্ষ্ণৌৰ পাৰা থানা এলেকাৰ এম এম মেৰেজ লনত বিবাহ অনুষ্ঠান চলি থকা অৱস্থাত সংঘটিত হয় এই ঘটনা। বুধবাৰে নিশা প্ৰায় ১০-৩০ বজাত দ্বিতীয় মহলাত নাহৰফুটুকীটো দেখি এজন অতিথিয়ে ভয় খাই ওপৰৰ পৰা জঁপিয়াই দিয়ে। ইয়াৰ বাবেই তেওঁ আহত হয় আৰু তাৰ পাছত বিবাহ ভৱনত বিশৃংখলতাৰ সৃষ্টি হয়।

বিয়াত উপস্থিত থকা সকলোৱে নিৰাপদ স্থানলৈ গমন কৰে আৰু বন বিভাগক খবৰ দিয়া হয়। তথ্য লাভ কৰাৰ লগে লগে বন বিষয়াৰ এটা দল সেই স্থানত উপস্থিত হোৱাৰ লগে লগে নাহৰফুটুকী উদ্ধাৰ অভিযান আৰম্ভ হয়। এই সময়তে নাহৰফুটুকীটোৱে বিষয়াসকলক আক্ৰমণ কৰে আৰু বন বিষয়া মুকাদ্দাৰ আলী আহত হয়। অশেষ প্ৰচেষ্টাৰ অন্তত অৱশেষত বৃহস্পতিবাৰে পুৱা ৪ বজাত বন বিভাগে নাহৰফুটুকীটো ধৰিবলৈ সক্ষম হয়। আনহাতে, আহত বন বিষয়া মুকাদ্দাৰ আলী স্থানীয় চিকিৎসালয়ত চিকিৎসাধীন হৈ আছে। এই ঘটনাই অঞ্চলটোৰ স্থানীয় লোকৰ সুৰক্ষাক লৈ উদ্বেগৰ সৃষ্টি কৰিছে।

উৎস- প্ৰাগ নিউজ ডিজিটেল

Share This