এগৰাকী যুৱতীৰ ওচৰলৈ বাৰে বাৰে আহি থাকে নাগ ! এতিয়ালৈকে দংশন কৰিলে ১৩ বাৰ

Rashmi March 29, 2025

ডিজিটেল ডেস্কঃ উত্তৰ প্ৰদেশৰ মহোবাৰ পৰা পোহৰলৈ আহিছে এক আশ্চৰ্যজনক ঘটনা। এগৰাকী যুৱতীৰ ওচৰলৈ বাৰে বাৰে আহি থাকে নাগ।  

এই সাপে ছোৱালীজনীক চাৰি বছৰত ১৩ বাৰ দংশন কৰিলে, আচৰিত কথাটো হ'ল ছোৱালীজনী এতিয়াও সুৰক্ষিত অৱস্থাত আছে। একাংশই এই ঘটনাক নাগ-নাগিনৰ প্ৰেম কাহিনীৰ সৈতে সংযোগ কৰিছে, আন কোনোৱে ইয়াক পূৰ্বজন্মৰ অসম্পূৰ্ণ কাহিনী বুলি অভিহিত কৰিছে। গাঁওবাসীয়ে কয় যে যুৱতীগৰাকী আগৰ জনমত নাগিন আছিল। সেয়েহে নাগিনৰ সন্ধানত নাগ বাৰে বাৰে আহি উপস্থিত হয়। বৰ্তমান সময়ত সাপ আৰু ছোৱালীজনীক লৈ অঞ্চলটোত বিভিন্ন ধৰণৰ আলোচনা চলি আছে। 

গোটেই ঘটনাটো চৰখাৰি তহচিলৰ পঞ্চমপুৰা গাঁৱৰ। চাৰি বছৰত ১৩ বাৰ সাপে খোঁটা কথাটোক গাঁওবাসীয়ে সহজভাৱে লব পৰা নাই। বুধবাৰে শেষবাৰৰ বাবে সাপটোৱে তেওঁক বুঢ়া আঙুলিত খুঁটিছিল। ছোৱালীজনীক চিকিৎসালয়ত ভৰ্তি কৰা হৈছে, বৰ্তমান তেওঁ বিপদমুক্ত।  

গাঁওবাসীৰ মাজত চৰ্চা চলিছে যে পূৰ্বৰ জীৱনৰ আধৰুৱা প্ৰেম কাহিনীৰ বাবেই সাপটোৱে বাৰে বাৰে আহি ছোৱালীজনীক দংশন কৰি হত্যা কৰিব বিচাৰে। যাতে পৰৱৰ্তী জীৱনত তেওঁৰ লগত একেলগে থাকিব পাৰে।

পঞ্চমপুৰাৰ বাসিন্দা ধনপটে জনোৱা মতে, বুধবাৰে তেওঁৰ ২০ বছৰীয়া কন্যা ৰোশনী চোতালতে বহি আছিল। তেনেতে ক’লা সাপ এটা আহি তেওঁৰ বুঢ়া আঙুলিটোত খোঁট মাৰে। যেতিয়া তেওঁলোকে সাপটোক ধৰি মাৰি মাৰিবলৈ চেষ্টা কৰিলে, তেতিয়া সেই সাপটো নোহোৱা হৈ গ’ল। পৰিয়ালৰ লোকৰ মতে ঘৰখনত সৰু সৰু ল’ৰা-ছোৱালী আৰু আন মানুহ বহুত আছে যদিও সাপটোৱে আহি কেৱল ৰোশনীকহে দংশন কৰে। 

ৰাইজৰ পৰামৰ্শ মতে তেওঁলোকে সকলো কৰিলে, কিন্তু কোনো সকাহ পোৱা নাই। অসম্পূৰ্ণ প্ৰেম কাহিনীক লৈ গাঁওখনত তীব্ৰ আলোচনা চলিছে। অৱশ্যে একাংশ লোকে ইয়াক কাকতালীয় বুলিও অভিহিত কৰিছে।

ৰোশনীৰ মাতৃয়ে জনোৱা মতে, দেওবাৰ বা বুধবাৰেহে সাপে কন্যাক দংশন কৰে। বেলগ বাৰত দংশন নকৰে। এইবাৰো বুধবাৰে ছোৱালীজনীক খোঁট মাৰে সাপটোৱে। চিকিৎসালয়ৰ উপৰি জৰা-ফুকা কৰিও সকাহ পোৱা নাই ৰোশনীয়ে।

উৎস: প্ৰাগ নিউজ ডিজিটেল

Share This