৩৪টা পদকেৰে অভিযান সামৰিলে অসমে

dainik janambhumi February 14, 2025

ডিজিটেল ডেস্ক: উত্তৰাখণ্ডত সামৰণি পৰিবলগীয়া ৩৮সংখ্যক ৰাষ্ট্ৰীয় ক্রীড়াত অসমে ৩টা সোণ, ১৫টা ৰূপ আৰু ১৬টা ব্ৰঞ্জৰ পদকসহ মুঠ ৩৪টা পদক জিনি পদক তালিকাৰ ২৪ নম্বৰ স্থানত থাকে। তেনেদৰেই দেশৰ সৰ্বোচ্চ ক্রীড়া মহোৎসৱখনত অসমে পদক দখল অভিযানৰো সামৰণি মাৰিলে। মেগা ইভেণ্টখনৰ আনুষ্ঠানিক সামৰণী অনুষ্ঠান হাল্ডোৱানীৰ ইন্দিৰা গান্ধী ষ্টেডিয়ামত অনুষ্ঠিত হ'ব। অসমে নেটবলৰ মিক্সড শাখাত অন্তিমটো পদক জয়ৰ লক্ষ্যৰে গ্ৰুপৰ অন্তিমখন মৰণপণ খেলত উত্তৰাখণ্ডৰ বিৰুদ্ধে অৱতীৰ্ণ হৈছিল।যদিও খেলখনত পৰাজয় স্বীকাৰ কৰাৰ লগে লগেই এইবাৰৰ ৰাষ্ট্ৰীয় ক্রীড়াত ৩৪টা পদক জয়ৰে অসমে অভিযানৰ যতি পেলালে। 

অৱশ্যে বিগত ৩৭সংখ্যক গোৱা ৰাষ্ট্ৰীয় ক্রীড়াত অসমে উল্লেখনীয় প্রদর্শন দাঙি ধৰি মুঠ ৫৬টা পদক লাভ কৰিছিল। সেইবাৰ অসমে ১৪টা সোণ, ২০টা ৰূপ আৰু ২২টা ব্ৰঞ্জৰ পদক পাইছিল। অৱশ্যে গোৱাত অসমে পেনচাক ছিলাটত এটাকৈ সোণ-ৰূপ আৰু চাৰিটা ব্ৰঞ্জ পোৱাৰ লগতে কালাৰিপায়াট্টুত পাঁচটা ৰূপ আৰু দুটা ব্ৰঞ্জ দখল কৰিছিল। ইফালে, স্কে মার্চেল আর্টছত এটা ৰূপ আৰু ছেপাকটাকৰ'ত দুটা ব্রঞ্জ পাইছিল অসমে। এই ১৬টা পদকে অসমক অর্ধশতক পাৰ কৰাত সহায় কৰিছিল। এইবাৰ এই চাৰিবিধ খেল উত্তৰাখণ্ডত মুখ্য ক্রীড়াৰূপে অন্তর্ভুক্ত নহ'ল। কালাৰিপায়াট্টু আছিল যদিও ভাৰতীয় অলিম্পিক সন্থাই অন্তিম মুহূর্তত প্রদর্শনী (ডেম') খেলৰূপে ঘোষণা কৰে, ফলত সেইবিধ খেলত অসমে ১৬টা পদক লাভ কৰাৰ পাছতো পদক তালিকাত স্থান নাপালে। গোৱাৰ নিয়ম থাকিলে উত্তৰাখণ্ডতো অসমৰ মুঠ পদক ৫০টা হোৱাৰ অৱকাশ আছিল।  অৱশ্যে অলিম্পিক গেমছত অসমৰ ফলাফল ইতিবাচক বুলিব পাৰি।  কিন্তু এইবাৰ অসমৰ সোণৰ পদক অৰ্জনৰ মান যোৱা পাঁচখন ৰাষ্ট্ৰীয় ক্ৰীড়াৰ সৰ্বনিন্ম।

২০০৭ত অসমে যেতিয়া গুৱাহাটীত ৩৩সংখ্যক ৰাষ্ট্ৰীয় ক্রীড়াৰ আয়োজন কৰিছিল তেতিয়া আয়োজক হিচাপে সকলো খেলতে অংশ লৈ ৩৮টা সোণ, ৫৩টা ৰূপ আৰু ৫৭টা ব্রঞ্জসহ মুঠ ১৪৮টা পদক লাভ কৰি পদক তালিকাৰ তৃতীয় স্থানত আছিল। ৰাষ্ট্ৰীয় ক্রীড়াৰ ইতিহাসত যদিও সেয়া অসমৰ শ্রেষ্ঠ প্রদর্শন, কিন্তু বাহিৰৰ ৰাজ্যত অংশ লৈ সর্বাধিক পদক জয়ৰ অভিলেখ গোৱাতে গঢ়িছিল। গুৱাহাটীৰ পৰৱৰ্তী ২০১১ত ঝাৰখণ্ডত হোৱা ৰাষ্ট্ৰীয় ক্ৰীড়াত অসমে পাঁচটা সোণ, ১১টা ৰূপ আৰু ১৮টা ব্রঞ্জসহ মুঠ ৩৪টা পদক লাভ কৰাৰ বিপৰীতে ২০১৫ৰ কেৰালা ৰাষ্ট্ৰীয় ক্রীড়াত অসমে নটা সোণ, পাঁচটা ৰূপ আৰু ১১টা ব্রঞ্জসহ মুঠ ২৫টা পদক দখল কৰিছিল। আনহাতে, ২০২২ৰ গুজৰাট ৰাষ্ট্ৰীয় ক্রীড়াত অসমে নটা সোণ, ১০টা ৰূপ আৰু নটা ব্রঞ্জসহ মুঠ ২৮টা পদক লাভ কৰিছিল।

Share This