ডিজিটেল ডেস্কঃ খালী ভৰিৰে খোজকঢ়াটো স্বাস্থ্যৰ বাবে উপকাৰী বুলি আগৰ দিনৰ বয়সস্থ লোকসকলে কোৱা প্ৰায়ে শুনিবলৈ পোৱা গৈছিল৷ কিন্তু এতিয়া মানুহে খালী ভৰিৰে খোজকাঢ়িবলৈ যেন পাহৰিলেই৷ সকলোৱে ভৰিত জোতা-চেণ্ডেল নিপিন্ধাকৈ এক মুহূৰ্তও যেন থাকিব নোৱাৰে৷ সেয়েহে খালী ভৰিৰে খোজকঢ়াৰ অভ্যাস এতিয়া প্ৰায় নোহোৱা হৈ পৰিছে৷ কিন্তু স্বাস্থ্য বিশেষজ্ঞসকলৰ মতে, আমি পুৱা শুই উঠাৰ পাছত কমেও ২০ মিনিট খালী ভৰিৰে ঘাঁহনিত খোজকাঢ়িলে বহুখিনি উপকাৰ পোৱা যায়৷ খালী ভৰিৰে খোজকাঢ়িলে ভৰিৰ তলুৱাত চাপ পৰে৷
আচলতে আমাৰ শৰীৰ কেইবাটাও অংগৰ ‘প্ৰেছাৰ পইণ্ট’ হ’ল ভৰিৰ তলুৱাখন৷ ইয়াৰ ভিতৰত চকুও আছে৷ ভৰিৰ সঠিক বিন্দুত চাপ পৰিলে আমাৰ চকুৰ দৃষ্টিশক্তি বৃদ্ধি পায়৷ আনহাতে খালী ভৰিৰে ঘাঁহনিত খোজকাঢ়িলে ‘গ্ৰীন থেৰাপি’ পোৱা হয়৷ ইয়াৰ ফলত ভৰিৰ তলুৱাত থকা কোমল কোষৰ সৈতে জড়িত স্নায়ু সক্ৰিয় হৈ পৰে আৰু মগজুলৈকে ইয়াৰ সংকেত প্ৰেৰণ কৰে৷ ইয়াৰ ফলত এলাৰ্জীৰ সমস্যা নোহোৱা হয়৷ আনহাতে আমি যেতিয়া পুৱা ঘাঁহনিত খোজকাঢ়োঁ, তেতিয়া আমাৰ ভৰিৰ বাবে ই একপ্ৰকাৰৰ মালিচৰ কাম কৰে৷ ইয়াৰ ফলত ভৰিৰ মাংসপেশীসমূহ শিথিল হৈ পৰে৷ ইয়াৰ ফলত সৰু-সুৰা বিষ নোহোৱা হৈ পৰে৷ পুৱা ঘাঁহনিত খালী ভৰিৰে খোজকঢ়াটো মানসিক স্বাস্থ্যৰ বাবেও উপকাৰী৷ ইয়াৰ ফলত মন শিথিল হৈ পৰে আৰু চিন্তা তথা মানসিক চাপৰ পৰা মুক্ত হোৱাত সহায় কৰে৷
বহুতেই এটা কথা নাজানে যে পুৱাৰ এই অভ্যাসে আমাৰ শৰীৰৰ আন উপকাৰো সাধন কৰে৷ বহুমূত্ৰ ৰোগীৰ ঘা হ’লে শুকাওঁতে সময় লাগে৷ কিন্তু নিয়মীয়াকৈ খালী ভৰিৰে খোজকাঢ়িলে এই সমস্যাৰ পৰা সকাহ পাব পাৰি৷