'নির্বাচন আয়োগে কিয় বিজেপিৰ এজেণ্টৰ দৰে আচৰণ কৰিছে?'

dainik janambhumi August 09, 2025

ডিজিটেল ডেস্ক : নির্বাচন আয়োগে শপতৰ সৈতে এখন শপতনামা দাখিল কৰিবলৈ কোৱাক লৈ শুকুৰবাৰে ৰাহুল গান্ধীয়ে আয়োগক সমালোচনা কৰে। বেংগালুৰুত 'ভোট অধিকাৰ সমাৱেশ'ত ভাষণ দি গান্ধীয়ে অভিযোগ কৰে যে নির্বাচন আয়োগ আৰু বিজেপিয়ে মিলি লোক সভাৰ নিৰ্বাচনত খেলিমেলি কৰিলে। তেওঁ কয়, 'নির্বাচন আয়োগে মোৰ শপতনামা দাখিল কৰিবলৈ কৈছে আৰু শপত খাই তথ্যবোৰ দিবলৈ কৈছে। মই সংসদৰ ভিতৰত সংবিধান চুই শপতগ্ৰহণ কৰিছোঁ।' তেওঁ আৰু অভিযোগ কৰে যে আজি যেতিয়া তেওঁ প্ৰকাশ কৰা তথ্যক লৈ মানুহে নির্বাচন আয়োগক প্রশ্ন কৰিছে, তেতিয়া আয়োগে ইয়াৰ ৱেবছাইট বন্ধ কৰিছে। 

গান্ধীয়ে অভিযোগ কৰে যে মধ্য প্রদেশ, ৰাজস্থান আৰু বিহাৰৰ আয়োগৰ ৱেবছাইট বন্ধ কৰা হৈছে। গান্ধীয়ে নির্বাচন আয়োগক ৫টা প্রশ্ন কৰে। তেওঁ কয় যে তেওঁক ভাবুকি দিয়াতকৈ আয়োগে এই প্ৰশ্নবোৰৰ উত্তৰ দিয়া উচিত। গান্ধীয়ে কৰা প্ৰশ্নবোৰ হ'ল-১) আপোনালোকে কিয় ভাৰতৰ জনতাক ডিজিটেল মেচিনৰ পঠনসাধ্য ফৰমেটত ভোটাৰ তালিকা দিয়া নাই?, ২) আপোনালোকে কিয় ভিডিঅ' প্রমাণ ধ্বংস কৰি আছে?, ৩) নির্বাচন আয়োগে ভোটাৰ তালিকাত ব্যাপক জালিয়াতি কিয় কৰিছে?, ৪) কিয় আয়োগে আমাৰ প্ৰশ্নবোৰৰ উত্তৰ নিদি বিৰোধী দলক ভাবুকি দিছে, আৰু ৫) নির্বাচন আয়োগে কিয় বিজেপিৰ এজেণ্টৰ দৰে আচৰণ কৰিছে? 

ইফালে, কংগ্রেছ নেত্রী প্রিয়ংকা গান্ধীয়ে শুকুৰবাৰে নতুন দিল্লীত নির্বাচন আয়োগক সমালোচনা কৰি কয় আয়োগক ৰাহুল গান্ধীয়ে দাবী কৰা 'ভোট চুৰি' সন্দৰ্ভত তদন্ত কৰিবলৈ আহ্বান জনায়। প্রিয়ংকাই কয় যে আয়োগে পুনৰ চিন্তা কৰা উচিত যে তেওঁলোকে তেওঁলোকৰ দায়বদ্ধতা কেৱল বিজেপিৰ প্ৰতিহে আছে বুলি ভাবে নেকি?

Share This