কার্গিলৰ শ্বহীদৰ পত্নীৰ দেশপ্রেম , একমাত্র পুত্রক পঠিয়ালে ভাৰতীয় সেনালৈ

dainik janambhumi July 27, 2025

ডিজিটেল ডেস্কঃ ১৯৯৯ চনৰ কাৰ্গিল যুদ্ধৰ সময়ত ২০ বছৰ বয়সতে বিনোদ কানৱাৰে তেওঁৰ স্বামীক হেৰুৱাইছিল। তেওঁৰ স্বামী কার্গিল যুদ্ধত শ্বহীদ হৈছিল। স্বামীক কম বয়সতে হেৰুওৱাৰ মর্মবেদনা থকা সত্ত্বেও মহিলাগৰাকীৰ দেশপ্রেম ম্লান হোৱা নাছিল।

 শেহতীয়াকৈ মহিলাগৰাকীয়ে তেওঁৰ একমাত্র পুত্ৰক ভাৰতীয় সেনাত যোগ দিবলৈ পঠিয়াইছে। শুকুৰবাৰে ২৬সংখ্যক কার্গিল বিজয় দিৱসৰ উপলক্ষত শ্বহীদসকলৰ পৰিয়ালৰ লোকৰ বাবে আয়োজিত এটা সম্বর্ধনা অনুষ্ঠানত অংশ লৈ ৪৬ বছৰীয়া কানৱাৰে কয়, 'আমি প্রথমে দেশৰ কথা ভাবিব লাগে আৰু দেশক সুৰক্ষা দিব লাগে। আমি স্বাৰ্থপৰ হ'ব নালাগে।' 

উল্লেখযোগ্য যে কার্গিল যুদ্ধৰ সময়ত ১৯৯৯ চনৰ ১০ জুলাইত ভাৰতীয় সেনাৰ নায়ক ভানৱাৰ সিং ৰাথোৰে বীৰত্বৰে শত্ৰুৰ বিৰুদ্ধে যুঁজি নিহত হৈছিল। ইয়াৰ পাছতো বীৰ সৈনিকজনৰ পত্নীৰ মনোবল ভাগি নপৰিল আৰু তেওঁলোকৰ একমাত্র পুত্র সন্তান তেজবীৰ সিং ৰাথোৰক ভাৰতীয় সেনাত সেৱা কৰিবলৈ প্ৰস্তুত কৰোৱালে। কানৱাৰে কয় যে তেওঁলোকৰ পুত্ৰ তেজবীৰে বৰ্তমান ডেৰাডুনস্থিত ভাৰতীয় মিলিটেৰী একাডেমিত প্রশিক্ষণ লৈ আছে। কানৱাৰে কয় যে তেওঁৰ স্বামী নিহত হোৱাৰ সময়ত তেওঁৰ পুত্র মাত্র ছমহীয়া আছিল। তেওঁৰ পুত্ৰই নিজৰ পিতৃক আনকি ভালদৰে চাবলৈও নাপালে বুলি তেওঁ কয়।

Share This