পাকিস্তানত হ'ব কোৱালিফায়িঙৰ খেল

dainik janambhumi March 11, 2025

ডিজিটেল ডেস্ক  : চেম্পিয়নছ ট্রফী আয়োজনক লৈ তীব্র সমালোচনাৰ সন্মুখীন হ'ব লগীয়া হয় পাকিস্তান ক্রিকেট ব'র্ড (পি চি বি)। বৰষুণৰ পাছত খেলপথাৰ খেলৰ বাবে উপযুক্ত কৰাৰ ক্ষেত্ৰত দক্ষতা দেখুওৱাত ব্যর্থ হয় পাকিস্তান। গোটেই খেলপথাৰ ঢাকি ৰখাৰ ব্যৱস্থাও কৰিব নোৱাৰিলে পাক ব'র্ডে। তথাপি পি চি বিক আন এক বিশ্ব পৰ্যায়ৰ প্ৰতিযোগিতা আয়োজনৰ দায়িত্ব দিবলৈ আগবাঢ়িছে আন্তঃৰাষ্ট্ৰীয় ক্রিকেট কাউঞ্চিলে (আই চি চি)। 

সেই অনুসৰি চেম্পিয়নছ ট্রফী সমাপ্ত হোৱাৰ এমাহৰ ভিতৰত আৰু এখন ক্রিকেট প্রতিযোগিতা আয়োজনৰ দায়িত্ব লাভ কৰিব পাৰে পাকিস্তানে। ২০২৫ চনৰ শেষৰ ফালে ভাৰতত হ'ব মহিলাৰ এদিনীয়া বিশ্ব কাপ। সম্ভৱতঃ অক্টোবৰত হ'ব লগীয়া উক্ত বিশ্ব কাপৰ যোগ্যতা অৰ্জনকাৰী প্ৰতিযোগিতা আয়োজনৰ দায়িত্ব পাব পাৰে পাকিস্তানে। অহা ৪ এপ্রিলত সেই প্রতিযোগিতা আৰম্ভ হোৱাৰ সম্ভাৱনা আছে। অৱশ্যে আই চি চিয়ে সেই সম্পর্কত চূড়ান্ত সিদ্ধান্ত গ্রহণ কৰা নাই। অৱশ্যে সূত্ৰৰ খবৰ অনুসৰি দায়িত্ব লাভৰ দিশেৰে পাকিস্তানেই আগুৱাই আছে।

 মহিলাৰ এদিনীয়া বিশ্ব কাপৰ যোগ্যতা অর্জন পর্বত অংশ ল'ব ছখন দেশে। পাকিস্তানৰ উপৰি আছে বাংলাদেশ, ৱেষ্ট ইণ্ডিজ, আয়াৰলেণ্ড, স্কটলেণ্ড আৰু থাইলেণ্ড। দুটা দলে মূল পৰ্বত খেলাৰ বাবে যোগ্যতা আহৰণ কৰিব। প্রতিযোগিতাখনৰ কোৱালিফায়িঙৰ খেল হ'ব পাৰে লাহোৰত। পিছে চূড়ান্ত সূচী ঘোষণা কৰাৰ পাছতহে খেল ক'ত হ'ব জানিব পৰা যাব। এই পর্যন্ত ছটা দলে বিশ্ব কাপত খেলাটো নিশ্চিত হৈছে। সেই মতে, আয়োজক ভাৰতৰ উপৰি অষ্ট্ৰেলিয়া, ইংলেণ্ড, নিউজিলেণ্ড, শ্রীলংকা আৰু দক্ষিণ আফ্ৰিকাৰ অংশগ্রহণ নিশ্চিত হৈছে। মুঠ ৮টা দলক লৈ হ'ব মহিলাৰ এদিনীয়া বিশ্ব কাপ। পাকিস্তানে বিশ্ব কাপলৈ  যোগ্যতা অর্জন কৰিলে তেওঁলোকৰ মেচ হ'ব পাৰে কোনো তৃতীয় এখন দেশত। কাৰণ হাইব্রিড মডেল অনুসৰি চেম্পিয়নছ ট্রফী আয়োজনৰ সমাধান সূত্র উলিওৱাৰ সময়ত এনে বুজাবুজিত উপনীত হৈছিল।

Share This