বিশ্ব ৰেকৰ্ড গঢ়িলে ৰোহিতে

dainik janambhumi March 06, 2025

ডিজিটেল ডেস্কঃ অষ্ট্ৰেলিয়াৰ বিৰুদ্ধে মঙলবাৰে চেম্পিয়নছ ট্ৰফীৰ ছেমি ফাইনেলত ২৯টা বলত ২৮ ৰানৰ ইনিংছ খেলে ৰোহিত শৰ্মাই। ভাৰতীয় দলৰ অধিনায়ক ৰোহিতৰ বেটৰ পৰা আহে ১টা ছয়। তাৰ জৰিয়তেই এটা বিশ্ব ৰেকৰ্ড গঢ়ে ভাৰতীয় অধিনায়কগৰাকীয়ে। আই চি চিৰ প্ৰতিযোগিতাত সবাতোকৈ বেছি ছিক্সাৰ কোবোৱাৰ বিশ্ব অভিলেখ স্থাপন কৰে ৰোহিতে।

মঙলবাৰে ৰোহিতে আই চি চিৰ প্ৰতিযোগিতাখনত অষ্ট্ৰেলিয়াৰ বিৰুদ্ধে নিজৰ ৬৫সংখ্যক ছিক্সাৰ কোবায়। ৰোহিতে তেনেদৰেই ক্ৰিছ গেইলৰ ৰেকৰ্ড ভাঙি দিয়ে। ৱেষ্ট ইণ্ডিজৰ একালৰ বেটাৰ গেইলে আই চি চিৰ প্ৰতিযোগিতাত ৬৪টা ছিক্সাৰ কোবাইছিল। 

এই তালিকাৰ তৃতীয় স্থানত আছে অষ্ট্ৰেলিয়াৰ গ্লেন মেক্সৱেল, য'ত তেওঁৰ ছিক্সাৰৰ সংখ্যা হ'ল ৪৯টা। চতুর্থ স্থানত থকা দক্ষিণ আফ্ৰিকাৰ ডেভিদ মিলাৰৰ নামত আছে ৪৫টা ছিক্সাৰ। যুটিয়াকৈ পঞ্চম স্থানত আছে অষ্ট্ৰেলিয়ান প্রাক্তন অ'পেনাৰ ডেভিদ ৱাৰ্নাৰ আৰু ভাৰতৰ একালৰ অধিনায়ক সৌৰভ গাংগুলী। দুয়োগৰাকীৰ আই চি চিৰ প্ৰতিযোগিতাত ছয়ৰ সংখ্যা হ'ল ৪২টা।

আনহাতে, এদিনীয়া আন্তর্জাতিকত ৰোহিতৰ ছিক্সাৰৰ সংখ্যা হ'ল ৩৩৮টা। এই ক্ষেত্ৰত বিশ্ব ৰেকৰ্ড আছে পাকিস্তানৰ শাহিদ আফ্রিদীৰ দখলত। ৫০ অ'ভাৰৰ ক্ৰিকেটত তেওঁৰ ছিক্সাৰৰ সংখ্যা হ'ল ৩৫১টা। এদিনীয়া আন্তর্জাতিকত আৰু ১৪টা ছিক্সাৰ কোবালেই আফ্রিদীৰ বিশ্ব ৰেকৰ্ড ভাঙিব পাৰিব ৰোহিতে। 

উল্লেখযোগ্য যে ৰোহিতেই বিশ্বৰ একমাত্ৰ ক্রিকেটাৰ, যিয়ে অধিনায়ক হিচাপে আন্তর্জাতিক ক্রিকেটত ২৫০টা ছিক্সাৰ কোবোৱাৰ ৰেকৰ্ড গঢ়িছে। টি-২০ ক্রিকেটতো ছিক্সাৰৰ অভিলেখ আছে ৰোহিতৰ নামত। ২০ অ'ভাৰৰ খেলবিধত ৰোহিতৰ ছিক্সাৰৰ সংখ্যা হ'ল ২০৫টা।

Share This