বঙাইগাঁৱত ৮ বাংলাদেশীক গ্ৰেপ্তাৰ

dainik janambhumi July 23, 2025

ডিজিটেল ডেস্ক : ভাৰত-বাংলাদেশ সীমান্তৰ নদীপথসমূহত বাঢ়নী পানীৰ সুবিধা লৈ ৰাজ্যত হোৰাহোৰে সোমাইছে অবৈধ বাংলাদেশী নাগৰিক। বাংলাদেশৰ পৰা কাঁটা তাঁৰৰ বেৰা পাৰ হৈ অসমত প্ৰৱেশ কৰাৰ লগতে অবৈধ বাংলাদেশীসমূহে দেশৰ ভিন্ন প্ৰান্তৰত কামৰ সংক্রান্তত ঘূৰি ফুৰাৰ লগতে ছদ্মবেশ ধৰি বিভিন্ন কামত নিয়োজিত হৈ থকাৰ তথ্য পোহৰলৈ আহিছে। সোমবাৰে নিউ বঙাইগাঁও ৰে'ল ষ্টেছনত সন্দেহজনক শ শ লোকে বহিঃৰাজ্যৰ পৰা ৰে'লেৰে অসমত প্ৰৱেশ কৰাৰ এটা ভিডিঅ' ভাইৰেল হোৱাৰ পাছত মঙলবাৰে বঙাইগাঁও জিলা প্রশাসনৰ লগতে আৰক্ষী প্রশাসন সষ্টম হৈ পৰে।

মঙলবাৰে পুৱাৰে পৰা বঙাইগাঁও আৰক্ষীৰ শীৰ্ষ বিষয়াসকলে জি আৰ পি এফ আৰু আৰ পি এফৰ সহযোগাত ৰে'ল ষ্টেছনত কটকটীয়া নিৰাপত্তা বেষ্টনী গঢ়ি তোলে। ৰে'লেৰে অহা প্ৰতিগৰাকী লোকৰ তন্ন-তন্নকৈ নথি-পত্ৰ পৰীক্ষা কৰে নিৰাপত্তা বিভাগৰ লোকসকলে। বহিঃৰাষ্ট্ৰৰ পৰা বা বহিঃৰাজ্যৰ পৰা যাতে অবৈধ লোকে বঙাইগাঁৱত প্রৱেশ কৰিব নোৱাৰে বা ইয়াৰ পৰা যাতে অন্য ঠাইলৈ ৰে'লেৰে অবৈধ নাগৰিকে যাব নোৱাৰে তাৰ ব্যৱস্থা কৰে। কালি পুৱাৰে পৰা নিউ বঙাইগাঁও ৰে'ল ষ্টেছনত কটকটীয়া নিৰাপত্তা ব্যৱস্থা বঙাইগাঁও আৰক্ষী আৰু জি আৰ পি এফৰ লগতে আৰ পি এফে কৰাৰ সময়তে আঠগৰাকী বাংলাদেশী লোকক গ্ৰেপ্তাৰ কৰে। ৰে'ল ষ্টেছনত সন্দেহজনকভাৱে ঘূৰি ফুৰাত তথা ৰে'লযাত্ৰী হিচাপে থকাত তেওঁলোকক তন্ন-তন্নকৈ তালাচী চলায় নিৰাপত্তা বাহিনীৰ লোকে। বঙাইগাঁও আৰক্ষী আৰু জি আৰ পি এফৰ অভিযানত ধৃত এই বাংলাদেশীকেইজনে বাংলাদেশৰ পৰা কাঁটা তাঁৰৰ বেৰা পাৰ হৈ জামালপুৰ হৈ অসমত প্ৰৱেশ কৰে বুলি কয়। বানপানীৰ বাবে কাঁটা তাঁৰৰ বেৰা ভাঙি যোৱাত নদী পথেৰে প্ৰৱেশ কৰে আৰু তাত কোনো নিৰাপত্তা ব্যৱস্থা নাছিল বুলি কয় বাংলাদেশীকেইটাই। পাছত মেঘালয়ৰ মাজেৰে অসমত প্ৰৱেশ কৰি নিউ বঙাইগাঁও ৰে'ল ষ্টেছনলৈ আহে আৰু ৰে'লেৰে চেন্নাইলৈ যোৱাৰ পৰিকল্পনা কৰে ধৃত বাংলাদেশীকেইটাই।

মঙলবাৰে নিউ বঙাইগাঁও ষ্টেছনত আৰক্ষীৰ হাতত গ্ৰেপ্তাৰ পা হোৱা অবৈধ বাংলাদেশীকেইটা ক্রমে- বাবু শ্বেখ, আশ্বাফুল হক, আলামিন আলী, মামুন শ্বেখ, মহম্মদ আলী, ৰুহুল আমিন, মুশ্বাৰফ আলী, আশাৰুল হক বুলি জানিব পৰা গৈছে। সম্প্রতি বঙাইগাঁও আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে। ইপিনে অসমত অবৈধভাৱে বাংলাদেশৰ নাগৰিকে প্ৰৱেশ কৰাৰ তথ্য লাভ কৰাৰ পাছতে তীব্র প্রতিক্রিয়া প্রকাশ কৰে জাতীয় সংগঠনৰ নেতাসকলে। ভাৰতৰ নিৰাপত্তা ব্যৱস্থাৰ সুৰুঙাক লৈ প্রশ্ন উত্থাপন কৰে সচেতন ৰাইজে। ৰাজ্যত তথা ভাৰতত দৈনিক এনেদৰে বাংলাদেশৰ লোকে প্ৰৱেশ কৰাৰ ঘটনাত উদ্বিগ্নতা প্রকাশ কৰাৰ লগতে নিৰাপত্তা ব্যৱস্থা কটকটীয়া কৰিবলৈ দাবী জনায় কেন্দ্রীয় আৰু ৰাজ্য চৰকাৰক।

Share This