ডিজিটেল ডেস্ক: অসমীয়া ভাষা-সাহিত্য-সংস্কৃতিৰ বিকাশৰ এছোৱা দীঘলীয়া কালৰ সংগ্ৰামৰ ক্ষেত্ৰত অসম সাহিত্য সভাৰ এক গুৰুত্বপূৰ্ণ ভূমিকা আছে আৰু ইয়াক কোনেও অস্বীকাৰ নকৰে। সেইদৰে ধৃষ্টতা নাই অসম সাহিত্য সভাৰ যোগেদি অসমৰ পুৰোধা সাহিত্যিকসকলে আগবঢ়োৱা অৱদানক নস্যাৎ কৰাৰ। কিন্তু শতবৰ্ষৰ পূর্বে যি বৌদ্ধিক আৰু সামাজিক পৰিৱেশত অসম সাহিত্য সভাৰ জন্ম হৈছিল সেই পৰিৱেশ এতিয়া সলনি হৈছে। প্রশ্ন উঠিছে সভাৰ প্ৰাসংগিকতাক লৈয়ো। বিগত দীর্ঘদিনত সভাৰ অধিৱেশনৰ মেলামুখিতাৰ পৰা আৰম্ভ কৰি সভাপতি নির্বাচনলৈকে অজস্র সৰু-বৰ বিতৰ্কত সোমাই অসম সাহিত্য সভাই তাৰ মর্যাদা হেৰুৱাইছে। এইবোৰ কথা অপ্রিয় হ'লেও সত্য, দুখেৰে স্বীকাৰ কৰিবলগীয়া কথা। এনে প্রেক্ষাপটতে পাঠশালাত আৰম্ভ হৈছে অসম সাহিত্য সভাৰ সপ্তসপ্ততিতম দ্বি-বার্ষিক অধিৱেশন।
আশাৰ কথাটো হৈছে সভাৰ নৱনির্বাচিত সভাপতি ড° বসন্ত কুমাৰ গোস্বামীয়ে বিভিন্ন প্রসংগত ইতিমধ্যেই সভাৰ মৰ্যাদাৰ স্খলনৰ সত্যক স্বীকাৰো কৰিছে। অর্থাৎ তেওঁ সেই বিষয়ে জ্ঞাত। আনহাতে, তেওঁ একালত সভাৰ প্ৰধান সম্পাদকৰ দায়িত্ব পালন কৰাৰ উপৰি দীৰ্ঘদিন ধৰি সভাৰ সৈতে তৃণমূল পৰ্যায়ৰ পৰা জড়িত, যাৰ বাবে সাহিত্য সভাৰ তলা-নলা তেওঁৰ নখ দর্পণত বুলি ভবাৰ সুবিধা আছে। এনে পৰিপ্ৰেক্ষিতত অসম সাহিত্য সভাপ্রেমী অনেকেই নতুন সভাপতিলৈ আশাৰে বাট চাইছে। নিঃসন্দেহে এই আশাক সন্মান জনোৱা আৰু সভাৰ হৃত মৰ্যাদা ওভতাই আনি অসমৰ সাহিত্য-সংস্কৃতিৰ জগতত অসম সাহিত্য সভাক প্ৰাসংগিক কৰি ৰাখিব পৰাটোৱেই এই মুহূৰ্তত সভাপতিৰ প্ৰধান প্রত্যাহ্বান। এই প্রত্যাহ্বানৰ তেওঁ কেনেকৈ মোকাবিলা কৰে সেয়া অসমবাসীয়ে নিশ্চয় চকু দিব।
ইতিমধ্যে বিভিন্ন সাক্ষাৎকাৰত তেওঁ এই মর্যাদা উদ্ধাৰৰ বাবে তেওঁৰ পৰিকল্পনা আৰু আঁচনিৰ আভাস দিছে, তেওঁৰ অভিভাষণতো উল্লেখ কৰিছে। প্রকৃত সাহিত্যকর্মীক সভাত স্থান দিয়া, নতুন প্ৰজন্মক সভালৈ আদৰা, শিপা খামুচিও আধুনিক তথ্য-প্রযুক্তিৰে প্ৰাসংগিক হোৱা আদি নানান কথাৰে তেওঁ যোগাত্মক চিন্তাৰ ঢল বোৱাইছে। সভাপতিৰ অভিভাষণত তেওঁ কৈছে-'আমি অনুভৱ কৰোঁ অসম সাহিত্য সভাক সাহে-পিতে গদাধৰ কৰাৰ এয়া সময়। সভাই অতীত ঐশ্বৰ্যৰ সঁফুৰা মেলি হনুমন্তীয় শক্তিৰে পুনৰ অপৰাজেয় সংগ্ৰাম চলোৱাৰ সময় সমাগত।' এইখিনিৰ লগতে তেওঁ আৰু এটি তাৎপর্যপূর্ণ মন্তব্য কৰিছে। তেওঁ কৈছে, 'সভাৰ মূল বিষয়ববীয়াসকল সাহিত্য-সংস্কৃতিৰ একোগৰাকী নমস্য ব্যক্তি হোৱাটো সকলোৱে বিচাৰে। ইয়াক ডেই যোৱাৰ বাবেই সভাৰ প্ৰাসংগিকতাক লৈ ৰাইজে প্রশ্ন কৰিবলৈ বাধ্য হৈছে। মূল বিষয়ববীয়াসকলক মনোনীত বা নির্বাচন কৰোঁতে সেৱকৰ বাবে বাট এৰি দিবলৈ অনুৰোধ জনালোঁ। সাহিত্য আৰু সাহিত্য সভাৰ বিষয়ে জ্ঞান নোহোৱা তৃণমূল পৰ্যায়ত কাম কৰাৰো অভিজ্ঞতা নথকা ভাষা-সাহিত্য-সংস্কৃতিৰ প্ৰতি প্রেমকান্ত নোহোৱা, শিষ্টাচাৰ, বিনয়বৰ্জিত লোকক প্রধান সম্পাদকৰ আসনখন আগবঢ়ালে সভা বর্তি থাকিবনে?' সভাপতিৰ এই কথাখিনি সভাপ্রেমী যিকোনো লোকক আশ্বস্ত কৰিব পৰা, সভাৰ ব্যাধিৰ সঠিক ৰোগ নিৰূপণ হৈছে বুলি ভাবিব পৰা।সভাপতিগৰাকীয়ে আৰু কৈছে- 'শালগ্রামক মাটিত থৈ নটিনীক বৰপীৰাখন নিদিলেই সভা শৃংখলিত হ'ব। সভাৰ প্ৰস্তাৱনাৰ সেই আমোঘ বাক্যটি হ'ল- সকলোৰে উমৈহতীয়া সামাজিক স্বাৰ্থত নিষ্ঠাৰে কাম কৰিব নোৱাৰিলে সভাৰ প্ৰাসংগিকতা নাথাকিব।'পতিয়ন যাব পৰাকৈ অনুভৱ হয় যে অসম সাহিত্য সভাৰ-ব্যাধিক সঠিক ৰূপেই নিৰূপণ কৰিছে নতুন সভাপতিয়ে। এতিয়া প্রশ্ন হ'ব- ধন্বন্তৰি ৰূপে তেওঁৰ পদক্ষেপসমূহ কি ধৰণৰ হ'ব আৰু কিমান সুদূৰপ্ৰসাৰী হ'ব? প্ৰসংগতে উনুকিয়াই যাব পাৰি সভাৰ বিগত দিনৰ ইতিহাসত এক অনাকাংক্ষিত পৰম্পৰা চকুত পৰে। সেয়া হ'ল- একোজন নতুন সভাপতিয়ে দায়িত্ব গ্রহণ কৰি কেতবোৰ অভিলাষী আঁচনিৰ কথা ঘোষণা কৰে, সেই দিশত দুই-এটা কামো কৰে আৰু অৱশেষত আঁচনি সম্পূর্ণ নোহোৱাকৈয়ে দায়িত্ব সামৰে। পৰৱৰ্তী নতুন সভাপতিয়েও তদ্রুপ গতিত দায়িত্ব লৈ নিজৰ আঁচনিৰে আগবাঢ়ে আৰু পূৰ্বৰজনে গ্ৰহণ কৰা আঁচনি আধৰুৱা, অসমাপ্ত হৈয়ে পৰি ৰয়। সভাৰ বৃহৎ অসমীয়া অভিধান প্রকল্প, বিশ্বকোষ প্রকল্প, পৃথিৱীৰ লোক কাহিনী প্রকল্প, অনুবাদ প্রকল্প- এনে অলেখ আধৰুৱা প্ৰকল্পৰ উদাহৰণ। এই কামৰ গতিৰ ধাৰাবাহিকতা নোহোৱাটোৱে সভাৰ বৌদ্ধিক গৰিমা হ্রাস হোৱাৰ অন্যতম কাৰণ ৰূপে বিবেচিত হ'বৰ যোগ্য। নতুন সভাপতিয়ে এই দিশসমূহলৈয়ো চকু দিয়াটো ৰাইজে বাঞ্ছা কৰে।
শতবর্ষ গৰকা অসম সাহিত্য সভাই কেতিয়াবাই লাভ কৰিছে জাতীয় অনুষ্ঠানৰ মৰ্যাদা। সাহিত্যৰ অনুষ্ঠান এটাই জাতীয় অনুষ্ঠানৰ মৰ্যাদা পোৱাটো কম গুৰুত্বপূৰ্ণ কথা নহয়। ই অসমীয়া মানুহৰ ৰুচি আৰু বৌদ্ধিক চেতনাকো প্রতিফলিত কৰে। সেয়ে তেনে অনুষ্ঠানৰ মৰ্যাদা হানি হোৱা কথাটোৱে শুভচিন্তক প্রতিজন অসমীয়াক ব্যথিত কৰাই স্বাভাৱিক। এনে প্রেক্ষাপটত সভাপ্রেমী প্রতিজন অসমীয়াই গভীৰ আস্থা আৰু আশাৰে চাইছে ড° বসন্ত কুমাৰ গোস্বামী নেতৃত্বাধীন অসম সাহিত্য সভালৈ। অসমবাসী যেন নিৰাশ হ'ব লগা নহয় সভাই ওভতাই পাওক পূৰ্বৰ গতি আৰু মর্যাদা- সেয়াই এতিয়া সকলোৰে আন্তৰিক প্রত্যাশা।