সৌন্দর্যবর্ধন ন-ৰূপ দিছে শিৱসাগৰৰ বৰপুখুৰীক

dainik janambhumi June 12, 2026

ডিজিটেল ডেস্ক : অসমৰ ইতিহাস, সংস্কৃতি আৰু স্থাপত্য ঐতিহ্যৰ অন্যতম উজ্জ্বল নিদর্শন ঐতিহাসিক শিৱসাগৰ বৰপুখুৰীক নতুন ৰূপত গঢ়ি তোলাৰ লক্ষ্যৰে চলি থকা সৌন্দর্যবর্ধনৰ কাম পূর্ণগতিত অব্যাহত আছে। অসম চৰকাৰে এই ঐতিহ্যমণ্ডিত স্থানটোৰ সংৰক্ষণ, উন্নয়ন আৰু পৰ্যটন সম্ভাৱনাৰ বিকাশৰ বাবে ইতিমধ্যে বহু কোটি টকাৰ পুঁজি আবণ্টন দিছে। উন্নয়নমূলক কাম সম্পূৰ্ণ হোৱাৰ পাছত বৰপুখুৰী আৰু ইয়াৰ পার্শ্বৱর্তী ঐতিহাসিক অঞ্চল সমগ্ৰ উত্তৰ-পূৰ্বাঞ্চলৰ এক অন্যতম আকর্ষণীয় পর্যটন কেন্দ্র হিচাপে গঢ় লৈ উঠিব বুলি আশা কৰা হৈছে। 

শিৱসাগৰ চহৰৰ হৃদয়স্থলীত অৱস্থিত বৰপুখুৰী কেৱল এটা বৃহৎ জলাশয়েই নহয়, ই আহোম সাম্ৰাজ্যৰ স্থাপত্য দক্ষতা, পৰিকল্পনা আৰু সাংস্কৃতিক সমৃদ্ধিৰ এক জীৱন্ত সাক্ষী। ১৭৩৪ চনত আহোম স্বৰ্গদেউ শিৱসিংহৰ পত্নী ৰাণী অম্বিকাই এই বিশাল পুখুৰী খনন কৰাইছিল। জনশ্রুতি অনুসৰি, ৰাজ্যৰ জনসাধাৰণৰ পানীৰ সুবিধা নিশ্চিত কৰাৰ লগতে এক স্থায়ী ঐতিহ্য সৃষ্টি কৰাৰ উদ্দেশ্যে এই পুখুৰী নিৰ্মাণ কৰা হৈছিল। পুখুৰীটোৰ আয়তন প্রায় ১২৯ একৰ আৰু ইয়াৰ পানী বছৰৰ সকলো সময়তে একে স্তৰত থকাৰ বাবে ই বিশেষভাৱে পৰিচিত। বৰপুখুৰীৰ পূব পাৰত অৱস্থিত অসমৰ বিশ্ববিখ্যাত তিনিটা দ'ল-শিৱদ'ল, দেৱীদ'ল আৰু বিষ্ণুদ'ল-এই অঞ্চলৰ ঐতিহাসিক আৰু ধর্মীয় গুৰুত্ব বহুগুণে বৃদ্ধি কৰিছে। ইয়াৰে শিৱদ'লক উত্তৰ-পূৰ্বাঞ্চলৰ সৰ্বোচ্চ শিৱ মন্দিৰ হিচাপে গণ্য কৰা হয়। 

প্ৰতিবছৰে মহা শিৱৰাত্ৰি আৰু অন্যান্য ধর্মীয় উৎসৱৰ সময়ত হাজাৰ হাজাৰ ভক্ত আৰু পৰ্যটকৰ সমাগমে এই অঞ্চল মুখৰিত কৰি তোলে। বর্তমান চলি থকা সৌন্দর্যবর্ধন প্ৰকল্পৰ অধীনত পুখুৰীৰ চৌপাশৰ পৰিৱেশ অধিক সুশৃংখল আৰু আকর্ষণীয় কৰি তোলাৰ বাবে বিভিন্ন কাম ৰূপায়ণ কৰা হৈছে। ইয়াৰ ভিতৰত আধুনিক আলোকসজ্জা ব্যৱস্থা, খোজকঢ়া পথ, উদ্যানীকৰণ, বহাৰ স্থান, সৌন্দর্যবর্ধক গছ-গছনি ৰোপণ, পৰ্যটকৰ বাবে বিশ্রামাগাৰ, উন্নত নিষ্কাশন ব্যৱস্থা, সুৰক্ষা ব্যৱস্থা আদি অন্তর্ভুক্ত। বিশেষকৈ নিশাৰ সময়ত বৰপুখুৰী আৰু দ'লসমূহক অধিক মনোমোহা ৰূপত উপস্থাপন কৰাৰ বাবে আধুনিক আলোকসজ্জাৰ ব্যৱস্থা কৰা হৈছে, যিয়ে পর্যটকসকলক এক নতুন অভিজ্ঞতা প্রদান কৰিব। এই বৃহৎ উন্নয়নমূলক কামৰ অগ্রগতি স্থানীয় বিধায়ক অখিল গগৈয়ে নিয়মীয়াকৈ তদাৰক কৰি আহিছে। বিভিন্ন সময়ত কামৰ স্থান পৰিদৰ্শন কৰি তেওঁ সংশ্লিষ্ট বিভাগসমূহক নিৰ্ধাৰিত সময়ৰ ভিতৰত গুণগত মান বজাই ৰাখি কাম সম্পূৰ্ণ কৰাৰ নিৰ্দেশ দিয়ে। ঐতিহাসিক সম্পদৰ মৌলিক বৈশিষ্ট্য অক্ষুণ্ণ ৰাখি আধুনিক সুবিধা সংযোজনৰ বিষয়ত বিশেষ গুৰুত্ব আৰোপ কৰা হৈছে। স্থানীয় ৰাইজ আৰু সচেতন মহলে এই প্রকল্পক আদৰণি জনাইছে। তেওঁলোকৰ মতে, বৰপুখুৰীৰ উন্নয়নে কেৱল পর্যটন খণ্ডকেই শক্তিশালী নকৰিব, ইয়াৰ জৰিয়তে স্থানীয় ব্যৱসায়-বাণিজ্য, হোটেল উদ্যোগ, ক্ষুদ্ৰ ব্যৱসায়ী আৰু হস্তশিল্পৰ লগতো জড়িত বহু লোক উপকৃত হ'ব। লগতে নতুন প্রজন্মই অসমৰ গৌৰৱোজ্জ্বল আহোম ইতিহাস আৰু ঐতিহ্যৰ বিষয়ে অধিক জানিবলৈ সুযোগ লাভ কৰিব। 

অসম চৰকাৰে সাম্প্ৰতিক সময়ত ৰাজ্যৰ ঐতিহাসিক আৰু পর্যটনস্থলীসমূহৰ উন্নয়ন আৰু সংৰক্ষণত বিশেষ গুৰুত্ব আৰোপ কৰিছে। সেই ধাৰাবাহিকতাত শিৱসাগৰ বৰপুখুৰীৰ সৌন্দর্যবর্ধন প্রকল্পক এক গুৰুত্বপূৰ্ণ পদক্ষেপ হিচাপে বিবেচনা কৰা হৈছে। ইতিহাস, সংস্কৃতি, ধর্মীয় ঐতিহ্য আৰু আধুনিক পৰ্যটনৰ এক অনন্য সমন্বয় হিচাপে শিৱসাগৰ বৰপুখুৰীয়ে অদূৰ ভৱিষ্যতে নতুন পৰিচয়েৰে বিশ্বৰ দৃষ্টি আকৰ্ষণ কৰিব বুলি আশাবাদ ব্যক্ত কৰিছে বিভিন্ন মহলে।

Share This