৭৯ বছৰত 'জনমভূমি'

dainik janambhumi March 11, 2025

ডিজিটেল ডেস্ক : অসমৰ ৰাইজৰ আশীৰ্বাদ শিৰত লৈ এক বর্ণিল পৰিক্ৰমাৰে আগবাঢ়ি যোৱা 'জনমভূমি'য়ে (সাপ্তাহিক) সোমবাৰে ৭৯ বছৰত ভৰি থ'লে। ইতিহাসৰ অনেক ঘাত-প্রতিঘাতৰ সাক্ষী 'জনমভূমি'ৰ জন্মদিন উপলক্ষে গুৱাহাটী, যোৰহাট, তিনিচুকীয়া আৰু বঙাইগাঁও কার্যালয়ত এক বিশেষ অনুষ্ঠানৰ আয়োজন কৰা হয়। কে'ক্ কাটি জনমভূমিৰ পৰিয়ালৰ সদস্যসকলে উদযাপন কৰে ঐতিহ্যৰ সংবাহক সাপ্তাহিক জনমভূমিৰ জন্মদিন। 

এই উপলক্ষে গুৱাহাটী কার্যালয়ত জনমভূমি, দৈনিক জনমভূমি তথা প্রাগ নিউজৰ মুখ্য পৰিচালক সঞ্চালক ড° সঞ্জীৱ নাৰায়ণে কে'ক্‌ কাটি কয় যে আজিৰ দিনটো আমাৰ সকলোৰে বাবে এটা বিশেষ দিন। সাপ্তাহিক জনমভূমিয়ে আন এটা নতুন বছৰত ভৰি থ'লে। ৰাইজৰ আশীৰ্বাদত আমি এই যাত্রা অব্যাহত ৰাখিম বুলি জনাই তেওঁ লগতে কয় যে ইমান বছৰ এখন কাকতক ৰাইজে মৰম দিয়াটোৱেই ডাঙৰ কথা। ইতিমধ্যে প্রাগ নিউজেও ২৫ বছৰত ভৰি দিছে। প্রাগ আৰু জনমভূমিৰ এই যাত্ৰাত সকলোৰে তেওঁ সহযোগিতা কামনা কৰে। আনহাতে প্রাগ নিউজৰ মুখ্য সম্পাদক প্রশান্ত ৰাজগুৰুৱে কয় যে আমাৰ শৈশৱৰ লগৰী আছিল সাপ্তাহিক জনমভূমি। সেই সময়ত যোৰহাটত সাপ্তাহিক জনমভূমি কিনিবলৈ মানুহৰ লানি লাগিছিল। তেতিয়াৰে পৰাই জনমভূমিয়ে উজনিৰ ৰাইজৰ এক সুকীয়া মৰম-চেনেহ লাভ কৰি আহিছে। এই দীর্ঘ সময়ছোৱাত বহু কাকত ওলাল, বহু মৰিল, কিন্তু সাপ্তাহিক জনমভূমিয়ে নিজৰ বিজয়ৰ যাত্রা অব্যাহত ৰাখিছে। 

অনুষ্ঠানত সাপ্তাহিক জনমভূমিৰ সম্পাদক তথা দৈনিক জনমভূমিৰ কাৰ্যবাহী সম্পাদক সঞ্জীৱ কুমাৰ ফুকনে অসমৰ ৰাইজৰ মৰম- আশীৰ্বাদ শিৰত লৈ জনমভূমি গোষ্ঠী আগবাঢ়ি যাব বুলি জনাই কয় যে এই যাত্ৰাত সকলো আমাৰ সহযোগী হওক। আমি সকলোকে লগত লৈ অসম আৰু অসমীয়াৰ স্বাৰ্থত আগবাঢ়ি যাম। উল্লেখযোগ্য যে আজিৰ অনুষ্ঠানত প্ৰাগ নিউজৰ কাৰ্যবাহী সম্পাদক দেৱজিত ভূঞাৰ লগতে জনমভূমিৰ প্ৰকাশক চন্দ্ৰশেখৰ শৰ্মাসহ জনমভূমি গোষ্ঠীৰ সকলো কৰ্মচাৰী উপস্থিত থাকে।

Share This