আই পি এলঃ ৰাহুল-ষ্টাবছৰ অৰ্ধশতৰান, উত্তেজনাপূর্ণ মেচত দিল্লীয়ে হৰুৱালে আৰ চি বিক

dainik janambhumi April 19, 2026

ডিজিটেল ডেস্ক: দিল্লী কেপিটেলছে কালি অনুষ্ঠিত আই পি এলৰ এখন উত্তেজনাপূর্ণ মেচত ৰয়েল চেলেঞ্জাৰ্ছ বেংগালুৰুক (আৰ চি বি) ছয় উইকেটত পৰাজিত কৰে। 

মেচখনত দিল্লীক জয়ৰ বাবে অন্তিম অ'ভাৰটোত প্রয়োজন হৈছিল ১৫ ৰানৰ। ডেভিড মিলাৰে একেৰাহে দুটা ছয় আৰু এটা চাৰি মাৰি এটা বল বাকী থকা অৱস্থাত দলক জয়ী কৰোৱায়। টছত পৰাজিত হৈ প্রথমে বেটিং কৰা আৰ চি বিয়ে নির্ধাৰিত ২০ অ'ভাৰত ৮ উইকেট হেৰুৱাই ১৭৫ ৰান কৰে। প্ৰত্যুত্তৰত দিল্লীয়ে ১৯.৫ অ'ভাৰত ৪ উইকেট হেৰুৱাই ১৭৯ ৰান সংগ্ৰহ কৰি ছয় উইকেটত জয়লাভ কৰে। 

দিল্লীয়ে ইয়াকে ধৰি তিনিখন মেচত জয়ী হৈ পইণ্টৰ তালিকাত চতুর্থ স্থানলৈ আগবাঢ়ে। আনহাতে আৰ চি বি ৮ পইন্টেৰে দ্বিতীয় স্থানত আছে। আৰ চি বি এতিয়ালৈকে ৬খন মেচৰ চাৰিখনত জয়ী আৰু দুখনত পৰাজিত হৈছে। 

১৭৬ ৰানৰ জয়ৰ লক্ষ্য থকা দিল্লীৰ আৰম্ভণি আছিল হতাশাজনক। দিল্লীয়ে প্রথম তিনিটা অ'ভাৰতে মাত্র ১৮ ৰানত পাথুম নিশাংক, কৰুণ নায়াৰ আৰু সমীৰ ৰিজভীৰ উইকেট তিনিটা হেৰুৱায়। তিনিওটা উইকেট দখল কৰে ভুৱনেশ্বৰ কুমাৰে। অৱশ্যে আনটো এণ্ডত অ'পেনাৰ কে এল ৰাহুলে ধৈর্যসহকাৰে খেলে আৰু অর্ধশতৰান সম্পূর্ণ কৰে। তেওঁ ৩৪টা বলত ৬টা চাৰি আৰু ২টা ছয়েৰে ৫৭ ৰান কৰে। তেওঁ ট্রিষ্টান ষ্টাবছৰ সৈতে মিলি চতুর্থ উইকেটত ৬৯ ৰান সংগ্ৰহ কৰে। ষ্টাব্‌ছে ৪৭টা বলত ৪টা চাৰি আৰু ১টা ছয়েৰে ৬০ ৰান কৰে। আনহাতে অধিনায়ক অক্ষৰ পেটেল ২৬ ৰানত আৰু ডেভিড মিলাৰ ২২ ৰানত অপৰাজিত হৈ থাকে। 

ইয়াৰ আগতে প্রথমে বেটিং কৰি আৰ চি বিয়ে অ'পেনাৰ ফিল ছল্টৰ ৩৮টা বলত ৪টা চাৰি আৰু ৩টা ছয়েৰে কৰা ৬৩ ৰানৰ সহায়ত ৮ উইকেট হেৰুৱাই ১৭৫ ৰান সংগ্ৰহ কৰে। টিম ডেভিডে ২৬, বিৰাট কোহলীয়ে ১৯, দেৱদত্ত পডিক্কলে ১৮ ৰান কৰে।

Share This