দিল্লীৰ নিৰ্মাণ শ্রমিক হ'লগৈ মাৰাথন দৌৰৰ চেম্পিয়ন

dainik janambhumi September 12, 2025

ডিজিটেল ডেস্কঃ দিল্লীৰ এখন নির্মাণস্থলীত কঁকালত ইটা বান্ধি ৰোহিত কুমাৰ নামৰ নিৰ্মাণ শ্রমিকজনক কেতিয়াবা কেতিয়াবা দৌৰি থকাৰ দৃশ্য প্রত্যক্ষ কৰা গৈছিল। বিহাৰৰ খাগৰিয়াৰ বাসিন্দা ৰোহিতে আন নির্মাণ শ্রমিকৰ দৰেই নির্মাণস্থলীত জীৱন যুদ্ধ চলাই আছিল। কিন্তু ৰোহিত কুমাৰৰ আন এটা পৰিচয়ো আছে।

তেওঁ এজন মাৰাথন দৌৰবিদো। ৩২ বছৰীয়া দৌৰবিদজনে কমেও ৭খন মাৰাথন দৌৰ প্ৰতিযোগিতাত শ্রেষ্ঠত্ব অর্জন কৰিছে। লক্ষ্ণৌ, ডেৰাডুন আৰু প্রয়াগৰাজত অনুষ্ঠিত হোৱা মাৰাথন দৌৰ প্ৰতিযোগিতাত তেওঁ প্রথম স্থান দখল কৰিছিল। শেহতীয়াকৈ আগষ্ট মাহত হিমাচলৰ স্পিটিত সবাতোকৈ উচ্চতাত হোৱা মাৰাথনত ৰোহিত কুমাৰে দ্বিতীয় স্থান দখল কৰি সকলোকে আচৰিত কৰি তুলিছিল। আনকি ভাৰতীয় সেনাই তেওঁৰ দক্ষতা দেখি প্রশংসা কৰিছিল।

সেনাৰ উত্তৰ ভাৰত শাখাই 'এক্স'ত কৈছিল যে দিল্লীৰ এজন নির্মাণ শ্রমিকে অভিলেখ বা স্পনছৰশ্বিপৰ পাছত নগৈ এক অসাধ্য সাধন কৰি দেখুৱালে। কোনো প্রশিক্ষক, যাৱতীয় সাজ-সজ্জা নোহোৱাকৈ দুর্গম অঞ্চলত হোৱা মাৰাথন দৌৰ প্রতিযোগিতাত এইজন সাধাৰণ নিৰ্মাণ শ্রমিকে অসাধাৰণ কাৰ্য সম্পাদন কৰিলে। উল্লেখযোগ্য যে এমাহত গড়ে ৫খনকৈ মাৰাথন দৌৰত অংশ লোৱা কুমাৰে এতিয়ালৈকে ১০০খন মাৰাথন দৌৰ প্রতিযোগিতাত অংশ লৈছে। স্পিটিত ভাৰতীয় সেনাই আয়োজন কৰা মাৰাথন দৌৰ প্রতিযোগিতাত তেওঁ ৭.৪৮.৫২ ঘণ্টাত লক্ষ্যস্থান অতিক্ৰম কৰি ৰাৰ্নাছ আপ হয়। বিজয়ী নিখিল সিঙে ৭.৪২.৪৪ ঘণ্টা সময় লৈছিল।

Share This