দিল্লীৰ নিৰ্বাচন

Dainik janambhumi February 05, 2025

ডিজিটেল ডেস্ক: দিল্লী বিধানসভাৰ আজি নির্বাচন। স্বাভাৱিকতেই কেৱল দিল্লীয়েই নহয়, সমগ্ৰ দেশৰ আগ্রহী লোকৰ কৌতূহল- অৰবিন্দ কেজৰিৱাল-নেতৃত্বাধীন 'আপ'ৰ চৰকাৰখন ওফৰাবলৈ এইবাৰ বিজেপি সক্ষম হ'বনে? কংগ্ৰেছৰেই বা ফলাফল কেনেকুৱা হ'ব? আজিকালি নিৰ্বাচনৰ ৰূপৰ পৰিৱৰ্তন ঘটিছে। সামাজিক জটিলতাবোৰ বৃদ্ধি পাই যোৱাৰ পৰিপ্ৰেক্ষিতত ভোটাৰৰ আচৰণো অতি জটিল হৈ পৰিবলৈ লৈছে। 'এগজিট প'ল'বিলাকেও ভোটাৰৰ মন ধৰিব নোৱৰা হৈছে, সেয়েহে আজিকালি 'এগজিট প'ল'ৰ পূর্বানুমান প্রায়ে হুবহু মিলা দেখা নাযায়। হাৰিয়ানাৰ বিধানসভাৰ নির্বাচনত কংগ্রেছ বিপুল সংখ্যাগৰিষ্ঠতাৰে জয়ী হ'ব বুলি বহু ৰাজনৈতিক পর্যবেক্ষকে ধাৰণা কৰিছিল; এগজিট প'লতো তেনেকৈয়ে কোৱা হৈছিল। কিন্তু ফলাফল সম্পূর্ণ ওলোটা হ'ল; বিজেপিয়েহে তাত বিশাল বিজয় সাব্যস্ত কৰিবলৈ সক্ষম হ'ল। সেয়েহে দিল্লীতো কি হ'ব সেই কথা ন-দি ক'ব পৰা অৱস্থাত নাথাকিলেও 'আপ'-এই পুনৰ শাসনাধিষ্ঠিত হোৱাৰেই সম্ভাৱনা প্রবল বুলি নিৰ্বাচনটোৰ ওপৰত দৃষ্টি ৰখা বহুতৰে ধাৰণা। 

জিকা-হৰা কি হয় পিছৰ কথা, কিন্তু বিজেপিৰ পৰা পাই থকা উপর্যুপৰি হেঁচাৰ পাছতো কেজৰিৱাল আৰু অৱশিষ্ট অন্য নেতা-কর্মীসকলে এতিয়াও 'আপ'ক যুঁজাৰু শক্তিৰ ৰূপত টিকাই ৰাখিবলৈ সক্ষম হোৱাটো আজিৰ ৰাজনৈতিক পৰিৱেশ-পৰিস্থিতিত লক্ষণীয় কথা। ২০১২ চনৰ পৰিৱেশলৈ মনত পেলালেই আজিৰ বহু ৰাজনীতিকতকৈ কেজৰিৱালৰ পার্থক্যখিনিক অনুধাৱন কৰিব পাৰি। ডিঙিত এখন সাধাৰণ মাফলাৰ আঁৰি লোৱা অতি সাধাৰণ মানুহজন আন্না হাজাৰেৰ সমান্তৰালকৈ বিখ্যাত হৈ পৰিছিল ভ্ৰষ্টাচাৰ-বিৰোধী আন্দোলনৰ মাধ্যমেৰে। ২০১৫ চনত 'আপ'ৰ গঠনৰ জৰিয়তে কেজৰিৱালে দিল্লীৰ ৰাজনীতিত যি চমক দেখুৱালে তেনে উদাহৰণ দেশৰ ৰাজনীতিত বিৰল।

 ৭০খন আসন বিশিষ্ট বিধানসভাৰ ৬৭খনতেই জয়ী হ'ল কেজৰিৱালৰ দল। এন টি ৰামাৰাৱৰ পাছত কেজৰিৱালেই একমাত্র নেতা, যি নিজাকৈ এটা দল আৰম্ভ কৰি প্ৰথম নির্বাচনতে শাসনাধিষ্ঠিত হ'বলৈ সক্ষম হৈছিল। বহু প্রত্যাহ্বান আহিছে যদিও কেজৰিৱাল ৰৈ যোৱা নাই। বাৰম্বাৰ দিল্লীত ক্ষমতাধিষ্ঠিত হৈছে তেওঁৰ দল, পঞ্জাবলৈও সম্প্ৰসাৰিত হৈছে 'আপ'ৰ ক্ষমতাৰ পৰিসৰ। দিল্লীৰ পৰা আৰম্ভ কৰা ৰাজনৈতিক পৰিক্ৰমাক বিস্তাৰ কৰি 'আপ'ৰ উত্তৰণ ঘটিছে ৰাষ্ট্ৰীয় দললৈ। পৰিৱৰ্তিত সময়ত কেজৰিৱালক লৈ বহু নেতিবাচক কথাৰো চর্চা নোহোৱাকৈ থকা নাই। সুৰানীতিক লৈ তেওঁৰ তথা তেওঁৰ দলৰ কেইবাজনো নেতাৰ বিৰুদ্ধে গোচৰ ৰুজু হৈছে; তেওঁ বহু দিন জে'লত কটাবলগা হৈছে। গোচৰ এতিয়াও চলি আছে। তদুপৰি একালৰ বহু ঘনিষ্ঠ সতীর্থই কেজৰিৱালক স্বৈৰাচাৰী বুলি দোষাৰোপ কৰি তেওঁৰ লগ এৰিছে; দলটোৰ গণতান্ত্রিক ভেটি শক্তিশালী হ'বলৈ নিদিয়ে আৰু দলটোৰ কোনো ৰাজনৈতিক দর্শন নাই বুলিও অভিযোগ আছে। কিন্তু শাসনত থকা অৱস্থাত কেজৰিৱালে এনে কিছুমান কাম কৰিছে, যিবিলাকে দিল্লীত কেজৰিৱাল তথা আপৰ পোতন অস্বীকাৰ কৰিব নোৱৰাকৈ মজবুত কৰি ৰাখিছে। মহল্লা ক্লিনিক, উন্নতমানৰ চৰকাৰী স্কুল, বিনামূলীয়া বিজুলী আদি কামবোৰে আপ চৰকাৰৰ জনপ্ৰিয়তা ধৰি ৰাখিছেই তদুপৰি যোৱা ১১টা বছৰত দিল্লীৰ ৰাজহুৱা পৰিবহণ ব্যৱস্থাটোলৈ চৰকাৰখনে বৈপ্লৱিক পৰিৱৰ্তন আনিবলৈ সক্ষম হৈছে।

 পূৰ্বৰ কংগ্ৰেছ চৰকাৰে দিল্লীত মেট্ৰ' ৰে'ল সেৱাৰ সূচনা কৰিছিল। ২০১৫ বর্ষলৈকে তাত ১৪৩টা মেট্র' ৰে'ল ষ্টেছন আছিল আৰু এই সেৱাই সামৰিছিল ১৯৩ কিঃমিঃ, কিন্তু আপৰ দিনত মেট্ৰ' ষ্টেছন বৃদ্ধি হ'ল ২৮৯টালৈ, সামৰা দৈর্ঘ্য বৃদ্ধি পালে ৩৯৫ কিঃমিঃলৈ। ৰাজহুৱা পৰিবহণৰ বাবে দিল্লীত যোৱা দশকটোত প্রায় ১০ হাজাৰ নতুন বাছৰ সংযোজন ঘটিল। ইয়াৰে ৮০ শতাংশই ইলেক্ট্রিক বাছ। চলিত বৰ্ষটোৰ ভিতৰত ২০০০খন নতুন মহল্লা বাছৰ সংযোজনৰ লক্ষ্য আছে চৰকাৰৰ। ইয়াৰ অধিকাংশই শীতাতপ নিয়ন্ত্রণত। দিল্লীক দেশৰ ইলেক্ট্রিক বাহনৰ ৰাজধানী কৰিবলৈ সংকল্প লোৱা 'আপ' চৰকাৰে ৫,৪০০টা চার্জিং ষ্টেছন স্থাপনৰ আঁচনি লৈছে। তদুপৰি ২৪×৭ ঘণ্টাই বিদ্যুৎ সেৱা চৰকাৰৰ সাফল্যৰ অন্য এক স্তম্ভ। ২০১৫ বৰ্ষৰ পৰা তাত ৭,৩০০ কিঃমিঃ পানীৰ পাইপ লাইন বহুৱাই ১০০% জলযোগান সম্ভৱ কৰি তুলিছে। ২২,৭০০ নতুন শ্রেণীকোঠা নির্মাণ, স্কুলবিলাকক বিশ্ব পৰ্যায়ৰ মানসম্পন্ন কৰি তোলা, ৫৫০খন শীতাতপ নিয়ন্ত্রিত মহল্লা ক্লিনিকে চৰকাৰখনৰ সাফল্যক তুলি ধৰিছে। ইয়াৰ বিপৰীতে বিজেপিয়ে 'আপ' আৰু কেজৰিৱালক দুর্নীতিগ্রস্ত বুলি প্রতিপন্ন কৰাত সর্বাধিক গুৰুত্ব দিছে। অসমৰ মুখ্যমন্ত্রী ড° হিমন্ত বিশ্ব শর্মাই দিল্লীত নির্বাচনী প্ৰচাৰ সভাবোৰত কেজৰিৱালে নিজৰ বাসভৱনটো ৰাজস্থানৰ ঐতিহাসিক 'শীশ মহল'ৰ দৰে নিৰ্মাণ কৰা বুলি অভিযোগ কৰিছে। সেয়েহে দিল্লীৰ যুঁজখনক লৈ দেশবাসী কৌতূহলী হৈ পৰিছে। দেশবাসী এটা কথাত পতিয়ন গৈছে যে বিজেপিৰ সৈতে কাঠে কাঠে যুঁজিব পৰা সামর্থ্য কেজৰিৱালৰহে আছে।

Share This