কিয় অভয়াৰণ্যৰ পৰা সংৰক্ষিত বনাঞ্চল হ'ল গড়ভঙা? গুৱাহাটী উচ্চ ন্যায়ালয়ত গোচৰ

dainik janambhumi August 05, 2025

ডিজিটেল ডেস্ক : গুৱাহাটী মহানগৰীৰ গাতে লাগি থকা গড়ভঙাক অভয়াৰণ্যৰ পৰা সংৰক্ষিত বনাঞ্চললৈ ৰাজ্য চৰকাৰে অৱনমিত কৰাৰ সিদ্ধান্তৰ বিৰুদ্ধে কঠোৰ স্থিতি গ্রহণ কৰিছে গুৱাহাটী উচ্চ ন্যায়ালয়ে। সুব্রত তালুকদাৰ নামৰ এজন ব্যক্তিয়ে দাখিল কৰা এখন ৰাজহুৱা স্বাৰ্থজড়িত আৱেদনৰ শুনানি গ্রহণ কৰি ন্যায়ালয়ে সমগ্র বিষয়টো সন্দৰ্ভত ৰাজ্য চৰকাৰক বিতং শপতনামা দাখিলৰ নিৰ্দেশ দিয়ে। সোমবাৰে এই সম্পর্কীয় শুনানি গ্রহণ কৰাৰ সময়ত বন বিভাগে এখন শপতনামা দাখিল কৰিছিল যদিও সেই শপতনামাত সন্তুষ্ট নহ'ল মুখ্য ন্যায়াধীশ আশুতোষ কুমাৰ। 

তেওঁ এই ক্ষেত্ৰত ৰাজ্য চৰকাৰক পুনৰ বিস্তৃতভাৱে শপতনামা দাখিল কৰাৰ বাবে নির্দেশ দি কয় যে চৰকাৰে বন সুৰক্ষা বিষয়টোক গুৰুত্বসহকাৰে লোৱা নাই। উল্লেখযোগ্য যে অসম চৰকাৰে ২০২২ চনৰ ২৮ মাৰ্চত গড়ভঙাক বন্যপ্রাণী অভয়াৰণ্যলৈ উন্নীতকৰণৰ বাবে জাননী জাৰি কৰিছিল। গড়ভঙা আৰু ৰাণী বনাঞ্চলৰ ১১৭ বর্গ কিল'মিটাৰ এলেকা সামৰি গঠন কৰা হৈছিল এই বন্যপ্রাণী অভয়াৰণ্যখন। ইয়াৰ পাছত ২০২৩ চনৰ ২৬ ছেপ্টেম্বৰত ৰাজ্য চৰকাৰখনে পুনৰ গড়ভঙা অভয়াৰণ্যৰ স্বীকৃতি বাতিল কৰে। 

কিন্তু ৰাজ্য চৰকাৰে এই সিদ্ধান্ত গ্রহণ কৰিলে তাৰ কোনো স্পষ্ট উত্তৰ দিয়া নাই। ইফালে, বন্যপ্রাণী অভয়াৰণ্য এখন সংৰক্ষিত বনাঞ্চললৈ অৱনমিত কৰাৰ ক্ষেত্ৰত ৰাজ্য চৰকাৰখনে আইন ভংগ কৰাৰো অভিযোগ উত্থাপন হৈছে। সোমবাৰে আদালতে এই সন্দৰ্ভত আদালতে অহা ২৬ আগষ্টত পুনৰ শুনানি গ্রহণ কৰিব বুলিও জানিবলৈ দিয়ে।

Share This