ইতিহাস সৃষ্টিৰ দিশত মহিলা বিশ্ব কাপ, আই চি চিয়ে ঘোষণা কৰিলে আম্পায়াৰ, বিষয়ববীয়াৰ নাম

dainik janambhumi September 12, 2025

ডিজিটেল ডেস্ক : ভাৰত আৰু শ্রীলংকাই যুটীয়াভাৱে আয়োজন কৰা আই চি চি মহিলা এদিনীয়া বিশ্ব কাপে এইবাৰ আন এক ইতিহাসৰ সৃষ্টি কৰিব। আই চি চিৰ ইতিহাসত প্রথমবাৰৰ বাবে বিশ্ব কাপৰ মেচ পৰিচালনা কৰিবলগীয়া আম্পায়াৰকে ধৰি সকলো বিষয়ববীয়া মহিলা হ'ব। উল্লেখযোগ্য যে মহিলা বিশ্ব কাপ অহা ৩০ ছেপ্টেম্বৰৰ পৰা আৰম্ভ হ'ব। বিশ্ব কাপৰ উদ্বোধনী অনুষ্ঠান তথা উদ্বোধনী মেচ গুৱাহাটীৰ বর্ষাপাৰা ষ্টেডিয়ামত প্ৰথমবাৰৰ বাবে অনুষ্ঠিত হ'ব। উদ্বোধনী মেচত প্রতিদ্বন্দ্বিতা কৰিব ভাৰত আৰু শ্রীলংকাই। বিশ্ব কাপৰ মেচ পৰিচালনা কৰিবলগীয়া আম্পায়াৰৰ তালিকাত ভাৰতৰ তিনিগৰাকীয়ে স্থান পাইছে। তেওঁলোক হ'ল ক্রমে প্রাক্তন খেলুৱৈ বৃন্দা ৰাঠি, এন জননী আৰু গায়ত্রী বেণুগোপালন। ইফালে চাৰিজনীয়া মেচ ৰেফাৰীৰ
তালিকাত ভাৰতৰ প্ৰাক্তন ক্রিকেটাৰ জি এছ লক্ষ্মীৰ নামো আছে। 

আই চি চিয়ে প্রকাশ কৰা অনুসৰি ক্লেয়াৰ পল'টেক জেকলিন উইলিয়ামছ আৰু ছু ৰেডফর্নে তৃতীয়বাৰৰ বাবে বিশ্ব কাপত আম্পায়াৰিং কৰিব। আনহাতে লৰেন এজেনবেগ আৰু কিম কাটনে দ্বিতীয়বাৰলৈ খেলপথাৰত মেচ পৰিচালনা কৰিব। আই চি চিৰ অধ্যক্ষ জয় শ্বাহে কয় যে বিশ্ব কাপৰ মেচ বিষয়ববীয়াৰ পেনেলত কেৱল মহিলাৰ নাম অন্তর্ভুক্ত কৰাটো এক ডাঙৰ সফলতা। ইয়াৰ লগতে আই চি চিয়ে লিংগ সমতা বৃদ্ধিৰ বাবে লোৱা
সিদ্ধান্তক ই প্রতিফলিত কৰিছে। 

উল্লেখযোগ্য যে বিশ্ব কাপৰ মেচসমূহ ভাৰত আৰু শ্রীলংকাৰ আঠটা স্থানত অনুষ্ঠিত হ'ব। বিশ্ব কাপৰ মেচ ৰেফাৰী: ট্রুডি এণ্ডাৰছন, শ্বেন্ড্রে ফ্রিটজ, জি এছ লক্ষ্মী, মিচেল পেৰেৰা। আম্পায়াৰসকল-লৰেন এজেনবার্গ, কেণ্ডেছল ব'র্ডে, কিম কাটন, ছাৰা দম্বনেৱানা, ছাতিৰা জাকিৰ জেচি, কেৰিন ক্লাষ্টে, এন জননী, নিমালি পেৰেৰা, ক্লেয়াৰ পল'চেক, বৃন্দা ৰাঠি, ছু ৰেডফর্ন, এলোইচ শ্বেৰিডন, গায়ত্রী বেণুগোপালন, জেকলিন উইলিয়ামছ।

Share This