প্রথম টেষ্টৰ প্ৰথম দিনাই সবল ভাৰত

dainik janambhumi November 15, 2025

ডিজিটেল ডেস্ক : দক্ষিণ আফ্রিকাৰ বিৰুদ্ধে প্রথম টেষ্টত প্রথম দিনাই সবল স্থিতিত উপনীত হৈছে ভাৰত। বেগী বলাৰ যশপ্রীত বুমৰাহৰ (৫-২৭) বিধ্বংসী বলিঙৰ সহায়ত ভাৰতে কালি প্রথম টেষ্টৰ প্রথম দিনা দক্ষিণ আফ্রিকাক প্রথম ইনিংছত মাথোঁ ১৫৯ ৰানতে সীমিত ৰাখে। ২০১২ চনৰ পাছত প্ৰথমবাৰলৈ ৪ গৰাকী স্পীনাৰক লৈ নমা ভাৰতৰ হৈ বুমৰাহে ৯৬টা ইনিংছত ষষ্ঠদশবাৰলৈ ৫টা উইকেট দখলৰ কৃতিত্ব আৰ্জে। 

বুমৰাহৰ চিকাৰ হয় এইডেন মার্কৰাম (৩১), ৰিয়ান ৰিকেলটন (২৩), টনী ডে জৰ্জী (২৪), ছাইমন হাৰ্মাৰ (৫) আৰু কেশৱ মহাৰাজ (০)। প্রথম দিনা দক্ষিণ আফ্রিকাই অৱশ্যে ১০ অ'ভাৰত বিনা উইকেটত ৫৭ ৰান গোটাই শক্তিশালী আৰম্ভণিয়েই কৰিছিল। পিছে বুমৰাহৰ দুৰ্দান্ত বলিঙত তিষ্ঠিব নোৱাৰি দক্ষিণ আফ্রিকাই পৰৱৰ্তী ৪৫ অ'ভাৰত মাথোঁ ১০২ ৰানতে কেউটা উইকেট হেৰুৱায়। 

কেৱল ৪ ঘণ্টা আৰু ১৩ মিনিট বৰ্তি থকা দক্ষিণ আফ্ৰিকাৰ ইনিংছত মাৰ্কৰামে সৰ্বাধিক ৩১ ৰান কৰে। বুমৰাহক যোগ্য সহযোগিতা আগবঢ়ায় পেচাৰ মহম্মদ ছিৰাজ (২-৪৭), আৰু স্পীনাৰদ্বয় কুলদীপ যাদৱ (২-৩৬) আৰু অক্ষৰ পেটেলে (১-২১)। প্রত্যুত্তৰত ভাৰতে প্রথম দিনৰ অৱশিষ্ট সময়খিনিত প্রথম ইনিংছ আৰম্ভ কৰি যশস্বী জয়ছোৱালৰ (১২) উইকেট হেৰুৱাই ৩৭ ৰান সংগ্ৰহ কৰে। দিনান্তত লোকেশ ৰাহুলে ১৩ আৰু ৱাশ্বিংটন সুন্দৰে ৬ ৰানত বেট ধৰি থাকে।

Share This