যুদ্ধৰ সময়ত ইন্ধনক লৈ ৰাইজক চিন্তিত নহ’বলৈ আহ্বান তেল কোম্পানীসমূহৰ

Kakali Deka May 09, 2025

ডিজিটেল ডেস্কঃ ইণ্ডিয়ান অইল কৰ্প'ৰেশ্যন লিমিটেডে সমগ্ৰ দেশৰ লোকসকলক আহ্বান জনাই কয় যে যুদ্ধৰ এই সময়ত আপোনালোকে ইন্ধন কমি যাব বুলি ভয় নাখাব। ইন্ধন কমি যোৱাৰ ভয়ত লৰালৰিকৈ ইন্ধন ক্ৰয় কৰাৰ পৰা বিৰত থাকক। কোম্পানীটোৱে ছ’চিয়েল মিডিয়া প্লেটফৰ্ম টুইটাৰ (বৰ্তমান এক্স)ত এটা প'ষ্ট শ্বেয়াৰ কৰি সকলো আউটলেটতে পেট্ৰল, ডিজেল আৰু এল পি জিৰ পৰ্যাপ্ত মজুত উপলব্ধ হোৱাটো নিশ্চিত কৰিছে। কেৱল ইণ্ডিয়ান অইলেই নহয়, ভাৰত পেট্ৰলিয়াম লিমিটেডেও দেশজুৰি যোগান সুকলমে চলি থকা বুলি নিশ্চিত কৰিছে।

আচলতে তেল বিপণন কোম্পানীৰ এই প'ষ্টটো ছ’চিয়েল মিডিয়াত তেতিয়া দিয়া হৈছিল যেতিয়া বুধবাৰে পঞ্জাবত (বিশেষকৈ সীমান্তৰ সীমান্তৱৰ্তী চহৰবোৰত) মানুহক পেট্ৰল পাম্পত শাৰী পাতি থিয় হৈ নিজৰ বাহন আৰু ইন্ধনৰ পাত্ৰত ইন্ধন ভৰোৱা দেখা গৈছিল। খবৰ অনুসৰি খাদ্য, ঔষধ, এল পি জি গেছ চিলিণ্ডাৰ আদি আন অত্যাৱশ্যকীয় সামগ্ৰী ক্ৰয় কৰিবলৈও বহু লোকে ভিৰ কৰা দেখা গৈছে।

এটা ছ’চিয়েল মিডিয়া প'ষ্টৰ জৰিয়তে দেশৰ অন্যতম বৃহৎ ইন্ধন যোগানকাৰী ইণ্ডিয়ান অইলে স্পষ্ট কৰি দিছে যে তেওঁলোকৰ বিতৰণ নেটৱৰ্ক শক্তিশালী আৰু সুকলমে কাম কৰি আছে। তেল কোম্পানীটোৱে লগতে কয় যে প্ৰতিটো পৰিস্থিতি যাতে কোনো ধৰণৰ ব্যাঘাত নঘটে তাৰ বাবে তীক্ষ্ণ দৃষ্টি ৰাখিছে। পেট্ৰলিয়াম আৰু প্ৰাকৃতিক গেছ মন্ত্ৰ্যালয়ে কোনো সতৰ্কবাণী জাৰি কৰা নাই।

আই অ’ চি এলৰ ছ’চিয়েল মিডিয়া প'ষ্টত লিখিছে, ‘ইণ্ডিয়ান অইলৰ ইন্ধনৰ পৰ্যাপ্ত মজুত সমগ্ৰ দেশতে আছে আৰু আমাৰ যোগান শৃংখল সুচাৰুৰূপে চলি আছে। এনে পৰিস্থিতিত আতংকিত হৈ ক্ৰয় কৰাৰ প্ৰয়োজন নাই আৰু আমাৰ সকলো আউটলেটতে ইন্ধন আৰু এল পি জি সহজে উপলব্ধ। লগতে পেট্ৰল পাম্পত অপ্ৰয়োজনীয় ভিৰ পৰিহাৰ কৰিবলৈ জনসাধাৰণক অনুৰোধ জনাইছে কোম্পানীটোৱে।

উৎস প্ৰাগ নিউজ ডিজিটেল