ইনজেকশ্যনত পানী!

dainik janambhumi July 28, 2025

দৈনিক জনমভূমিঃ স্বাস্থ্য ৰক্ষাৰ বাবে প্ৰয়োগ কৰা ইনজেকশ্যনত জীৱনদায়িনী ঔষধৰ পৰিৱৰ্তে কেৱল বিশুদ্ধ পানীহে আছে বুলি প্রমাণ হ'লে বুজা যায় স্বাস্থ্যখণ্ডৰ কেনে এক ভয়ংকৰ পৰিৱেশত আমি জীৱন যাপন কৰিছোঁ। 

শেহতীয়াভাৱে বজাৰত প্ৰচলিত অতি জনপ্রিয় কিছু ঔষধৰ ১৮৫টা বেছৰ ঔষধ মানবিশিষ্ট নহয় বুলি জনাইছে কেন্দ্ৰই। ইয়াৰ ভিতৰত দুটা ইনজেক্টেবল ঔষধৰ নমুনাত পোৱা গৈছে কেৱল পানী। তদুপৰি বহুল ব্যবহৃত আৰু জনপ্রিয় চাৰিটা ব্ৰেণ্ডৰ জাল ঔষধো ধৰা পৰিছে পৰীক্ষাত। তাৎপৰ্যপূৰ্ণ কথা এই জনপ্রিয় ঔধষসমূহৰ প্ৰস্তুতকৰ্তা অলকেম, জাইডাছ, হেল্থ কেয়াৰ আৰু ছানফার্মাই কেন্দ্রীয় ঔষধ নিয়ন্ত্রক সংস্থাক স্পষ্টকৈ জনাই দিছে এই বেছৰ দৰবখিনি তেওঁলোকে প্ৰস্তুত কৰা নহয়। অর্থাৎ এইটো স্পষ্ট হৈ পৰিল যে কোনো অসাধু ব্যৱসায়ীয়ে এইবোৰ জনপ্ৰিয় ব্ৰেণ্ডৰ ঔষধৰ নকল প্ৰস্তুত কৰি বজাৰত মেলি দিছে।

ঔষধৰ গুণগত মান পৰীক্ষা কৰাৰ বাবে বজাৰৰ পৰা দৰবৰ কিছু নমুনা আনি তাক চৰকাৰী পৰীক্ষাগাৰত পৰীক্ষা কৰা হয়। জুন মাহতো এনে পৰীক্ষা হৈছিল। আৰু তাতেই অন্ততঃ ১৮৫ বেছৰ ঔষধ তেওঁলোকৰ মানৰ পৰীক্ষাত উত্তীৰ্ণ হ'ব পৰা নহয় বা 'নট অব্ ষ্টেণ্ডার্ড কোৱালিটি' বুলি জনালে কেন্দ্রীয় ঔষধ নিয়ন্ত্রক সংস্থা চেন্ট্রেল ড্রাগ ষ্টেণ্ডার্ট কন্ট্রল অর্গেনাইজেশ্যনে। কেন্দ্রীয় ঔষধ নিয়ন্ত্ৰকৰ আপত্তিকৰ ঔষধৰ তালিকাত আছে বেছ কেইটামান অত্যন্ত জনপ্রিয় আৰু বহুল প্রচলিত ঔষধৰ নাম। বমি, গেছ, এন্টিবায় 'টিক, এলার্জী, উচ্চ ৰক্তচাপ, পেইনকিলাৰ আদিৰ দৰে সচৰাচৰ বহু ব্যৱহাৰ হৈ থকা ঔষধ আছে এই অনুত্তীৰ্ণৰ তালিকাত। কিন্তু তাতোকৈ আশ্চর্যজনক কথাটো হ'ল কেঞ্চাৰৰ চিকিৎসাত ব্যৱহৃত ডোচিট্যাস্কেল ইনজেকশ্যনৰ (বেট্‌ছ নম্বৰ ডি এক্স টি-২০২৪১২০৪০) নমুনাত পোৱা গৈছে কেৱল পানী! অর্থাৎ জীৱন-মৰণৰ সৈতে যুঁজ কৰি থকা কোনো ৰোগীয়ে অতি আশাৰে গ্ৰহণ কৰা সেই ইনজেকশ্যনটোত তেওঁক ৰোগ আৰোগ্য কৰিব পৰা কোনো শক্তিয়েই নাই! কি দুর্ভাগ্য!

এই প্রতিবেদনৰ কথা চৰ্চাত থাকোঁতেই শেহতীয়াকৈ সংসদত দাখিল কৰা এক তথ্যই অধিক চাঞ্চল্যৰ সৃষ্টি কৰিছে। কেন্দ্রীয় স্বাস্থ্য মন্ত্রী জে পি নড্ডাই ৰাজ্য সভাত জনোৱা মতে, যোৱা এবছৰত সমগ্ৰ দেশত ঔষধৰ ১,১৬,৩২৩টা নমুনা পৰীক্ষা কৰা হৈছিল। ইয়াৰ ভিতৰত ৩১০৪ বিধ ঔষধ নিৰ্ধাৰিত মানৰ নহয় বুলি তথ্য লাভ কৰা হৈছে। অর্থাৎ এই ঔষধসমূহ সেৱন কৰাৰ উপযুক্ত নহয়। ইয়াৰ ভিতৰত আকৌ ২৪৫ বিধ ঔষধ নকল বুলিও পৰীক্ষাত ধৰা পৰিছে। নড্ডাই অৱশ্যে জনাইছে, এই সময়ছোৱাত নকল আৰু ভেজাল ঔষধ প্রস্তুত কৰাৰ বিৰুদ্ধে ৯৬১টা গোচৰ ৰুজু

কৰা হৈছে। বৃহৎ জনসংখ্যাৰে ভৰা ভাৰতবৰ্ষৰ ঔষধৰ বজাৰখনো বৃহৎ। আকাৰৰ দিশৰ পৰা ই বিশ্বৰ তৃতীয় বৃহৎ আৰু মূল্যৰ দিশৰ পৰা ই বিশ্বৰ ১৪সংখ্যক বৃহৎ বজাৰ। চন পর্যন্ত এই বজাৰে ১৩০ বিলিয়ন ডলাৰৰ সীমা চুবগৈ। এই বৃহৎ বৃহৎ অনুমান কৰা হয় বৰ্তমান ইয়াৰ বজাৰৰ মূল্য ৫০ বিলিয়ন ডলাৰ আৰু ২০৩০ সংখ্যাবোৰে দৰাচলতে বুজায় একাংশ চতুৰ আৰু লুভীয়া বেপাৰীৰ বাবে ভাৰতৰ ঔষধৰ বজাৰখন কেনে লোভনীয়, যাৰ বাবে তেওঁলোকে ভেজাল আৰু নকল দৰবেৰে বৃহৎ মুনাফা লটিবলৈ সদা প্রস্তুত হৈ থাকে। এক প্রতিবেদনত প্রকাশ পোৱা অনুসৰি ভাৰতবৰ্ষৰ বজাৰত বিক্ৰী হৈ থকা ঔষধসমূহৰ ভিতৰত ১২ৰ পৰা ২৫ শতাংশ ঔষধেই হয় নকল নতুবা ভেজাল।

এই কথা বুজাত অকণো অসুবিধা নহয় যে এইধৰণৰ ভেজাল আৰু নকল ঔষধসমূহে স্বাস্থ্যৰ একো উপকাৰতো নকৰেই, বৰঞ্চ, অপকাৰ কৰাৰ আশংকাই সৰহ। স্বাভাৱিকতেই নাগৰিকৰ স্বাস্থ্যৰ প্ৰতি চৰম ভাবুকি এইবোৰ। আকৌ ই চিকিৎসকৰ বিশ্বাসযোগ্যতা আৰু তেওঁৰ দক্ষতাতো প্রশ্ন তুলিবলৈ ৰোগীক বহু সময়ত সুযোগ দিছে। চিকিৎসকে প্ৰেছক্ৰিশ্যনত দৰব লিখিছে, ৰোগীয়ে সেই দৰব খাইছে, কিন্তু ৰোগৰ উপশম পোৱা নাই। স্বাভাৱিকতেই প্রশ্ন উঠে চিকিৎসকজনৰ দক্ষতাক লৈ। কিন্তু কথাৰ গুৰি হয়তো ক'ৰবাত। চিকিৎসকে দৰব ঠিকেই লিখিছে, ৰোগীয়ে অজানিতে ব্যৱহাৰ কৰি আছে ভেজাল বা নকল ঔষধ! ক'ত দিব ঔষধে গুণ-কিন্তু নিশ্চিতভাৱে দিব চিকিৎসকজনক বদনাম!

মুঠৰ ওপৰত চৰকাৰৰ কাঢ়া নজৰ আৰু ব্যাপক পৰীক্ষাৰ বাহিৰে এই ভেজাল-নকল ঔষধৰ পৰা পৰিত্ৰাণ পোৱাৰ উপায় নাই। কাৰণ এয়া কোনো এজন-দুজনৰ চক্ৰ নহয়। এই বৃহৎ চক্রত যে অনেক লোক বিভিন্ন স্তৰত জড়িত আছে সেয়া সহজেই অনুমেয়। সেয়ে মামুলি দুটা-এটা গোচৰ চলাই চৰকাৰে দায় সৰা মন্তব্য দিলে নহ'ব কঠোৰ, দৃষ্টান্তমূলক শাস্তি হ'বই লাগিব।

কাৰণ ভেজাল, নকল দৰবৰ ব্যৱসায় কৰাসকলে নাগৰিকৰ জীৱনক লৈ হেতালি খেলিছে, এয়া সাধাৰণ অপৰাধ নহয়, কাৰোবাক হত্যা কৰিবলৈ চেষ্টা চলোৱা বা হত্যা কৰাৰ সমপৰ্যায়ৰ অপৰাধৰূপে গণ্য হোৱাৰ যোগ্য বুলি ভাবিব পাৰি এই অপৰাধক। সেয়ে এনে অপৰাধীৰ শাস্তি দৃষ্টান্তমূলক

আৰু কঠোৰ হ'ব লাগিব। এনে কাম কৰিবলৈ অপৰাধীয়ে ভয় কৰাৰ পৰিৱেশ ৰচিব লাগিব। চৰকাৰে প্ৰয়োজনত আইন সংশোধনৰ কথাও চিন্তা কৰক। অন্যথা ৰাইজৰ স্বাস্থ্য আৰু জীৱন সদায়েই কোনোবা লুভীয়া, অসৎ ব্যৱসায়ীৰ হাতোৰাত বন্দী হৈ থাকিব।

Share This