ডামাস্কাছত ইজৰাইলৰ শক্তিশালী বিমান আক্রমণ

dainik janambhumi July 17, 2025

ডিজিটেল ডেস্কঃ ইজৰাইলী সামৰিক বাহিনীয়ে ছিৰিয়াত ভয়ংকৰ বিমান আক্রমণ চলায় আৰু দেশখনৰ প্ৰতিৰক্ষা মন্ত্ৰ্যালয়ৰ লগতে ৰাষ্ট্ৰপতি ভৱনৰ সমীপতে শক্তিশালী আক্রমণ সংঘটিত কৰে। দক্ষিণ ছিৰিয়াত ডুজ সম্প্রদায়ক ছিৰিয়াৰ চৰকাৰী বাহিনীয়ে আক্রমণ কৰাৰ প্রতিশোধকল্পে ইজৰাইলী সেনাই ছিৰিয়াৰ ডামাস্কাছত এই আক্রমণ কৰে।

ছিৰিয়াৰ অন্তৱৰ্তী ৰাষ্ট্ৰপতি আহমেদ-আল-শ্বাৰাক জিহাদী হিচাপে অভিহিত কৰি ড্ৰজ সম্প্রদায়ক দক্ষিণ ছিৰিয়াত ছিৰিয়াৰ সেনাৰ পৰা সুৰক্ষা দিয়াৰ বাবেই ইজৰাইলে এই আক্ৰমণ কৰিছে বুলি কয়। ইজৰাইলৰ আপোন ডুজ সংখ্যালঘুক সুৰক্ষা দিবলৈ ইজৰাইলী সেনা বদ্ধপৰিকৰ বুলি ইজৰাইলী প্ৰতিৰক্ষা মন্ত্ৰী ইজৰাইল কাটজে মন্তব্য কৰে।

উল্লেখযোগ্য যে ছিৰিয়াৰ ছুইডাত ডুজ সম্প্ৰদায়ৰ বিৰুদ্ধে ছিৰিয়াৰ সেনাই আক্রমণ চলাই এতিয়ালৈকে প্রায় ২৫০ জন লোকক হত্যা কৰিছে। ইয়াৰ পাছতেই ইজৰাইলে ডামাস্কাছস্থিত ছিৰিয়াৰ প্ৰতিৰক্ষা মন্ত্ৰ্যালয়ত আৰু ৰাষ্ট্ৰপতি ভৱনৰ সমীপত ভয়ংকৰ বিমান আক্রমণ বুধবাৰে সংঘটিত কৰে।

Share This