খো খো বিশ্ব কাপৰ পুৰুষ-মহিলা উভয় শাখাতে শ্ৰেষ্ঠ ভাৰত

Kakali Deka January 20, 2025

ডিজিটেল ডেস্ক : ভাৰতীয় ক্ৰীড়াত নতুন অভিলেখ গঢ়িলে দেশৰ পুৰুষ¸ আৰু মহিলা খো খো দলে৷ উল্লেখযোগ্য যে দেশৰ প্ৰথম ক্ৰীড়া হিচাপে এটা বছৰতে বিশ্ব চেম্পিয়ন হোৱাৰ গৌৰৱ অৰ্জন কৰিছে ভাৰতৰ পুৰুষ আৰু মহিলা খো খো দলে৷ এতিয়ালৈকে ভাৰতে অন্য কোনো খেলতে পুৰুষ আৰু মহিলাত এটা বৰ্ষত বিশ্ব চেম্পিয়ন হৈ পোৱা নাই৷ কিন্তু দেওবাৰে নতুন দিল্লীত দেশৰ প্ৰাচীন খেল খো খোৰ জৰিয়তে এই অনন্য গৌৰৱ লাভ কৰিবলৈ সক্ষম হৈছে ভাৰতে৷ ভাৰতৰ পুৰুষ আৰু মহিলা খো খো দলে প্ৰথম বিশ্ব কাপতে চেম্পিয়ন হৈছে৷

নতুন দিল্লীৰ ইন্দিৰা গান্ধী ইনড’ৰ ষ্টেডিয়ামত অনুষ্ঠিত প্ৰথম খো খো বিশ্ব কাপৰ ফাইনেলত ভাৰতৰ পুৰুষ আৰু মহিলা উভয় দলে নেপালৰ পুৰুষ-মহিলাক পৰাস্ত কৰি বিশ্ব চেম্পিয়নৰ খিতাপ অৰ্জন কৰে৷ নিশা হোৱা প্ৰথমখন ফাইনেলত আয়োজক দেশৰ মহিলা খো খো দলে ৭৮-৪০১ ব্যৱধানত নেপালক পৰাস্ত কৰি আই জি ষ্টেডিয়ামত সোণালী ইতিহাস গঢ়াৰ পাছত ভাৰতৰ পুৰুষ দলটোৱেও ৫৪-৩৬১ ব্যৱধানত নেপালক হৰুৱাই ঐতিহাসিক সফলতা অৰ্জন কৰে৷ বিশ্ব কাপৰ পূৰ্বে ভাৰতৰ পুৰুষ আৰু মহিলা খো খো দলে ছাফ গেমছ আৰু এছিয়ান চেম্পিয়নশ্বিপৰ সোণ লাভ কৰিছিল৷

কিন্তু দেওবাৰে এই সফলতাৰ পাছত বিশ্ব খো খোত ভাৰতৰ পুৰুষ আৰু মহিলাৰ নতুন পৰিচয় হ’ব বিশ্ব চেম্পিয়ন হিচাপে৷ উল্লেখযোগ্য যে অপৰাজেয় জয়যাত্ৰা অব্যাহত ৰাখি ভাৰতীয় পুৰুষ-মহিলা দলে বিশ্ব চেম্পিয়ন হ’বলৈ সক্ষম হয়৷ চেম্পিয়ন ভাৰতীয় মহিলা দলক সেউজীয়া ৰঙৰ মনোমোহা ট্ৰফী প্ৰদান কৰাৰ বিপৰীতে পুৰুষ দলক নীলা ট্ৰফী দিয়া হয়৷

Share This