প্ৰয়াগৰাজৰ মহাকুম্ভ মেলাত বিধ্বংসী অগ্নিকাণ্ড।জ্বলি ভস্মীভূত হয় ২০-২৫টাকৈ কেম্প।

Kakali Deka January 19, 2025

ডিজিটেল ডেস্ক:১৩ জানুৱাৰীৰ পৰা উত্তৰ প্ৰদেশৰ প্ৰয়াগৰাজত অনুষ্ঠিত হৈ থকা মহা কুম্ভমেলাত আজি বিয়লিৰ ভাগত সংঘটিত হয় এক বিধ্বংসী অগ্নিকাণ্ড।তুলসী মাৰ্গত অৱস্থিত ছেক্টৰ ১৯ ৰ ৰে'লৱে দলঙৰ তলত গীতা প্ৰেছ গোৰখপুৰৰ শিবিৰত এই অগ্নিকাণ্ডটো সংঘটিত হয়।এইটো ধৰ্ম সংঘৰ এটা শিবিৰ বুলি জানিব পৰা গৈছে।

জানিব পৰা মতে কেম্পত ৰন্ধা বঢ়াৰ সময়ত এই অগ্নিকাণ্ডটো সংঘটিত হয়।জুইৰ লেলিহান শিখাই আগুৰি ধৰে কেম্পসমূহ।যাৰ ফলত তাত থকা গেছ চিলিণ্ডাৰবোৰ বিস্ফোৰিত হয়।আৰু জ্বলি ভস্মীভূত হয় গীতা প্ৰেছ শিবিৰৰ ২০ৰ পৰা ২৫টাকৈ কেম্প।জানিব পৰা মতে তিনিটাকৈ চিলিণ্ডাৰ বিস্ফোৰণৰ ফলত তম্বুত লগা জুয়ে নিমিষতে ঘেৰি ধৰে শিবিৰকেইটা।

আনহাতে জুই নুমুৱাবলৈ ততাতৈয়াকৈ ঘটনাস্থলীত উপস্থিত হৈছে কেইবাখনো অগ্নি নিৰ্বাপক বাহিনীৰ বাহন।শাস্ত্ৰী ব্ৰীজ আৰু ৰে’লৱে ব্ৰীজৰ মাজত লাগিছে জুই। সমগ্ৰ অঞ্চলটো মহাকুম্ভ মেলা অঞ্চলৰ অন্তৰ্গত। ইফালে এই অগ্নিকাণ্ডই ক্ৰমান্বয়ে ভয়ংকৰ ৰূপ ধাৰণ কৰিছে। অগ্নিকাণ্ডৰ ঘটনাৰ পিছতে সমগ্ৰ অঞ্চলটোত এক বিশৃংখলতাৰ পৰিস্থিতি সৃষ্টি হয়। ইতিমধ্যে সুৰক্ষিত স্থানলৈ স্থানান্তৰ কৰা হৈছে মেলাৰ‌ লোকসকলক।

 

Share This