আজি পবিত্ৰ ‘মে-ডাম-মে-ফি’ 

Kakali Deka January 31, 2025

ডিজিটেল ডেস্ক : আজি টাই আহোমসকলৰ পৰম্পৰাগত পৱিত্ৰ মে-ডাম-মে-ফি উৎসৱ৷ মে-ডাম-মে-ফি টাই আহোমসকলৰ ফুৰালুং ধৰ্মৰ নিয়ম অনুসৰি পালন কৰা সামাজিক পৰম্পৰাগত উৎসৱ।পূৰ্বপুৰুষক স্মৰণ কৰি আজি ৰাজ্যজুৰি উদযাপন কৰা হৈছে টাই আহোমসকলৰ পৱিত্ৰ মে-ডাম-মে-ফি উৎসৱটি।

প্ৰতি বছৰে ৩১ জানুৱাৰীত মে-ডাম-মে-ফি পালন কৰা হয়। কিন্তু কিয় পালন কৰা হয় মে-ডাম-মে-ফি।‘মে-ডাম-মে-ফি’ৰ অৰ্থ হ’ল, মে মানে তৰ্পণ কৰা, ডাম মানে মৃতকৰ আত্মা আৰু ফি মানে হ’ল দেউ।এই উৎসৱত আহোমসকলে পূৰ্বপুৰুষ সকলক স্মৰণ কৰে আৰু বিশ্ব শান্তিৰ বাবে কামনা কৰে।টাই আহোমসকলৰ এই ধৰ্মীয় সামাজিক উৎসৱত পূজা-পাতল কৰিলে তেওঁলোকৰ উপৰিপুৰুষ সন্তুষ্ট হয় আৰু উপৰিপুৰুষে পূজাত সন্তুষ্ট হৈ স্বৰ্গৰ পৰাই তেওঁলোকক আশীৰ্বাদ প্ৰদান কৰে বুলি লোকবিশ্বাস আছে ।মে-ডাম-মে-ফি ধৰ্মীয় অনুষ্ঠানতে চাওফী আৰু ‘‘ডাম চাও-ফি’’সকলক পূজা কৰা হয় । টাই পণ্ডিতে দহখনলৈ মেহেঙা পাতি ধূপ-দীপ-নৈবেদ্যৰ লগতে বৰা চাউল, কুকুৰা, কুকুৰাৰ কণী ধৰি অন্যান্য সামগ্ৰী অৰ্পণ কৰি দহজনকৈ দেৱতাক পূজা আগবঢ়ায় । 

উল্লেখযোগ্য যে এই উৎসৱৰ মূল উৎস প্ৰাচীন চীনৰ কনফুচিয়াছ ধৰ্মৰ পূৰ্বপুৰুষ উপাসনাতত্ত্ব যি পাছলৈ টাই জাতিৰ দাম-ফি পৰম্পৰা ৰূপে বিকাশ ঘটে। কনফুচিয়াছৰ শিক্ষাসমূহ আজিও আহোম সমাজে পালন কৰে।টাই-আহোমসকলৰ নিজা ধৰ্মটোৰ নাম ফুৰালুং ধৰ্ম আছিল। এই ধৰ্মৰ এটা অতি গুৰুত্বপূৰ্ণ অংশ হৈছে পূৰ্বপুৰষ উপাসনা। পূৰ্বপুৰুষ উপাসনাৰ আৰম্ভণি হৈছিল চীনা দাৰ্শনিক কনফুচিয়াছৰ দ্বাৰা। এই পূৰ্বপুৰুষ উপাসনাৰ প্ৰথা চীনা আৰু টাইসকলৰ মাজত যথেষ্ট দেখা যায়।চ্যুকাফাই অসমলৈ অহাৰ পথত ঈৰাৱতী নৈ পাৰ হৈ ‘‘মে-ডাম-মে-ফি’’ উদযাপন কৰিছিল ।

Share This