ম্যানমাৰত ভূমিকম্পত ১০ সহস্রাধিক লোকৰ মৃত্যুৰ আশংকা

dainik janambhumi March 30, 2025

ডিজিটেল ডেস্ক : ম্যানমাৰত শুকুৰবাৰে দুপৰীয়া হোৱা ৭.৭ প্রাবল্যৰ ভূমিকম্পত মৃত্যু হোৱা লোকৰ সংখ্যা শনিবাৰে সহস্রাধিক হয়গৈ। দেশখনৰ দ্বিতীয় বৃহত্তম মহানগৰখনৰ সমীপত হোৱা ভূমিকম্পৰ ফলত বহু ভৱন খহি পৰিছিল। এই ভৱনৰ ধ্বংসস্তূপৰ পৰা মৃতদেহ আৰু আবদ্ধসকলৰ উদ্ধাৰকাৰ্য চলি আছে। দেশখনৰ সেনা নেতৃত্বাধীন চৰকাৰে শনিবাৰে এটা বিজ্ঞপ্তিত জনায় যে শনিবাৰলৈকে ১,৬৪৪টা মৃতদেহ উদ্ধাৰ কৰা হৈছে আৰু কমেও ২,৪০০জন আহত হৈছে।আনহাতে সন্ধানহীন হৈ আছে আন ৩০জন। 

বিজ্ঞপ্তিৰ মতে মৃতকৰ সংখ্যা আৰু বৃদ্ধি পাব পাৰে আৰু বিস্তৃত তথ্য সংগ্ৰহ কৰি থকা হৈছে। ইফালে আমেৰিকা যুক্তৰাষ্ট্ৰ ভূতাত্ত্বিক-জৰীপ (ইউ এছ জি এছ)ৰ এটা প্রাককলন মতে শুকুৰবাৰে মধ্য ম্যানমাৰত হোৱা ৭.৭ প্রাবল্যৰ ভূমিকম্পৰ ফলত মৃত্যু হোৱা লোকৰ সংখ্যা ১০,০০০ অতিক্ৰম কৰাৰ আশংকা আছে। ম্যানমাৰৰ সময় মতে শুকুৰবাৰে নিশা ১২-৫০ বজাত ইউ এছ, জি এছে কয় যে ভূমিকম্পৰ ফলত মৃত্যু হোৱা লোকৰ সংখ্যা ১০ সহস্রাধিক হোৱাৰ ৭১ শতাংশ আশংকা আছে। 

ম্যানমাৰৰ মাণ্ডালে মহানগৰৰ সমীপত অভিকেন্দ্র থকা ভূমিকম্পটো ইমানেই প্রবল আছিল যে প্রায় ৯০০ কিল'মিটাৰ দূৰৈৰ থাইলেণ্ডৰ বেংকক মহানগৰতো ইয়াৰ প্ৰবল জোকাৰণি অনুভূত হোৱাই নহয়, বহু ভৱন আৰু দলং ভাগি পৰিছিল। চীন, ভিয়েটনাম, লাওচৰ উপৰি ভাৰতৰ মেঘালয় আৰু মণিপুৰ তথা বাংলাদেশৰ ঢাকা আৰু চট্টগ্রামতো প্রবল জোকাৰণি অনুভূত হৈছিল। এই ভূমিকম্পৰ ফলত থাইলেণ্ডৰ বেংককৰ চাটুচাক বজাৰ অঞ্চলৰ ওচৰত নিৰ্মীয়মাণ ৩০ মহলীয়া এটা ভৱন খহি পৰিছিল। উক্ত ঘটনাত ১০জন লোকৰ মৃত্যু হয়, ২৬জন আহত হয় আৰু ৪৭জন সন্ধানহীন হৈ আছে। আনহাতে মহানগৰখনৰ বিভিন্ন স্থানত ভৱনত ফাট মেলা ১২১০০টা অভিযোগ প্রশাসনে লাভ কৰিছে।

Share This