আন্তৰ্জাতিক নাৰী দিৱসৰ দিনটোতে বিশেষ জাৰ্ছি উন্মোচন : ১ মে’ত জয়পুৰত মুম্বাই ইণ্ডিয়ানছৰ বিৰুদ্ধে ৰাজস্থান ৰয়েলছৰ ‘পিংক প্ৰমিজ’ মেচ

Kakali Deka March 08, 2025

ডিজিটেল ডেস্ক :  আই পি এলৰ দল ৰাজস্থান ৰয়েলছে আজি আন্তৰ্জাতিক নাৰী দিৱসৰ দিনটোতে আসন্ন ছিজনৰ বাবে তেওঁলোকৰ বহু প্ৰত্যাশিত ‘পিংক প্ৰমিজ’ মেচৰ আকৰ্ষণীয় অল পিংক জাৰ্ছি উন্মোচন কৰে । আনহাতে, আন্তৰ্জাতিক মহিলা দিৱস উদযাপনৰ উক্ত কাৰ্যসূচীতে ৰাজস্থান ৰয়েলছে আনুষ্ঠানিকভাৱে ঘোষণা কৰে যে অহা এক মে’ত দলে জয়পুৰৰ সাৱাই মানসিং ষ্টেডিয়ামত মুম্বাই ইণ্ডিয়ানছৰ বিৰুদ্ধে এই বৰ্ষৰ ‘পিংক প্ৰমিজ’ বিশেষ মেচখন খেলিব৷

অনুষ্ঠানত অংশ লৈ ৰাজস্থান ৰয়েলছৰ ক্ৰিকেটৰ সঞ্চালক তথা শ্ৰীলংকা ক্ৰিকেট দলৰ প্ৰাক্তন অধিনায়ক কুমাৰ ছাংগাক্কাৰাই কয়, ‘পিংক প্ৰমিজ’ৰ জৰিয়তে আমি এক স্থায়ী প্ৰভাৱ সৃষ্টি কৰিবলৈ চেষ্টা কৰোঁ৷ এয়া কেৱল ব্যক্তিৰ ওপৰত নহয়, তেওঁলোকৰ পৰিয়াল আৰু সম্প্ৰদায়ৰ আধুনিক পৰিৱৰ্তনৰ প্ৰেৰণাদায়ক এটা ব্যৱস্থা ৷ আমাৰ এই প্ৰত্যক্ষ পদক্ষেপে কেনেকৈ মহিলা সমাজৰ জীৱনক নতুন আশালৈ ৰূপান্তৰিত কৰে সেইটো আমি গভীৰভাৱে বিশ্বাস ৰাখোঁ ৷ এটা দল হিচাপে আমি এই যাত্ৰাৰ অংশ হৈ অপৰিসীম গৌৰৱ অনুভৱ কৰিব পাৰোঁ ৷ ‘পিংক প্ৰমিজ’ কেৱল এটা অভিযান নহয়, এয়া এক সাংস্কৃতিক প্ৰতিশ্ৰুতি যিয়ে আমাৰ মূল্যবোধক গঢ় দিয়ে আৰু আমি থিয় দিয়া মানসমূহ সংজ্ঞায়িত কৰে৷’

ইফালে, ৰাজস্থান ৰয়েলছৰ চি ই অ’ জেক লুছ মেকক্ৰামে কয়, ‘আমাৰ ফাউণ্ডেশ্যনে যোৱা ছয় বছৰ ধৰি ৰাজস্থান আৰু অসম (বালিপাৰা)ৰ গ্ৰামাঞ্চলৰ মহিলাৰ দৈনন্দিন জীৱনক নতুন আশালৈ ৰূপান্তৰিত কৰি আহিছে । কিন্তু ‘পিংক প্ৰমিজ’ পদক্ষেপে আমাৰ মিছনক বিশ্বব্যাপী মঞ্চলৈ লৈ গ’ল লগতে লাখ লাখ লোকক এই যাত্ৰাৰ অংশ হ’বলৈ অনুপ্ৰাণিত কৰিলে ৷’

উল্লেখ্যযোগ্য যে ৰয়েলছ দলে ৰাজস্থান তথা অসমৰ মহিলা নেতৃত্বাধীন গ্ৰাম্য ৰূপান্তৰৰ দিশত সেৱা আগবঢ়োৱাৰ লক্ষ্যৰে আৰ আৰ বনাম এম আই মেচৰ বাবে দৰ্শকে ক্ৰয় কৰা প্ৰতিটো টিকটৰ লগত দলৰ ফালৰ পৰা অতিৰিক্তকৈ এশ টকা অৱদানৰূপে আগবঢ়াব৷ ইয়াৰ উপৰি, বিশেষ অল-পিংক ৰয়েলছৰ জাৰ্ছি বিক্ৰীৰ পৰা পোৱা সকলো ধন পোনপটীয়াকৈ ৰয়েল ৰাজস্থান ফাউণ্ডেশ্যন (আৰ আৰ এফ)লৈ যাব যাতে এই অৰ্থ সাহায্যৰে সামাজিক প্ৰভাৱৰ পদক্ষেপক সহায় কৰিব পাৰে৷ তদুপৰি, যিকোনো এটা দলে মেচখনত স্ক'ৰ কৰা প্ৰতিটো ছিক্সাৰৰ বিপৰীতে ৰাজস্থান ৰয়েলছ আৰু আৰ আৰ এফে গাঁৱৰ ছটা ঘৰত সৌৰশক্তিৰ ব্যৱস্থা নিশ্চিত কৰিব৷

প্ৰণিধানযোগ্য যে ৰাজস্থান ৰয়েলছ আৰু আৰ আৰ এফে দীৰ্ঘম্যাদী সামাজিক প্ৰভাৱৰ প্ৰতি নিজৰ দায়বদ্ধতা শক্তিশালী কৰাৰ সময়তে প্ৰতিটো পদক্ষেপৰ মূলতে মহিলাসকল থাকিব ৷ বৰ্তমান সৌৰশক্তিয়ে পৰিৱৰ্তনক আগুৱাই নিয়াৰ সময়তে ভৱিষ্যতৰ প্ৰচেষ্টাসমূহ পানীৰ সুবিধা আৰু বহনক্ষম জীৱিকাৰ দৰে জটিল ক্ষেত্ৰত সম্প্ৰসাৰিত হ’ব, যাৰ ফলত মহিলাসকলে পৰিৱৰ্তনৰ নেতৃত্ব দি থাকিব আৰু অধিক বহনক্ষম ৰাজস্থান গঢ় দিব৷ ইতিমধ্যে লুমিনাছৰ সহযোগিতাত প্ৰায় আঢ়ৈশ ঘৰত সৌৰশক্তিৰ ব্যৱস্থা কৰা হৈছে৷ আজিৰ অনুষ্ঠানত ৰয়েল ৰাজস্থান ফাউণ্ডেশ্যনে আন্তৰ্জাতিক নাৰী দিৱস উদযাপন কৰি ‘ঔৰত হায় তো ভাৰত হায়’ নামৰ অভিযান শীৰ্ষক তথ্যচিত্ৰ উন্মোচন কৰে৷

উৎস: প্ৰাগ নিউজ ডিজিটেল
 

Share This