কেৱল নাৰী দেহ ব্যৱসায়েই নহয় আৰু বহু অপকৰ্মৰে জড়িত বাপ্তি হাজৰিকা

Kakali Deka August 06, 2025

ডিজিটেল ডেস্কঃ গুৱাহাটীৰ জয়ানগৰৰ গেষ্ট হাউছত চলি থকা নাৰী দেহৰ ৰমৰমীয়া বেহাৰ কথা পোহৰলৈ অহাৰ পাছতেই ৰাজ্যজুৰি তোলপাৰ লাগিছে। গহপুৰৰ বাপ্তি হাজৰিকাৰ নেতৃত্বত ১০গৰাকী যুৱতীৰ সৈতে মহানগৰীত চলাই আছিল দেহ ব্যৱসায় । মহানগৰীৰ বাপ্তিছ ইন নামৰ গেষ্ট হাউছৰ বিৰুদ্ধে উত্থাপিত হৈছিল এই অভিযোগ ।

বাপ্তিছ ইন নামৰ গেষ্ট হাউছৰ স্বত্বাধিকাৰী বাপ্তি হাজৰিকাৰ বিৰুদ্ধে উঠিছিল এই অভিযোগ । বিগত দুটা দিনত এই গেষ্ট হাউছটোৰ নাম উল্লেখ থকা এটা কল ৰেকৰ্ডিং সামাজিক মাধ্যমৰ লগতে প্ৰচাৰ হৈছিল সংবাদ মাধ্যমত । সংবাদ মাধ্যমত প্ৰচাৰ হোৱাৰ পাছত আজি মহানগৰীৰ জয়ানগৰস্থিত গেষ্ট হাউছটোত চলে আৰক্ষীৰ অভিযান ।

পূব গুৱাহাটী আৰক্ষী জিলাৰ DCP মৃণাল ডেকাৰ নেতৃত্ব চলা এই অভিযানত আজি বশিষ্ঠ আৰক্ষীয়ে বাপ্তি হাজৰিকাৰ লগতে তিনিগৰাকী যুৱতীক গ্ৰেপ্তাৰ কৰে । জানিব পৰা মতে, জয়ানগৰৰ বাপ্তিছ ইন নামৰ গেষ্ট হাউছত বাপ্তি হাজৰিকাই বিগত ৮ মাহে চলাই আহিছিল দেহ ব্যৱসায় । কেইবাগৰাকী যুৱতীক হাজৰিকাই নিয়োগ কৰিছিল দেহ ব্যৱসায়ত । গুৱাহাটীত দুটা ফ্লেটত ৰাখিছিল এই যুৱতীসকলক ।

এতিয়া বাপ্তি হাজৰিকাৰ বিৰুদ্ধে কেতবোৰ গুৰুতৰ অভিযোগ উত্থাপন হৈছে। বাপ্তি হাজৰিকাৰ ঘৰ গহপুৰৰ চিলঠিয়াত। দুই নম্বৰী ব্যৱসায়েই বাপ্তিৰ মূল লক্ষ্য । বহু কাহিনী আছে বাপ্তিৰ।

পূৰ্বতে বাপ্তি নকল টকাৰ ব্যৱসায়ত জড়িত আছিল। গহপুৰত ভুৱা পেৰামেডিকেল ইনষ্টিটিউত খুলিও এসময়ত ধৰা পৰিছিল। শেহতীয়াকৈ নামিল নাৰী দেহ ব্যৱসায়ত। বাপ্তি এতিয়া অগাধ সম্পত্তিৰ মালিক।

এখন ভিতৰুৱা অঞ্চলৰ গাঁৱত বাস কৰা বাপ্তিৰ এতিয়া ট্ৰেক্টৰ,ৰাইছ মিল,মৰণা মৰা মেচিন,ৰূমে ৰূমে এ চি আছে। গাঁৱৰ ভিতৰত খুব কম দিনৰ ভিতৰত অগাধ সম্পত্তিৰ মালিক হৈ পৰিছে বাপ্তি।

গাঁৱৰ ৰাইজে কেমেৰাৰ সন্মুখত ক'ব খোজা নাই যদিও অফ কেমেৰা ৰাইজে কৈছে গাঁৱৰ ঘৰলৈও সঘনাই অচিনাকি যুৱতীৰ প্ৰৱেশ ঘটিয়েই থাকে। যাৰ ফলত গাঁওখনত পৰিৱেশ বিনষ্ট হোৱাৰ কথা উল্লেখ কৰে। শুনা মতে বাপ্তিছ হ'ম ষ্টে'খন দুই কোটি টকাৰ বিনিময়ত বাপ্তিয়ে ১০ বছৰৰ কাৰণে লিজট লৈছে।

মুঠৰ ওপৰত দুই নম্বৰী ধান্দাৰ সদাগৰ বাপ্তি হাজৰিকা।

প্ৰাগ নিউজ ডিজিটেল