পেকেটত এটা বিস্কুট কম আছিল! গ্ৰাহকক ১ লাখ টকাৰ জৰিমনা দিব লাগিব আইটিচিয়ে

Kakali Deka September 06, 2023

ডিজিটেল ডেস্কঃ বিস্কুটৰ পেকেটত লিখা বিস্কুটৰ সংখ্যাতকৈ এটা বিস্কুট কম হোৱা বাবে এতিয়া আইটিচিয়ে গ্ৰাহকক এক লাখ টকাৰ ক্ষতিপূৰণ দিব লাগিব। এইটোৱেই হয়তো আইটিচিৰ বাবে এতিয়ালৈকে সৰ্বাধিক ব্যয়বহুল বিস্কুট। ১৬টা বিস্কুট থকা “ছান ফিষ্ট মেৰী লাইট”ত এটা বিস্কুট কম পেক কৰাত সমস্যাত পৰিছে কোম্পানীটো। আই টি চি লিমিটেডক চেন্নাইৰ এজন গ্ৰাহকক ক্ষতিপূৰণ হিচাপে ১ লাখ টকা দিবলৈ নিৰ্দেশ দিছে গ্ৰাহক আদালতে।

সংবাদ মাধ্যমৰ মতে, চেন্নাইৰ এম এম ডি এ মাথুৰৰ পি দিল্লীবাবুৱে ২০২১ চনৰ ডিচেম্বৰ মাহত মানালীৰ এখন খুচুৰা বিপণীৰ পৰা দুডজন “ছান ফিষ্ট মেৰী লাইট” বিস্কুটৰ পেকেট ক্ৰয় কৰিছিল ৰাস্তাৰ জন্তুক খুৱাবলৈ। পেকেটবোৰ খুলি তেওঁ মাত্ৰ ১৫ টা বিস্কুটহে পাইছিল। আনহাতে, ৰেপাৰত ১৬ টাৰ কথা উল্লেখ কৰা হৈছিল। দিল্লীবাবুৱে যেতিয়া ষ্ট’ৰৰ লগতে আইটিচিৰ সৈতে স্পষ্টীকৰণৰ বাবে যোগাযোগ কৰে তেতিয়া কোনো উচিত সঁহাৰি পোৱা নাছিল।

প্ৰতিটো বিস্কুটৰ দাম ৭৫ পইচা বুলি উল্লেখ কৰি তেওঁ অভিযোগত কয় যে আইটিচি লিমিটেডে দিনটোত প্ৰায় ৫০ লাখ পেকেট প্ৰস্তুত কৰে আৰু পেকেটৰ পিছফালৰ হিচাপত দেখা গৈছে যে কোম্পানীটোৱে প্ৰতিদিনে জনসাধাৰণৰ পৰা ২৯ লাখতকৈ অধিক টকা সংগ্ৰহ কৰিছে।

উত্তৰত প্ৰতিষ্ঠানটোৱে যুক্তি দিছিল যে উক্ত সামগ্ৰীটো কেৱল ওজনৰ ভিত্তিতহে বিক্ৰী কৰা হয় আৰু বিস্কুটৰ সংখ্যাৰ ভিত্তিত নহয়। বিজ্ঞাপন দিয়া বিস্কুটৰ পেকেটটোৰ ওজন আছিল ৭৬ গ্ৰাম। কিন্তু আয়োগে যেতিয়া ইয়াৰ তদন্ত কৰিলে তেতিয়া তেওঁলোকে দেখিলে যে সকলো মেৰিয়াই নোলোৱা বিস্কুটৰ পেকেট (য’ত ১৫টা বিস্কুট আছিল) মাত্ৰ ৭৪ গ্ৰামৰ।

আইটিচিৰ অধিবক্তাই কয় যে ২০১১ চনৰ আইনী মেট্ৰ’লজী নিয়ম অনুসৰি প্ৰি-পেকেজ কৰা সামগ্ৰীৰ ক্ষেত্ৰত সৰ্বোচ্চ অনুমোদিত ভুল ৪.৫ গ্ৰামৰ অনুমতি দিয়া হৈছে। মঞ্চই এই যুক্তি মানি লোৱা নাছিল আৰু ৰায় দিছিল যে এনে ৰেহাই কেৱল অস্থিৰ প্ৰকৃতিৰ সামগ্ৰীৰ ক্ষেত্ৰতহে প্ৰযোজ্য। ইয়াত লগতে কোৱা হৈছে যে বিস্কুটৰ দৰে বস্তুৰ ক্ষেত্ৰত এই কথা প্ৰযোজ্য নহয়, যাৰ ওজন সময়ৰ লগে লগে কমি নাযায়।

কোম্পানীটোৰ দ্বিতীয়টো যুক্তিও মঞ্চখনে নাকচ কৰে, য’ত কোৱা হৈছে যে এই সামগ্ৰীটো “সংখ্যা”ৰ ভিত্তিত নহয়, “ওজনৰ” ভিত্তিত বিক্ৰী কৰা হৈছে। কাৰণ ৰেপাৰত বিস্কুটৰ সংখ্যা উল্লেখ আছিল। ২৯ আগষ্টত উপভোক্তা আদালতে আইটিচিক অন্যায় বাণিজ্যিক পদ্ধতি গ্ৰহণ কৰাৰ বাবে দিল্লীবাবুক ক্ষতিপূৰণ হিচাপে ১ লাখ টকা দিয়াই নহয়, বিশেষ বেচৰ বিস্কুটৰ বিক্ৰী বন্ধ কৰিবলৈও নিৰ্দেশ দিছিল।

Share This