কেজৰিৱালৰ দুর্দিন

dainik janambhumi February 12, 2025

ডিজিটেল ডেস্ক: দিল্লী বিধানসভাৰ নিৰ্বাচনত আম আদমি পার্টি (আপ)ৰ পতন ঘটি ২৬ বছৰৰ মূৰত দেশৰ ৰাজধানীক সামৰা কেন্দ্ৰীয়শাসিত অঞ্চলটোৰ ক্ষমতালৈ বিজেপি ঘূৰি আহিব পৰাটো দেশৰ ৰাজনৈতিক ইতিহাসৰ অন্যতম উল্লেখযোগ্য ঘটনা। এই নির্বাচনে মুখ্যমন্ত্রী অৰবিন্দ কেজৰিৱালৰ ৰাজনৈতিক ভবিষ্যতো অনিশ্চিত কৰি তুলিলে। যোৱা শতিকাৰ শেষৰ দশকটোত দিল্লীত বিজেপিৰ শক্তি আছিল ঈর্ষণীয়। ১৯৯৩ চনত মদনলাল খুৰানা তাৰ মুখ্যমন্ত্ৰী নিৰ্বাচিত হৈছিল। খুৰানা 'দিল্লীৰ সিংহ'ৰূপে পৰিচিত আছিল। সেইবাৰৰ বিধানসভাৰ নিৰ্বাচনত ৭০জনীয়া বিধানসভাত বিজেপিৰ ৪৯ আসনৰ বিপৰীতে কংগ্ৰেছে মাত্র ১৪খন আসন পাইছিল। 

কিন্তু দুবছৰৰ পাছতে খুৰানাই পদত্যাগ কৰিব লগা হৈছিল তেওঁৰ নাম হাৱালা কেলেংকাৰিত সাঙোৰ খোৱা বাবে। তাৰ পাছত আহিল চাহিব সিং বার্মা। তেৱোঁ বেছি দিন শাসন কৰিব নোৱাৰিলে। পিঁয়াজৰ দাম কেজিত ৬০ টকা হোৱাৰ পৰিপ্ৰেক্ষিতত প্রবল সমালোচনাৰ বাবে চাহিব সিং বাৰ্মাই মুখ্যমন্ত্ৰীৰ চকী এৰিব লগা হ'ল। তাৰ পাছত সুষমা স্বৰাজ মুখ্যমন্ত্ৰী হ'ল, কিন্তু বিধানসভাৰ কাৰ্যকাল শেষ হোৱাত তেওঁ মাত্র ৫২ দিনহে মুখ্যমন্ত্রী হৈ থকাৰ সুবিধা পালে। সেই চাহিব সিং বাৰ্মাৰে পুত্ৰ পৰৱেশ সিঙে এইবাৰ মুখ্যমন্ত্ৰী অৰবিন্দ কেজৰিৱালক নতুন দিল্লী সমষ্টিত পৰাজিত কৰি ৰাজনৈতিক ইতিহাসত নতুন অধ্যায় ৰচনা কৰিলে। তাৰ পাছত আহিল শীলা দীক্ষিতৰ যুগ। দিল্লীৰ আটাইতকৈ দীঘলীয়া সময় ১৬ বছৰ মুখ্যমন্ত্ৰী হৈ আছিল শীলা দীক্ষিত। ২০১৫ চনৰ নিৰ্বাচনত অৰবিন্দ কেজৰিৱালৰ হাতত পৰাস্ত হৈছিল অবিসম্বাদী যেন লগা মুখ্যমন্ত্ৰীগৰাকী। সেই অধ্যায়ৰ ১২ বছৰৰ পাছত 'অতি জনপ্রিয়' কেজৰিৱালৰ দশা শীলা দীক্ষিতৰ লেখিয়াই হ'ল। 

প্রাক্তন মুখ্যমন্ত্ৰী এজনৰ পুত্ৰৰ হাতত পৰাজিত হৈ তেওঁ হেৰুৱাব লগা হ'ল ক্ষমতা। উল্লিখিত ৩২টা বছৰৰ ইতিহাসলৈ লক্ষ্য কৰিলে এটা কথা প্রতিপন্ন হয় যে নিজৰ ভুল বা দোষতকৈ পৰিস্থিতিৰ বলি হ'ব লগা হৈছে প্ৰতিগৰাকী মুখ্যমন্ত্রী। মদনলাল খুৰানা,অটল বিহাৰী বাজপেয়ী, লালকৃষ্ণ আদৱানিৰ সমপৰ্যায়ৰ নেতা আছিল। এলাহবাদ বিশ্ববিদ্যালয়ৰ ছাত্ৰ একতা সভাৰ সম্পাদক, ৬০ৰ দশকতে অখিল ভাৰতীয় বিদ্যার্থী পৰিষদৰ ৰাষ্ট্ৰীয় সম্পাদক, জনসংঘৰ অন্যতম প্রতিষ্ঠাতা তথা একালৰ সাধাৰণ সম্পাদকৰ দায়িত্বত থকা খুৰানাই দিল্লীৰ মুখ্যমন্ত্রী পদ হেৰুৱাব লগা হৈছিল হাৱালা কেলেংকাৰিত জড়িত থকাৰ ভিত্তিহীন গোচৰত। পিছত চি বি আয়ে খুৰানাক দোষমুক্ত বুলি ঘোষণাও কৰিছিল। আদৱানিক সমালোচনা কৰিও তেওঁ নেতৃত্বৰ ৰোষত পৰিছিল। আনহাতে, চাহিব সিং বাৰ্মাৰ দৰে ৰাষ্ট্ৰীয় স্বয়ংসেৱক সংঘৰ একনিষ্ঠ সেৱক তথা বিজেপিৰ প্ৰাক্তন ৰাষ্ট্ৰীয় উপ-সভাপতিগৰাকীয়ে দিল্লীৰ মুখ্যমন্ত্ৰীৰ আসন হেৰুৱাব লগা হৈছিল পিঁয়াজৰ মূল্য বৃদ্ধিৰ এক অতি সাধাৰণ অভিযোগত। আচলতে মদনলাল খুৰানাৰ সৈতে থকা ৰাজনৈতিক সংঘাতৰ বলি হ'ব লগা হৈছিল বার্মা। আনহাতে, সুদীর্ঘ কালৰ মুখ্যমন্ত্ৰী ৰূপে শীলা দীক্ষিতে যি অভিলেখ গঢ়ি থৈ গৈছে তাক কোনোবাই ভাঙিব পাৰিব নে নাই সন্দেহ আছে, কিন্তু সামগ্রিকভাৱে কংগ্ৰেছৰ বিৰুদ্ধে উঠা ভ্রষ্টাচাৰৰ অভিযোগ আৰু প্ৰতিষ্ঠান-বিৰোধী টোৰ বলি হৈ ক্ষমতাচ্যুৎ হ'ব লগা হ'ল দীক্ষিতে।

অৰবিন্দ কেজৰিৱালৰো একে দশা। তেওঁক সুৰা কেলেংকাৰিৰ অভিযোগত বিজেপি চৰকাৰে গ্ৰেপ্তাৰ কৰিলে, জে 'লত ৰাখিলে, কিন্তু তেওঁৰ পৰা এটা অবৈধ টকাও ই ডি, চি বি আয়ে আজিলৈকে উলিয়াব নোৱাৰিলে। বৰঞ্চ কেজৰিৱাল কিম্বা অন্য একাংশ নেতাৰ ক্ষেত্ৰত কৰা আচৰণৰ বাবে উচ্চতম ন্যায়ালয়ৰ বিচাৰপীঠে ই ডি, চি বি আইক সমালোচনাহে কৰিব লগা হ'ল। মুখ্যমন্ত্রী কেজৰিৱালে যিটো 'শীশ মহল' নিৰ্মাণ কৰা বুলি অভিযোগ উঠিছে, সেইটো তেওঁৰ ব্যক্তিগত বাসভৱন নহয়, মুখ্যমন্ত্ৰীৰ চৰকাৰী বাসভৱনহে। সি যি নহওক, দিল্লীত শৈক্ষিক, চিকিৎসা, পৰিবহণ আদিৰ ক্ষেত্ৰত বৈপ্লৱিক ৰূপান্তৰ আনিও অৱশেষত কেজৰিৱাল নেতৃত্বাধীন 'আপ'-এ পৰাজয় শিৰ পাতি ল'ব লগা হ'ল। উল্লিখিত ৩২টা বছৰত ক্ষমতাচ্যুৎ কোনোগৰাকী মুখ্যমন্ত্ৰীয়েই পাছত পুনৰ সেইখন চকীত বহাৰ নজিৰ নাই। তেনেস্থলত কেজৰিৱাল পুনৰ সেই আসনলৈ উভতি আহিব পাৰিবনে, সেই প্রশ্নৰ উত্তৰ পাবলৈ সময়লৈ অপেক্ষা কৰাৰ গত্যন্তৰ নাই। কিন্তু বৰ্তমানৰ দুদিনক কেজৰিৱালে কেনেকৈ গ্ৰহণ কৰিব আৰু তেওঁৰ ভৱিষ্যতৰ যুঁজখন কেনেকুৱা হ'ব তাক চাবলৈহে ৰাজনীতিৰ প্ৰতি কৌতূহলী লোকসকল উৎসুক হৈ আছে। ২০১২ চনত 'ইণ্ডিয়া এগেইনষ্ট কৰাপশ্যন' আন্দোলনেৰে দেশবাসীৰ সন্মুখত উজলি উঠা কেজৰিৱালে বাৰ বছৰীয়া ক্ষমতাৰ অভিজ্ঞতাৰ পৰা বুজি উঠিছে যে সংগ্রাম কৰি ক্ষমতালৈ অহা সহজ, কিন্তু ক্ষমতা ধৰি ৰখা কঠিন। এতিয়াৰ দুর্দিনক সুদিনলৈ ৰূপান্তৰ কৰাটো বৰ সহজ কাম নহ'ব। 

প্রশ্ন হ'ব- এতিয়া কেজৰিৱালৰ নেতৃত্বত 'আপ'-এ অকলে পৰৱৰ্তী যুঁজবোৰত অৱতীৰ্ণ হ'ব নে কংগ্রেছক লগত লৈ বিৰোধী ঐক্যৰ নতুন প্রচেষ্টা চলাব? দিল্লীত 'আপ'ৰ পৰাজয়ৰ মূল কাৰণ হৈছে কংগ্ৰেছৰ সৈতে বুজাবুজিৰে নিৰ্বাচনত অৱতীৰ্ণ হ'ব নোৱৰাটো, যিদৰে 'আপ'ৰ বাবে হাৰিয়ানাত শ'লঠেকত পৰিছিল কংগ্ৰেছ। বাৰম্বাৰ প্ৰতিপন্ন হৈ আহিছে যে বিজেপি সহজ প্রতিপক্ষ নহয়। সেই দলটোৰ বিৰুদ্ধে যুঁজিবলৈ হ'লে ঐক্যবদ্ধ শক্তিৰ গত্যন্তৰ যে নাই সেই কথাই নির্বাচনবোৰে বাৰে বাৰে কৈ আছে। আগতে মুখ্যমন্ত্রী কেজৰিৱালৰ গুৰুত্ব বেলেগ আছিল, এতিয়া পৰাজিত কেজৰিৱালৰ ভূমিকাৰ মূল্যায়ন বেলেগ হ'ব। সেই সত্যক বুজি লৈ আগবাঢ়িব পৰা-নোৱৰাৰ ওপৰতে তেওঁৰ ৰাজনীতিৰ ভৱিষ্যৎ নিৰ্ভৰ কৰিব।

Share This