অনাবৃষ্টি

dainik janambhumi July 29, 2025

ডিজিটেল ডেস্ক : ৰাজ্যৰ কৃষিখণ্ডত এতিয়া অবর্ণনীয় অৱস্থা। পানীৰ অভাৱত খেতিপথাৰত ছিৰাল ফাট মেলিছে। অভাৱনীয় খৰাঙৰ ফলত শালিৰ বতৰ শেষ হ'বলৈ মাজত আৰু মাত্ৰ কেইটামান দিন থকা অৱস্থাতো কঠীয়া ৰুব পৰা নাই ৰাজ্যৰ লাখ লাখ কৃষকে। যিবোৰ অঞ্চলৰ কৃষকে ভূঁই ৰুই শেষ কৰিছিল সেইবোৰো এতিয়া পানীৰ অভাৱত ৰঙা পৰিবলৈ আৰম্ভ কৰিছে। বাৰিষাৰ বৰষুণৰ ওপৰতেই নিৰ্ভৰশীল হ'ব লগা কৃষক ৰাইজে এটুপি পানীৰ বাবে মুৰে-কপালে হাত দি ভৱিষ্যতক লৈ শংকিত হৈ পৰিছে। জলসিঞ্চন ব্যৱস্থাৰ উন্নয়নত গুৰুত্ব নিদিয়া চৰকাৰৰ জলসিঞ্চন বিভাগৰ অধীনত সৰহভাগ আঁচনিয়েই বিকল হৈ থকাত দিশহাৰা হৈ পৰিছে কৃষক-ৰাইজ। ভৰ বাৰিষাতো অনাবৃষ্টিৰ ফলত খেতিপথাৰ উদং কৰি ৰাখিবলগীয়া হোৱাৰ পাছতো কিন্তু কোনো সাৰ-সুৰ নাই ৰাজ্যৰ জলসিঞ্চন বিভাগৰ। বগাহাতীত পৰিণত হোৱা এই বিভাগটোৱে পথাৰত এটোপাল পানী যোগান ধৰিব পৰা নাই। ইতিমধ্যে বিভাগটোৰ এই ব্যর্থতাক লৈ ঠায়ে ঠায়ে বিক্ষোভ-প্রতিবাদো আৰম্ভ হৈছে। বতৰ বিজ্ঞান বিভাগৰ মতে আমাৰ ৰাজ্যত এইবেলি বৰষুণ ঘাটিৰ পৰিমাণ ৪৪ শতাংশ। ৰাজ্যৰ ৩৫খন জিলাৰ দহখনতেই বৰষুণৰ ঘাটি ৬১-৮৪ শতাংশ। উজনি অসমত এইবেলি প্রায় ৪০ শতাংশ বৰষুণ হ্রাস পাইছে বুলি ইতিমধ্যে খোদ মুখ্যমন্ত্রীয়ে সদৰী কৰিছে। এনে অৱস্থাত কৃষি নিৰ্ভৰশীল অসমৰ অৰ্থনীতি বিপর্যস্ত হৈ পৰাৰ আশংকা প্রকট হৈ পৰিছে। 

কিছুদিন পূর্বে কেন্দ্রীয় কৃষিমন্ত্রী শিৱৰাজ সিং চৌহান আৰু গৃহমন্ত্রী অমিত শ্বাহক, সাক্ষাৎ কৰি কৃষি মন্ত্ৰী অতুল বৰা আৰু অগপৰ এটা প্রতিনিধি দলে ৰাজ্যখনৰ বিভিন্ন জিলাৰ কৃষকে সম্মুখীন হোৱা বানপানী আৰু খৰাংসদৃশ অৱস্থা সন্দৰ্ভত আলোচনা কৰে। ৰাজ্যিক কেবিনেটেও খৰাঙৰ কবলত পৰা কৃষকক ক্ষতিপূৰণ দিয়া হ'ব বুলি সিদ্ধান্ত গ্রহণ কৰিছে যদিও ইয়াৰ সুফল কৃষকে লাভ কৰিব নে নাই তাক লৈও প্রশ্ন উঠিছে। ৰাজ্যখনৰ কৃষকসকলে এইধৰণৰ পৰিস্থিতিৰ সন্মুখীন এইবছৰেই হোৱা নাই। পূর্বেও এনে অৱস্থাৰ ভুক্তভোগী হৈছে তেওঁলোক। কিন্তু আজি ইমান বছৰে চৰকাৰে জলসিঞ্চন বিভাগটোৰ উন্নয়ন সাধি কৃষকক যিধৰণে উপকৃত কৰিব লাগিছিল সেয়া পৰিলক্ষিত হোৱা নাই। ফলত কৃষিকৰ্মৰ প্ৰতি অনীহা বৃদ্ধি পাইছে কৃষক ৰাইজৰ। প্ৰায় প্ৰতিবছৰেই বান নাইবা খৰাঙত জুৰুলা হোৱা কৃষক ৰাইজৰ দুৰ্দশাৰ অন্ত পৰিবলৈ হ'লে চৰকাৰৰ সংশ্লিষ্ট বিভাগ যথেষ্ট তৎপৰ হ'ব লাগিব। দেশৰ আন আন ৰাজ্যৰ লেখীয়াকৈ জলসিঞ্চন ব্যৱস্থাৰ উন্নয়ন সাধি কৃষি খণ্ডক আগুৱাই নিবলৈ সংকল্পবদ্ধ হ'ব লাগিব। শেহতীয়াভাৱে আমাৰ ৰাজ্যখনত দেখা দিয়া এনে খৰাং অৱস্থাৰ মূলতে হৈছে জলবায়ু পৰিৱৰ্তন। ইয়াৰ ফলত সৰ্বাধিক ক্ষতি হৈছে কৃষিখণ্ডৰ। 

অসমৰ ক্ষেত্ৰলৈ চালে দেখা পাওঁ যে প্ৰতিবছৰে আমাৰ ৰাজ্যখনৰ বনাঞ্চলৰ সংকোচন ঘটিবলৈ ধৰিছে। ঘন জংঘলেৰে ভৰা অসম সংৰক্ষিত বনাঞ্চলসমূহ উদং হৈ পৰিছে। এনেবোৰ কাৰণতে এতিয়া গোলকীয় উষ্ণতা বৃদ্ধিয়ে ভয়ংকৰ ৰূপ ধাৰণ কৰিছে। গোলকীয় উষ্ণতা বৃদ্ধিৰ ফলত হোৱা বতৰৰ অস্বাভাৱিক পৰিৱৰ্তন এতিয়া ৰাজ্যবাসীয়ে প্ৰত্যক্ষ কৰিছে। যাৰ বাবে ভয়ংকৰ গ্ৰীষ্মপ্রৱাহে আমাক শান্তিত থাকিবলৈ দিয়া নাই। অৱশ্যে এয়া মাথোঁ আৰম্ভণিহে। গোলকীয় উষ্ণতা বৃদ্ধিৰ প্ৰধান কাৰক হৈছে বায়ুমণ্ডলত শ শ বছৰ ধৰি গোট খাই থকা কাৰ্বন ডাই অক্সাইডকে ধৰি আন আন সেউজ গৃহ গেছবোৰ। বায়ুমণ্ডলত জমা হৈ থকা এই কার্বন ডাই অক্সাইড গেছসমূহ হ্রাস কৰাৰ বাবে আমি যদিহে ব্যবস্থা গ্রহণ নকৰোঁ, তেনেহ'লে অনাগত দিনত বিশ্ববাসীয়ে ভয়ংকৰ পৰিস্থিতিৰ সন্মুখীন হ'ব লাগিব। এই কার্বন ডাই অক্সাইড গেছৰ পৰিমাণ হ্রাস কৰিবলৈ হ'লে আমি গছপুলি ৰোপণ কৰিবই লাগিব। আনহাতে, ৰাজ্যৰ বনাঞ্চল যি হাৰত ধ্বংস কৰা হৈছে; সেয়া বন্ধ কৰিব নোৱাৰিলে সীমিত সংখ্যক গছ ৰুই পৰিৱেশ প্ৰদূষণৰ পৰা ৰক্ষা কৰিব পৰা নাযাব। 

উল্লেখযোগ্য যে বৰ্তমান ভাৰতৰ বনাঞ্চল যথেষ্ট হ্রাস পাইছে। কেন্দ্ৰীয় চৰকাৰে দেশৰ বনাঞ্চল ৩৩ শতাংশ কৰাৰ লক্ষ্য ঘোষণা কৰিছিল যদিও বর্তমান দেশত মাত্র ২৫ শতাংশ বনাঞ্চলহে থকা বুলি প্রকাশ পাইছে। দেশৰ কিছুমান ৰাজ্যত ১০ শতাংশতকৈ কম বনাঞ্চল থকা বুলি তথ্য প্রকাশ পাইছে। আমাৰ ৰাজ্যখনৰ বনাঞ্চলৰ এক বৃহৎ অংশ এতিয়াও বেদখলকাৰীৰ দখলত আছে। এইদৰে অব্যাহত থকা বেদখল শীঘ্ৰে ৰোধ কৰিব নোৱাৰিলে ইয়াৰ ভয়াৱহ পৰিণাম আমি ভোগ কৰিবলৈ সাজু থাকিব লাগিব। জলবায়ু পৰিৱৰ্তনৰ ফলত অনাগত দিনত আমাৰ ৰাজ্যৰ লগতে উত্তৰ-পূৰ্বাঞ্চলবাসীয়ে ভয়ংকৰ পৰিস্থিতিৰ সন্মুখীন হ'ব লাগিব। বনাঞ্চলৰ সম্প্ৰসাৰণ ঘটাই ভৱিষ্যতে হ'ব পৰা প্ৰাকৃতিক দুর্যোগ তথা বিপদৰ পৰা ৰাজ্যখনক ৰক্ষা কৰাৰ ক্ষেত্ৰত প্ৰতিগৰাকী নাগৰিকে আগভাগ ল'ব লাগিব। অন্যথা বিপদ অনিবার্য।

Share This