প্রত্যাশা

dainik janambhumi June 28, 2025

ডিজিটেল ডেস্ক : কেন্দ্রীয় লোকসেৱা আয়োগৰ অসামৰিক সেৱাৰ পৰীক্ষাত বিগত কিছুবছৰৰ পৰা অসমৰ ফলাফল নিৰাশাজনক। বিগত বর্ষসমূহত স্থানপ্রাপ্তৰ সংখ্যা ক্রমশঃ হ্রাস পোৱা পৰিলক্ষিত হৈছে। আজিৰ পৰা কেইবছৰমান পূর্বে এই সংখ্যা কিন্তু ইমান কম নাছিল। ২০১৫ বৰ্ষৰ পৰা ২০১৭ চনলৈকে প্রতিটো বছৰতেই আমাৰ ৰাজ্যখনৰ ১৩-১৪জনকৈ শিক্ষার্থীয়ে এই পৰীক্ষাত কৃতকার্যতা লভিবলৈ সক্ষম হৈছিল। কিন্তু আজি কেইবছৰমানৰ পৰা এক হতাশাজনক ছবিহে পৰিলক্ষিত হৈছে। ২০২৪ বর্ষত অসমৰ পৰা মাত্ৰ এগৰাকী প্রার্থীয়েহে এই পৰীক্ষাত কৃতকার্যতা লাভ কৰিবলৈ সক্ষম হৈছে। বিগত এপ্রিল মাহত ঘোষণা কৰা ২০২৪ বৰ্ষৰ কেন্দ্রীয় লোকসেৱা আয়োগ (ইউ পি এছ চি) পৰীক্ষাৰ ফল অনুসৰি ৪৭৪ সংখ্যক স্থানেৰে ৰাজ্যখনৰ নাম এই তালিকাত সন্নিৱিষ্ট কৰিবলৈ সক্ষম হৈছে নগাঁৱৰ ভাস্বত শইকীয়াই। উল্লেখ্য যে এইবাৰৰ পৰীক্ষাত মুঠ ১০০৯গৰাকী পৰীক্ষাৰ্থী উত্তীর্ণ হয়। প্রথম পাঁচটা স্থানৰ তিনিটা দখল কৰে মহিলাই। আনহাতে প্রথম দহটাৰ ভিতৰত চাৰিটাই মহিলা পৰীক্ষার্থীয়ে লাভ কৰে। বিশ্বৰ ভিতৰতে অন্যতম বিশাল, কঠিন আৰু প্রতিযোগিতামূলক এই পৰীক্ষাত অসমকে ধৰি উত্তৰ-পূৰ্বাঞ্চলৰ পৰা ২০২৪ বর্ষত মাত্র ৫গৰাকী শিক্ষার্থীয়েহে সাফল্য লাভ কৰে। ইয়াৰে দুগৰাকী হৈছে অৰুণাচল প্ৰদেশৰ। অৱশ্যে ২০২৩ বর্ষত এই সংখ্যা আছিল ১৮। ইয়াৰে ৯গৰাকীয়েই আছিল মণিপুৰৰ। অসম তথা উত্তৰ-পূবৰ এই হতাশাজনক ছবিৰ বিপৰীতে আন বহুকেইখন ৰাজ্যই কিন্তু উল্লেখনীয় সফলতা লাভ কৰি সমগ্র দেশবাসীৰে দৃষ্টি আকর্ষণ কৰিবলৈ সক্ষম হৈছে। ২০১১ৰ পৰা ২০১৫ বৰ্ষৰ ভিতৰত উত্তৰ প্ৰদেশৰ পৰা ১১৮ গৰাকী, ৰাজস্থানৰ পৰা ৯৭গৰাকী, বিহাৰৰ ৬৮গৰাকী, তামিলনাডুৰ ৯০গৰাকী, অন্ধ্র প্রদেশৰ ৬১ গৰাকীয়ে এই পৰীক্ষাত কৃতকাৰ্যতা লাভ কৰিছে। ইয়াৰ বিপৰীতে অসমে বিগত কেইবছৰমানত ধাৰাবাহিকভাৱে শোচনীয় প্রদর্শন অব্যাহত ৰাখিছে। ২০২১ চনতো অসমৰ মাত্ৰ তিনিগৰাকীয়ে এই পৰীক্ষাত সফলতা লাভ কৰিছিল। কিন্তু এইক্ষেত্ৰত বিহাৰৰ প্ৰদৰ্শন সদায়েই ঈর্ষণীয় ধৰণৰ। ২০২১ চনত ৰাজ্যখনৰ ৫০তকৈ অধিক শিক্ষার্থীয়ে সফলতা লাভ কৰিবলৈ সক্ষম হয়। 

২০১৭ৰ পৰা ২০২০ বৰ্ষলৈকে চাৰি বছৰ ধৰি ইউ পি এছ চিত বিহাৰৰ পৰা উত্তীৰ্ণ হোৱা প্ৰাৰ্থীৰ সংখ্যাই শতকৰ ঘৰ পাৰ কৰিছিল। ২০২০ চনত বিহাৰৰ ১২৩গৰাকী প্রার্থীয়ে সফলতা লাভ কৰাৰ বিপৰীতে ২০১৯ চনত এই সংখ্যা আছিল ১৮০। একেদৰে ২০১৮ চনত ১৮৩গৰাকী শিক্ষার্থীয়ে এই পৰীক্ষাত উত্তীর্ণ হয়। আনহাতে, ২০১৭ বর্ষত এই সংখ্যা আছিল ১৮৮। কেৱল ইউ পি এছ চিতেই নহয় আই আই টি, মেডিকেলৰ প্ৰৱেশ পৰীক্ষাতো বিহাৰৰ শিক্ষার্থীয়ে অভাৱনীয় সফলতা লাভ কৰিবলৈ সক্ষম হৈছে। প্রায় ৩.৫০ কোটিৰো অধিক বাসিন্দাৰে পৰিপূৰ্ণ আমাৰ ৰাজ্যখনৰ বাবে নিঃসন্দেহে এয়া এক সুখবৰ নহয়। বিহাৰৰ জনসংখ্যা আমাতকৈ তিনিগুণৰো অধিক। সেই দিশলৈ চালে ৰাজ্যখনৰ এই সফলতা আৰু আমাৰ ৰাজ্যৰ সফলতাৰ মাজত কিছু পার্থক্য আছে। কিন্তু যি সময়ত দেশৰ বিভিন্ন প্ৰান্তত বিহাৰৰ দৰে ৰাজ্যৰ অগণন লোকে কর্মসংস্থাপনৰ বাবে নিয়োজিত হৈ আছে তেনে সময়ত তেনে এখন ৰাজ্যৰ শিক্ষার্থীৰ এই সফলতা সঁচাকৈয়ে গৌৰৱৰ বিষয়। অসীম কষ্টসহিষ্ণু এইসকল শিক্ষার্থীয়ে ইউ পি এছ চি, আই আই টিৰ দৰে পৰীক্ষাত কৃতিত্ব অৰ্জন কৰি কেৱল ৰাজ্যখনৰেই সুনাম অর্জন কৰা নহয়, আন আন ৰাজ্যসমূহক এইক্ষেত্ৰত তেওঁলোকৰ পৰা শিকিবলগীয়া যে বহু আছে, তাৰ নিদৰ্শনো দাঙি ধৰিছে। প্রশ্ন হয় অসমত কিয়
এনে হৈছে? তাৰ বাবে জগৰীয়া কোন? শৈক্ষিক, সামাজিক, অর্থনৈতিক নে ৰাজনৈতিক কুপ্রভাৱৰ ফলত অৱধাৰিতভাৱে হ্রাস হৈছে সাফল্যৰ হাৰ। কেন্দ্রীয় লোকসেৱা আয়োগৰ অসামৰিক সেৱাৰ পৰীক্ষাত দেশৰ ভিতৰতে সর্বাধিক সংখ্যক স্থানপ্রাপকেৰে প্ৰতিবছৰেই নজিৰ সৃষ্টি কৰি অহা উত্তৰ প্ৰদেশৰ পৰা ১৯৯৯ বৰ্ষৰ পৰা ২০২৪ বর্ষলৈকে বিগত ২৫ বৰ্ষত ৫গৰাকীয়ে শীর্ষস্থান লাভ কৰি ৰাজ্যবাসীক গৌৰৱান্বিত কৰিছে। ইয়াৰে তিনিগৰাকীয়েই হৈছে মহিলা। ৰাজ্যখনে কেন্দ্রীয় লোকসেৱা আয়োগৰ অসামৰিক সেৱাৰ পৰীক্ষাত ২০২২ বৰ্ষৰ পৰা ২০২৪ বর্ষলৈকে শীর্ষস্থান লাভৰ ক্ষেত্ৰত হেটত্রিক অৰ্জন কৰিছে। ২০২২ বৰ্ষত ঈষিতা কিশোৰ, ২০২৩ বৰ্ষত আদিত্য শ্রীবাস্তৱ আৰু ২০২৪ বর্ষত শক্তি ডুবেই প্ৰথম স্থান অধিকাৰ কৰিবলৈ সক্ষম হৈছে। কেন্দ্রীয় লোকসেৱা আয়োগৰ অসামৰিক সেৱাৰ পৰীক্ষাত যথেষ্ট সফলতা লাভৰ ক্ষেত্ৰত উত্তৰ প্ৰদেশত 'মুখ্যমন্ত্রী অভ্যুদয় ক'চিং স্কীম'ৰ ভূমিকা অপৰিসীম বুলি চৰ্চিত হৈছে। এই আঁচনিৰ অধীনত অধ্যয়ন কৰা ১৩জন প্রার্থীয়ে ২০২৪ চনত সফলতা লাভ কৰিছে। উত্তৰ প্ৰদেশৰ সমাজ কল্যাণ বিভাগৰ দ্বাৰা এই আঁচনি চলোৱা হৈছে। 

ৰাজ্যখনৰ ৭৫খন জিলাত ১৬৬টা অভ্যুদয় ক'চিং চেণ্টাৰ আছে। যোগী চৰকাৰে বঞ্চিত আৰু দুৰ্বল শ্ৰেণীৰ প্রতিভাসম্পন্ন শিক্ষার্থীসকলক আগবঢ়াই নিবলৈ এনে প্রচেষ্টা হাতত লৈছে। লোকসেৱা আয়োগৰ অসামৰিক সেৱাৰ পৰীক্ষাত অসমৰ নিৰাশাজনক প্ৰদৰ্শনৰ বাবে অতি শেহতীয়াভাৱে সদৌ অসম ছাত্র সন্থাই এক পদক্ষেপ হাতত লৈছে। এই পৰীক্ষাত অৱতীৰ্ণ হোৱাত উৎসাহ যোগোৱা আৰু অসমৰ পৰা এচাম দক্ষ প্রশাসনিক বিষয়া সৃষ্টি কৰাৰ লক্ষ্যৰে ছাত্ৰ সন্থাই হাতত লৈছে এক বিশেষ প্রকল্প। সন্থাৰ শিক্ষা-নীতিৰ আধাৰত পৰিকল্পনা কৰা বিশেষ প্রকল্প হৈছে -'প্রত্যাশা'। কেন্দ্রীয় লোকসেৱা আয়োগৰ অসামৰিক সেৱাৰ পৰীক্ষাত অৱতীৰ্ণ হ'ব বিচৰা অসমৰ মেধাৱী শিক্ষার্থীক ছাত্র সংগঠনটোৱে সমর্থন আগবঢ়োৱাৰ বাবে হাতত লোৱা এই প্রকল্প নিঃসন্দেহে প্রশংসনীয়। আছুৰ দৰে ৰাজ্য চৰকাৰেও মেধাসম্পন্ন ছাত্র-ছাত্রীসকলক উদগনি দিয়াৰ বাবে বিশেষ পদক্ষেপ গ্রহণ কৰা উচিত। বিশেষকৈ শিক্ষাখণ্ডৰ বিকাশৰ বাবে চৰকাৰে যদিহে অধিক ধন বিনিয়োগ কৰে তেন্তে আন ৰাজ্যৰ তুলনাত প্ৰতি বছৰে কেন্দ্ৰীয় লোকসেৱা আয়োগৰ পৰীক্ষাসমূহত অসম উজলি নুঠাৰ কথাই নাহে। তাকে নকৰি ৰাজনৈতিক লাভালাভৰ বাবে যদিহে হিতাধিকাৰী আঁচনিসমূহত অধিক ধন খৰচ কৰি গৈ থাকে তেন্তে আমাৰ ৰাজ্যৰ উন্নতি আশা নকৰাই ভাল। কাৰণ বিকাশৰ মূল চাবিকাঠী শিক্ষা খণ্ডৰ উন্নয়ন নহ'লে এখন দেশ বা এটা জাতি কাহানিও আগুৱাই যাব নোৱাৰে।

Share This