আই এছ আইৰ চকু 

dainik janambhumi June 06, 2025

ডিজিটেল ডেস্কঃ ভাৰত স্বাধীন হোৱাৰ আগৰে পৰাই পূৰ্বৰ বৃহত্তৰ অসমখনক মুছলমান জনবসতি প্রধান ৰাজ্যলৈ ৰূপান্তৰ কৰি ইয়াক ভাৰতৰ পৰা আঁতৰাই এই ভূ-খণ্ডৰ শাসনৰ বাঘজৰী মুছলমানৰ নিয়ন্ত্ৰণত ৰখাৰ যি চক্রান্ত ৰচনা হৈছিল আৰু মুছলিম লীগে কেনেকৈ এই সমগ্র অধ্যায়টোৰ নেতৃত্ব দিছিল সেই ইতিহাসৰ মাজে মাজে চর্চা হৈ থাকে।

সেই তেতিয়াৰে পৰা এই ভূ-খণ্ডলৈ তেতিয়াৰ পূৰ্ববংগ, পাছত পূব পাকিস্তান আৰু তাৰ পাছত বাংলাদেশৰ পৰা অবিৰাম গতিত হৈ থকা অনুপ্রৱেশ তেনেকুৱা 'মাষ্টাৰ প্লেন'ৰে অংশ বুলি যি অভিযোগ সময়ে সময়ে উঠি থাকে তাক নস্যাৎ কৰাৰো উপায় নাথাকে যেতিয়া মুছলমান মৌলবাদৰ এচাম প্রবক্তাই এই সুৰত এতিয়াও বক্তব্য প্রকাশ কৰে বা জেহাদী সংগঠন কিছুমানে ইয়াৰ প্ৰব্ৰজিত মূলৰ বসতিপ্রধান অঞ্চলত জেহাদৰ জাল বিয়পাবলৈ চলোৱা গোপন তৎপৰতা ফাদিল হয়। এসময়ৰ বিশ্ব ত্রাস সন্ত্রাসবাদী ওচামা বিন লাডেনৰ মুখতো আনকি অসম নামটো উচ্চাৰণ হোৱাটো বহুতে পাহৰা নাই। মাজে মাজে বিভিন্ন মাধ্যমত প্রকাশ আৰু প্ৰচাৰ হৈ থাকে একাংশ জেহাদী সংগঠনৰ 'বৃহত্তৰ ইছলামীস্তান'ৰ মানচিত্র য'ত অসমকো অন্তর্ভুক্ত কৰা হয়। গতিকে, এই অঞ্চলত এনেধৰণৰ আশংকা সদায় বিদ্যমান।

এনে সময়তে মুখ্যমন্ত্রী ড° হিমন্ত বিশ্ব শর্মাই বুধবাৰে এখন সংবাদমেলত প্রকাশ কৰে যে ২০২৬-ৰ অসম বিধানসভাৰ নিৰ্বাচনত পাকিস্তানৰ চোৰাংচোৱা ১ সংস্থা ইণ্টাৰ ছার্ভিচেছ ইন্টেলিজেন্স (আই এছ আই)-এ হেনো প্রভাৱ খটুৱাব। মুখ্যমন্ত্ৰীগৰাকীয়ে লগতে এইবুলিও কৈছে যে এই উদ্দেশ্যে আই এছ আয়ে কলকাতাত এটা কল চেণ্টাৰ প্ৰতিষ্ঠা কৰিছে। মুখ্যমন্ত্ৰীগৰাকীয়ে তেখেতৰ চৰকাৰী উৎসবোৰৰ জৰিয়তে পোৱা খবৰ মতে হেনো দুই সহস্রাধিক সামাজিক মাধ্যমৰ গোটে এই দিশত কাম কৰি আছে। এইসকলৰ ওপৰত চৰকাৰে তীক্ষ্ণ দৃষ্টি ৰাখিছে। মুখ্যমন্ত্ৰীৰ এই বক্তব্যখিনিৰ ৰাজনৈতিক কিবা উদ্দেশ্য আছে নেকি তাৰ বিচাৰ-বিবেচনা কৰাতকৈ আইন-শৃংখলাৰ দিশৰ পৰা যে এইটো এটা ভয়ানক অভিযোগ সেই কথা মানি ল'ব লাগিব আৰু এনেকুৱা চক্ৰৰ বিৰুদ্ধে ৰাষ্ট্ৰৰ শক্তিক ব্যৱহাৰ কৰি ব্যৱস্থা লোৱাৰ দাবী তোলা উচিত হ'ব। ১৯০৬ চনত অল ইণ্ডিয়া মুছলিম লীগৰ ঢাকাত জন্ম হৈছিল, ১৯৩৫ চনৰ পৰা ই মুছলমানৰ ৰাজনৈতিক স্বাধীনতাৰ দাবী তুলিছিল, ১৯৪০ চনত মুছলমানৰ বাবে পাকিস্তান গঠনৰ দাবীত ই হিন্দু ভাৰতৰ সৈতে প্রত্যক্ষ সংঘাতৰ সূচনা কৰিছিল, ১৯৩৫ চনত এই মুছলিম লীগৰ পৰিকল্পনা মতেই অসমত মহম্মদ ছাদুল্লাৰ সংখ্যালঘু চৰকাৰ ক্ষমতাসীন হৈছিল। যদিও ৰাজনৈতিকভাৱে মুছলিম লীগৰ প্ৰভাৱ বৃহত্তৰ অসমত ১৯৪০-ৰ দশকতে অন্ত পৰিছিল। স্বৰাজোত্তৰ কালত অসমলৈ তেতিয়াৰ পূব পাকিস্তানৰ পৰা প্ৰব্ৰজনৰ ধাৰাটো অব্যাহত থাকিলেও অসমৰ ৰাজনৈতিক কর্তৃত্ব ল'ব পৰাৰ অৱস্থা তথা সামর্থ্য তেওঁলোকৰ যে নাই (একুৰি-ডেৰকুৰি মুছলমান বিধায়ক নির্বাচিত হোৱাক বাদ দি) সেইটো প্রতিপন্ন হৈছে। তেনে এক অৱস্থাত ২০২৬-ৰ অসম বিধানসভাৰ নিৰ্বাচনত পাকিস্তানৰ চোৰাংচোৱা সংস্থাটোরে প্ৰভাৱ খটুৱাবলৈ ষড়যন্ত্র ৰচনা কৰাৰ খবৰ মুখ্যমন্ত্ৰীৰ জ্ঞাত হোৱাটো গুৰুত্বপূর্ণ আৰু উদ্বেগজনক কথা। প্রসংগক্রমে উল্লেখযোগ্য যে 'পাকিস্তান' শব্দটো আমাৰ ৰাজ্যৰ ৰাজনীতিত এটা এৰাব নোৱৰা শব্দ হৈ পৰিছে। দেশৰ এগৰাকী প্রভাৱশালী বিৰোধী সাংসদ, লোক সভাত বিৰোধী পক্ষৰ উপ দলপতি তথা অসম প্রদেশ কগ্ৰেছ কমিটীৰ নৱনিৰ্বাচিত সভাপতি গৌৰৱ গগৈৰ 'পাকিস্তান সংযোগ'ৰ বিতৰ্কই যোৱা কিছুদিনৰ পৰা অসমৰ ৰাজনীতি উত্তাল কৰি ৰাখিছে। গৌৰৱ গগৈয়ে গোপনে পাকিস্তানলৈ গৈ তীব্র ভাৰত-বিৰোধী ব্যক্তিৰ সৈতে সম্পর্ক গঢ়া, আই এছ আইৰ

প্রশিক্ষণ লোৱা আদি অভিযোগ উত্থাপন কৰিছে খোদ মুখ্যমন্ত্রীয়ে। কেৱল অভিযোগতে সীমাবদ্ধ নাথাকি অসম আৰক্ষীৰ এটা বিশেষ তদন্তকাৰী গোট কৰি এই বিষয়ৰ তদন্ত ভালখিনি আগবঢ়াই নিয়া হৈছে বুলি প্রকাশ পাইছে। এনে সময়তে আই এছ আয়ে ২০০২৬-ৰ নিৰ্বাচনত প্ৰভাৱ খটুৱাবলৈ চেষ্টা কৰিব বুলি মুখ্যমন্ত্ৰীয়ে প্ৰকাশ কৰা তথ্যটোৱে স্বতঃস্ফূর্তভাৱে ৰাজ্যবাসীৰ মনত দুয়োটা বিষয়ৰ এক যোগসূত্ৰ থকাৰ ধাৰণা আনি দিছে। মুখ্যমন্ত্রীয়ে কৈছে যে এটা বিশেষ দলক জিকাবলৈ আই এছ আয়ে চেষ্টা কৰিব। তেনেহ'লে সেই দলটো কংগ্রেছ নেকি? আপোনাআপুনি সেই প্রশ্নটো আহিছে বহুতৰ মনলৈ। ১৯৫০ চনত দেশত সংবিধান গৃহীত হোৱাৰ পাছত অসমত ১৫বাৰ বিধানসভাৰ নিৰ্বাচন অনুষ্ঠিত হ'ল। অসম আন্দোলনৰ পৰিপ্ৰেক্ষিতত ১৯৮৩ আৰু ১৯৮৫ চনৰ নিৰ্বাচন দুটা অতি গুৰুত্বপূৰ্ণ আছিল।

কিন্তু আজিলৈকে আই এছ আইৰ প্ৰভাৱৰ বিষয়টো চৰ্চালৈ অহা নাছিল। এইবাৰ চৰ্চালৈ অহাটো সেয়েহে অতি গুৰুত্বপূৰ্ণ কথা। যিখন সংবাদমেলত মুখ্যমন্ত্ৰীয়ে আই এছ আইৰ প্ৰসংগটো উত্থাপন কৰিছিল, তাতেই তেওঁ কৈছিল যে অসমীয়া মানুহৰ আত্মাই বিজেপিক বিচাৰে। গতিকে, স্বাভাৱিকতে প্রশ্ন উঠিব অসমীয়া মানুহৰ আত্মাৰ পৰা বিজেপিক বিচ্ছিন্ন কৰিবলৈ এইবাৰৰ নির্বাচনত আই এছ আয়ে প্রভাৱ খটুৱাব নেকি? কিন্তু এটা কথা ঠিক যে অসমীয়া মানুহৰ আত্মাক আই এছ আয়ে প্রভাৱিত কৰিব পৰাটো কল্পনাৰো অগোচৰ। যি নহওক, মুখ্যমন্ত্রীয়ে এটা অতি গুৰুত্বপূৰ্ণ বিষয় অসমবাসীৰ সন্মুখলৈ আনিছে। মুখ্যমন্ত্রী, অসম চৰকাৰ আৰু কেন্দ্ৰীয় চৰকাৰৰ ওপৰত নিৰ্ভৰ কৰিব আই এছ আইক প্রতিহত কৰাটো। মুখ্যমন্ত্ৰীয়ে কলকাতাৰ যিটো কল চেণ্টাৰৰ কথা কৈছে সেইটো চিনাক্ত কৰি শীঘ্ৰে উৎখাত কৰাটোৱে হৈছে চৰকাৰৰ প্ৰথম কর্তব্য।

Share This