গৰুখুঁটিৰ প্ৰকল্পৰ অনিয়ম

dainik janambhumi July 05, 2025

ডিজিটেল ডেস্ক : সন্দেহজনক নাগৰিকৰ 'বেদখল' উচ্ছেদ কৰি দৰং জিলাৰ ছিপাঝাৰত মুকলি কৰা ভূমিত প্রতিষ্ঠা কৰা হৈছিল গৰুখুঁটি কৃষি প্রকল্প। পশুপালন, বিশেষকৈ গো-পালনত দিয়া হৈছিল বিশেষ গুৰুত্ব। অসম চৰকাৰৰ প্ৰত্যক্ষ পৃষ্ঠপোষকতাত বিধায়ক পদ্ম হাজৰিকাৰ নেতৃত্বত এই প্রকল্পৰ কাম চলি থকা বুলিয়েই ৰাইজে জানে। এই উদ্দেশ্যে গুজৰাটৰ পৰা অনা হৈছিল উন্নত প্ৰজাতিৰ গিৰ গাই। এতিয়া সংবাদ মাধ্যমত প্রকাশিত বাতৰি অনুসৰি মুঠ তিনিশ গিৰ গাই গুজৰাটৰ পৰা অসমলৈ অনা হৈছিল। তাৰে এটা অংশ মৰিল, কিছুসংখ্যক পোহা হ'ল। এটা অংশ গুজৰাটলৈ ঘূৰাই পঠোৱা হ'ল। আন এটা অংশ শাসক দলৰ একাংশ মন্ত্রী-বিধায়কে নিজৰ ভিতৰতে ৰাখিলে বা ক্ৰয় কৰিলে। গুজৰাটৰ পৰা অনা গিৰ গাই সম্পৰ্কীয় বিষয়ৰ কথাবোৰ সংগতিপূর্ণ নহয়। কিন্তু সেই গাইৰে কিছুসংখ্যকক লৈ খোলা এজন মন্ত্রী-পত্নীৰ এখন গো-পামক লৈ প্রকাশিত বাতৰিয়ে আন বহু কথাৰ সম্ভেদ দিয়াৰ লগতে গুজৰাটৰ পৰা অনা গিৰ গাই বিষয়ত সংঘটিত এটা কেলেংকাৰিৰো জাননী দিলে। প্রকাশিত তথ্য-পাতি আৰু অভিযুক্তসকলৰ পৰম্পৰ-বিৰোধী বক্তব্যই এই কেলেংকাৰিৰ সত্যতাও প্রমাণ কৰিলে। এয়া কেবল বিৰোধী পক্ষই প্রতিবাদ কৰিব লগা এটা বিষয় হৈ থকা নাই। অসমৰ জনজীৱনক আলোড়িত কৰিব পৰা ইএটা দুর্নীতিৰো প্রতীক হৈ পৰিল। দুর্নীতিৰ বিৰুদ্ধে শূন্য সহনশীলতাৰ কথা কোৱা, দহ-বিশ হাজাৰ উৎকোচ লৈ ধৰা পৰা বিষয়া-কৰ্মচাৰীৰ হাত ওপৰলৈ কৰি ফটো লোৱা চৰকাৰে এই দুর্নীতি-অনিয়ম সম্পর্কত এতিয়ালৈকে কোনো তদন্তৰ ব্যৱস্থাও কৰা নাই।

হিতাধিকাৰী ৰাজনীতিৰ অবাধ বিস্তাৰে অসমৰ সমাজ জীৱনত, বিশেষকৈ কৰ্ম-সংস্কৃতিৰ ক্ষেত্ৰত বিৰূপ প্রভাৱ পেলোৱা বুলি কোৱা হয়। কৃষি আৰু পশুপালনত অসমৰ এতিয়াও প্ৰচুৰ সম্ভাৱনা আছে। হিতাধিকাৰীৰ নামত হোৱা বিনিয়োগক কৃষি আৰু পশুপালনৰ ক্ষেত্ৰখনৰ উৎপাদিকতা শক্তিৰ বিকশিত কৰাত ব্যৱহাৰ কৰিব পৰা গ'লহেঁতেন। অসমলৈ এতিয়াও বাহিৰৰ পৰা মাছ-মাংস (ছাগলী-গাহৰি, ব্ৰয়লাৰ মুৰ্গী) আমদানি কৰিব লগা হয়। কম-বেছি পৰিমাণে গাখীৰো আনিব লগা হয়। পশুপালনত অসমক স্বাৱলম্বী কৰি তোলাৰ ক্ষেত্ৰত বিনিয়োগ হ'লে ৰাজ্যখনৰ অর্থনীতিও টনকিয়াল হ'ব, সংস্থাপনৰো নতুন সম্ভাৱনা মুকলি হ'ব। সেইবাবেই কৃষি, পশুপালনৰ বহুমুখী প্ৰকল্পৰ সম্ভাৱনা দিনে দিনে বৃদ্ধিহে পাইছে। অথচ চৰকাৰে বহুমুখী প্রকল্পৰ নামত মন্ত্রী-বিধায়ক আৰু শাসক দলৰ আন নেতা জড়িত থকা গৰুখুঁটি প্রকল্পৰ ক্ষেত্ৰত যি কৰিলে সেয়া অত্যন্ত পৰিতাপৰ কথা। অসমত শদিয়াৰ পৰা ধুবুৰীলৈ এতিয়াও বহু কৃষিপাম, পশুপালন আৰু দুগ্ধ উৎপাদন কেন্দ্র আছে। একাংশ পশুপালকে নিজৰ ধন আৰু শ্রম নিয়োজিত কৰি তাক বিকশাই তুলিছে। স্থানীয়ভাৱে গাখীৰৰ চাহিদা পূৰণ কৰাত সফল হৈছে। কিন্তু এইসকল পশুপালকক উদ্‌গনি দিয়াৰ চৰকাৰৰ কোনো আঁচনি নাই। ইয়াৰ বিপৰীতে পশুপালনৰ নামত চৰকাৰী সা-সুবিধা আদায় কৰি, পশুপালনৰ বিলাসিতা কৰা কোনোবা মন্ত্রী পত্নীৰ গো-পামে লাভ কৰিব খুজিছে পঞ্চাশ লাখকৈ ৰাজসাহায্য। এয়া এটা সাধাৰণ কথা নহয়। ইমান বৃহৎ পৰিমাণৰ ৰাজসাহায্য পাব লগা দুগ্ধ উৎপাদন কেন্দ্ৰই বছৰি কিমান টকাৰ ব্যৱসায় কৰে? আয়কৰ দিয়েনে? অন্যান্য প্রাংসগিক বিধি-বিধান পালন কৰি আহিছেনে? এই প্রশ্নবোৰ সংগত কাৰণতে উঠিব। ইয়াৰ বিপৰীতে অসমৰ সৰু-বৰ পশুপালকসকলৰ পশুপামসমূহ চিনাক্ত কৰি তাৰ উন্নতিকল্পে যদি চৰকাৰৰ সংশ্লিষ্ট বিভাগে কাম কৰিলেহেঁতেন, তেন্তে এই পঞ্চাশ লাখ টকাৰে বহু সাধাৰণ পশুপালকক সকাহ দিব পৰা গ'লহেঁতেন। হিতাধিকাৰী আঁচনিৰ পৰা উৎপাদনমূলক কাম-কাজ ত্বৰান্বিত কৰিব নোৱাৰি। কিন্তু পশুপালন, কৃষি আৰু সাধাৰণ ব্যৱসায়ত বিনিয়োগৰ জৰিয়তে তৃণমূলৰ আৰ্থিকভাবে দুর্বলসকলক সবল কৰি তুলিব পাৰি।

ইতিমধ্যে গৰুখুঁটিৰ প্ৰকল্প, তিনিশ গিৰ গাইৰ প্ৰসংগই পৰিৱেশ উত্তাল কৰি তুলিছে। এয়া যে একধৰণৰ দুর্নীতি-অনিয়মৰ কু- ফল সেই কথা এতিয়া গোপন কৰিব পৰা অৱস্থাত নাই। সেইবাবেই চৰকাৰে এই কেলেংকাৰিৰ এটা উচ্চ পৰ্যায়ৰ তদন্তৰ ব্যৱস্থা কৰিব লাগে। দুর্নীতি-অনিয়মৰ অভিযুক্তসকলৰ বিৰুদ্ধে কঠোৰ ব্যৱস্থা গ্রহণ কৰি দৃষ্টান্তৰ সৃষ্টি কৰিব লাগে। সংবাদ মাধ্যম আৰু সাংবাদিকে বাতৰি পৰিৱেশন কৰিলে তাত দোষণীয় একো নাই। এয়া সাংবাদিকতাৰ ধৰ্ম। জনপ্রতিনিধিসকলে এই কথা বুজিব লাগে যে তেওঁলোক বা তেওঁলোকৰ পৰিয়ালৰ সদস্যসকল পেছাৰ ফালৰ পৰা কৃষক বা পশুপালক নহয়। সেয়ে ছল-বল, কৌশলেৰে কৃষক বা পশুপালকৰ নামত আবণ্টিত ধন আত্মসাৎ কৰিব নালাগে। আজিৰ ক্ষমতাৰ ৰাজনীতি ভোগবাদৰ নিচাৰে আসক্ত হৈ পৰিছে। ক্ষমতাৰ ৰাজনীতিক মুনাফা আদায় কৰাৰ এটা ব্যবস্থাপনা হ'বলৈ নিদি চৰকাৰে কৃষক, পশুপালকৰ কল্যাণহে নিশ্চিত কৰিব লাগে।

Share This