কল্পনাৰ পৰা সুনীতালৈ...

dainik janambhumi March 20, 2025

ডিজিটেল ডেস্ক : বিশ্বৰ কোটি কোটি জনতা যেন সেই ক্ষণটোলৈকে অপেক্ষা কৰি আছিল। প্রায় ৯ মাহজোৰা উৎকণ্ঠাৰ অন্ত পেলাই অৱশেষত পৃথিৱীৰ বুকুত উপস্থিত হ'লহি সুনীতা উইলিয়ামছ। বুধবাৰে পুৱতি নিশা প্রায় ৩-২৭ বজাত ফ্লৰিডাৰ সমুদ্রপৃষ্ঠত ঢৌ তুলি চাৰিটাকৈ পেৰাছুটসহ অৱতৰণ কৰিলেহি ইলন মাস্কৰ SpaceX Dragon যান। লগে লগে তৎপৰ নৌ সেনা বাহিনীয়ে যানখনৰ পৰা উদ্ধাৰ কৰি সুকলমে লৈ যোৱা হয় সুনীতা আৰু তেওঁৰ সংগী উইলম'ৰক। মঙলবাৰে পুৱা ৮-১৫ বজাত বন্ধ হৈছিল SpaceX ড্রেগন মহাকাশ যানখনৰ দুৱাৰ। তাৰ পাছত ১০-৩৫ বজাত আন্তর্জাতিক মহাকাশ আস্থানৰ সৈতে আনডকিং অর্থাৎ বিচ্ছিন্নকৰণ প্ৰক্ৰিয়া আৰম্ভ হয় আৰু প্রায় ১৭ ঘণ্টাৰ পাছত সমুদ্রপৃষ্ঠত অৱতৰণ কৰেহি। ভাৰতীয় মূলৰ মহাকাশচাৰী সুনীতা উইলিয়ামছে অন্য এজন সতীর্থ বুচ উইলম'ৰৰ সৈতে ২০২৪ চনৰ ৫ জুনত ৮ দিনৰ বাবে মহাকাশলৈ গৈছিল। কিন্তু ব'য়িং ষ্টাৰলাইনাৰ মহাকাশ যানত হোৱা যান্ত্রিক বিজুতিৰ বাবে উভতি আহিব নোৱৰাত এই আঠদিনীয়া ভ্রমণে ৯ মাহ অতিক্রম কৰে। নাছাই বিজুতি সংঘটিত যানখনত তেওঁলোকক লৈ অহাটো অতি প্রত্যাহ্বানমূলক গণ্য কৰিছিল। যাৰ বাবে সুনীতা আৰু উইলম'ৰক আন্তর্জাতিক মহাকাশ আস্থানতে এৰি খালী যানখনকে ওভতাই অনা হৈছিল। ইয়াৰ লগে লগে বিশ্ববাসীৰ মাজত আৰম্ভ হৈছিল এক দীঘলীয়া উৎকণ্ঠা আৰু আশংকা। 

ইতিপূর্বে ভাৰতীয় মূলৰ প্ৰথমগৰাকী মহাকাশচাৰী কল্পনা চাওলাৰ অনাকাংক্ষিত ঘটনাই বিশ্ববাসীৰ মনত বাৰুকৈয়ে ৰেখাপাত কৰি থৈছে, যাৰ বাবে হয়তো বিশ্ববাসীৰ দুৰ্ভাৱনাও বৃদ্ধি পাইছিল। আনকি মাজতে সুনীতা উইলিয়ামছ গুৰুতৰ ৰোগত আক্ৰান্ত হোৱা বুলি লাভ কৰা খবৰৰ পাছতে ঠায়ে ঠায়ে প্রার্থনা সভাও অনুষ্ঠিত হৈছিল। অৱশেষত ইলন মাস্কৰ উদ্যোগত এক বিৰল সফলতা লাভ কৰা হ'ল। সুনীতা উইলিয়ামছ আৰু বুচ উইলম'ৰক সুকলমে ওভতাই অনা হ'ল। অৱশ্যে, দুয়ো এতিয়াও একেবাৰে শাৰীৰিকভাৱে বিপদমুক্ত নহয়। বিজ্ঞানীসকলে কোৱা মতে উইলিয়ামছ আৰু উইলম'ৰ কিছুদিনৰ বাবে শাৰীৰিক আৰু মানসিকভাৱে প্ৰত্যাহ্বানৰ সন্মুখীন হ'ব পাৰে। কিয়নো দীর্ঘদিন মহাকাশত থকাৰ ফলত তেওঁলোকৰ শৰীৰত কিছুমান বিশেষ ৰোগ সৃষ্টি হোৱাৰ আশংকা আছে। পৃথিৱী আৰু মহাকাশৰ মাজত মধ্যাকৰ্ষণৰ যি পার্থক্য তথা তাৰতম্য আছে, সি মানুহৰ শৰীৰত যথেষ্ট প্রভাৱ পেলায়। সেয়ে এজন মহাকাশচাৰী পৃথিৱীৰ পৰা বাহিৰলৈ যোৱাৰ সময়ত তেওঁৰ শৰীৰত বহু পৰিৱৰ্তন দেখা যায়। এতিয়া মহাকাশৰ পৰা ঘূৰি অহাৰ পাছত সুনীতা উইলিয়ামছ আৰু উইলম'ৰে খোজকঢ়া, থিয় হোৱাত অসুবিধাৰ সন্মুখীন হ'ব পাৰে। তদুপৰি শৰীৰত তেজৰ অভাৱ, মাংসপেশী আৰু হাড়ৰ দুৰ্বলতা, ইমিউনিটী ছিষ্টেমত প্রভাৱ, গোন্ধ লোৱাত সমস্যা আদিত ভুগিব পাৰে। পূর্বে অট'ৱা বিশ্ববিদ্যালয়ে ১৪জন মহাকাশচাৰীৰ শৰীৰক লৈ কৰা গৱেষণাত দেখা গৈছিল যে মহাকাশৰ পৰা উভতি অহাৰ পাছত মহাকাশচাৰীসকলৰ শৰীৰত ৰক্ত কণিকা যথেষ্ট হ্রাস পাইছিল। অৱশ্যে, এই ৰক্তকণিকা কিয় নোহোৱা হৈ যায় তাৰ উত্তৰহে গৱেষকসকলে আজিও উলিয়াব পৰা নাই। তদুপৰি তেওঁলোকক দুর্বল আৰু ভাগৰুৱাও দেখা গৈছিল। অৱশ্যে, ভাৰতীয় বংশোদ্ভৱ সুনীতা উইলিয়ামছ শৰীৰ-মনেৰে যথেষ্ট শক্তিশালী, তেওঁ সকলো প্রত্যাহ্বান অতিক্ৰম কৰিব পাৰিব বুলিয়েই সকলোৰে শুভাশা আছে। ১৯৬৫ চনৰ ১৯ ছেপ্টেম্বৰত অহিঅ'ৰ ইউক্লিডত জন্মগ্রহণ কৰা সুনীতা উইলিয়ামছৰ পিতৃ-পৰিয়ালৰ প্ৰকৃত জন্মস্থান আছিল গুজৰাটৰ মেহছানা জিলাৰ ঝুলাছানত। আনহাতে, মাতৃপক্ষৰ আজো আইতাকহঁত আছিল শ্লোভেনিয়াৰ। ভৌতিক বিজ্ঞানত স্নাতক ডিগ্ৰী আৰু আভিযান্ত্রিক ব্যৱস্থাপনাত স্নাতকোত্তৰ ডিগ্রীধাৰী সুনীতাই ২০০৭ চনৰ ছেপ্টেম্বৰ মাহত পিতৃৰ পূৰ্বপুৰুষৰ স্থানৰ লগতে সবৰমতী আশ্ৰম পৰিভ্ৰমণ কৰিছিল। সেই সময়তে তেওঁক ৱৰ্ল্ড গুজৰাটী ছ'চাইটিয়ে 'চৰ্দাৰ বল্লভভাই পেটেল বিশ্ব প্রতিভা বঁটা'ও প্রদান কৰিছিল। আমেৰিকা যুক্তৰাষ্ট্ৰৰ এগৰাকী নৌসেনা বিষয়া সুনীতাই সাতবাৰকৈ মুঠ ৫০.৪০ ঘণ্টা মহাকাশ ভ্ৰমণ কৰিছিল। সেইদৰে জীৱনকালত তেওঁ ৩০খনতকৈও অধিক বিমানত ৩,০০০তকৈ
অধিক ঘণ্টা উৰণ কৰিছে। 

তেওঁ টেক্সাছৰ ফেডাৰেল আৰক্ষী বিষয়া মাইকেল জে উইলিয়ামছৰ সৈতে বিবাহত বহিছিল। কর্মজীৱনৰ আৰম্ভণিৰ দিনবোৰত দুয়ো হেলিকপ্টাৰ উৰুৱাই ভাল পাইছিল। টেক্সাছৰ উপনগৰ হিউষ্টনত বসবাস কৰা দুয়ো নিঃসন্তান হোৱাত ২০১২ চনত উইলিয়ামছে আহমেদাবাদৰ এগৰাকী ছোৱালীৰ দত্তক গ্রহণ কৰে। কর্মজীৱনত অতি পাৰদৰ্শিতা দেখুওৱা সুনীতাই ২০০৭ চনৰ ১৬ এপ্রিলত মহাকাশ কেন্দ্ৰৰ পৰা মাৰাথন কৰা প্ৰথমগৰাকী ব্যক্তিত পৰিণত হয়। সি যি নহওক, সম্প্রতি সুনীতা উইলিয়ামছে পুনৰ জীৱন পোৱা বুলিয়ে বিশ্ববাসীয়ে স্বস্তিৰ নিশ্বাস এৰিছে। আমেৰিকাৰ ৰাষ্ট্ৰপতি ড'নাল্ড ট্রাম্প, ইলন মাস্ক আদিয়ে Crew-৯ দলৰ চাৰিজন মহাকাশচাৰীৰ সৈতে ড্ৰেগন কেপচুলৰ সফল অৱতৰণত উৎফুল্ল হৈ পৰে আৰু ইয়াক এক ঐতিহাসিক সফলতা বুলি অভিহিত কৰিছে। আমাৰ ভাৰতবৰ্ষতো সুনীতা মহাকাশত আবদ্ধ হৈ পৰাক লৈ বিশেষভাৱে চর্চা হৈছিল। সুনীতাৰ ঘটনাই সকলোকে আন এগৰাকী ভাৰতীয় মূলৰ মহাকাশচাৰী কল্পনা চাওলালৈ মনত পেলাই দিছিল। সুনীতাতকৈ মাত্র তিনি বছৰমান ডাঙৰ কল্পনাৰ জন্ম ভাৰততে কর্নাল নামৰ ঠাইত হৈছিল। পিতৃ আছিল বনাৰসী লাল চাওলা আৰু মাতৃ সংগীতা চাওলা। ১৯৯১ চনৰ এপ্রিল মাহত কল্পনাই আমেৰিকাৰ নাগৰিকত্ব গ্ৰহণ কৰে। দুবাৰকৈ মহাকাশ ভ্রমণ কৰা কল্পনা আমেৰিকা তথা ভাৰতীয় মূলৰ প্ৰথমগৰাকী মহাকাশচাৰী হিচাপে পৰিগণিত হয়। ১৯৯৬ চনৰ নৱেম্বৰ মাহত এছ টি এছ-৮৭ (STS-87)ৰ অভিযান বিশেষজ্ঞ তথা মুখ্য ৰ'ব'টিক আৰ্ম অপাৰেটৰ হিচাপে কল্পনাই ৩৭২ ঘণ্টা ৩৪ মিনিট সময় মহাকাশ পৰিভ্ৰমণ কৰে। দ্বিতীয়বাৰ পৰিভ্ৰমণ কৰে ২০০৩ চনত। কিন্তু সেইবাৰ তেওঁৰ যাত্ৰা সুখকৰ নহ'ল। সমগ্ৰ বিশ্ববাসীৰ আজিও মনত আছে সেই দুর্ঘটনালৈ, য'ত মহাকাশ পৰিভ্ৰমণৰ পৰা উভতি আহোঁতে পৃথিৱীৰ বায়ুমণ্ডলত প্ৰৱেশৰ সময়তে ধ্বংসপ্রাপ্ত হ'ল স্পেচ শ্বাটলু, কলম্বিয়া নামৰ যানখন। লগে লগেই ইতিহাস হৈ গ'ল কল্পনাৰ লগতে আন ছগৰাকী মহাকাশচাৰীৰ জীৱন। কল্পনাৰ সংগী মহাকাশচাৰীকেইগৰাকী আছিল ক্রমে কমাণ্ডাৰ ৰিক ডি হাজবেণ্ড, পাইলট উইলিয়াম চি মেককুল, পেলোড কমাণ্ডাৰ মাইকেল পি এণ্ডাৰছন, পেলোড বিশেষজ্ঞ ইলান ৰামোন (প্রথম ইজৰাইলী মহাকাশচাৰী), অভিযান বিশেষজ্ঞ। ডেভিদ এম ব্রাউন আৰু লৰেল বি ক্লার্ক। জীৱন কালত মুঠ ৩১ দিন, ১৪ ঘণ্টা, ৫৪ মিনিট মহাকাশ পৰিভ্ৰমণ কৰিছিল কল্পনা চাওলাই। তেওঁক মৰণোত্তৰভাৱে কংগ্রেছনেল স্পেচ মেডেল অব অনাৰ, নাছাৰ মহাকাশ উৰণ পদক আৰু নাছাৰ বিশিষ্ট সেৱা পদক প্রদান কৰা হয়। সেইদৰে বহু শিক্ষানুষ্ঠান, পথ আৰু আন আন প্রতিষ্ঠানৰ নামকৰণো কল্পনাৰ নামেৰে কৰি সন্মান জনোৱা হয়। এই সন্মানৰ নিঃসন্দেহে যোগ্য তেওঁ। তাৰ পাছতো বাস্তৱ কথাটো হ'ল- কল্পনা আজি বিশ্ববাসীৰ কল্পনা, বিশ্ববাসীৰ ইতিহাস। কিন্তু আশ্বস্তৰ কথা এয়ে যে সুনীতাৰ ক্ষেত্ৰত ইতিহাসৰ পৰা শিক্ষণ লোৱা হ'ল। পূৰ্বৰ ভুলৰ পুনৰাবৃত্তি নকৰিলে নাছাই আৰু মহাকাশত বন্দী সুনীতা উইলিয়ামছক সুকলমে উদ্ধাৰ কৰি বিশ্ববাসীৰ সন্মুখত চমকেই নহয়, এক নজিৰো দাঙি ধৰিলে।

Share This