আমাৰ ৰিয়ান

dainik janambhumi April 02, 2025

ডিজিটেল ডেস্কঃ ২০০৮ চনত যেতিয়া প্রথম ইণ্ডিয়ান প্রিমিয়াৰ লীগ, অর্থাৎ আই পি এল ক্রিকেটৰ সূচনা হৈছিল, তেতিয়া কোনেও কল্পনা কৰা নাছিল যে এজন অসম সন্তানে এই আই পি এলৰ এটা টীমৰ নেতৃত্ব দিবলৈ সক্ষম হ'ব। মুম্বাই ইণ্ডিয়ানছৰ হৈ প্রথম অসমৰ আবু নেচিমে খেলিছিল, সেয়াই যেন আছিল ৰাজ্যবাসীৰ বাবে বৃহৎ প্রাপ্তি। শচীন তেণ্ডুলকাৰ নেতৃত্বাধীন বিশ্বৰ বহুকেইগৰাকী বিখ্যাত তাৰকাৰে সমৃদ্ধ মুম্বাই ইণ্ডিয়ানছৰ দৰে দল এটাত অসমৰ ল'ৰা এটাই যে স্থান পাইছে! বিশ্বৰ আটাইতকৈ চহকী আৰু বিশ্বৰ প্ৰায়বোৰ দেশৰে তাৰকা ক্রিকেটাৰসকলৰ বাবে লোভনীয় এই ক্রিকেট টুর্নামেণ্টৰ দলবিলাকত নাম সুমুৱাবলৈ দেশী-বিদেশী ক্রিকেটাৰসকলৰ যি ভিৰ, তাত অসমৰ ক্ৰিকেটাৰে স্থান পোৱাটো দুর্লভ হোৱা বাবে আবুৱেই প্রথম আৰু আবুৱেই শেষ বুলি অসমবাসীয়ে ধাৰণা কৰিছিল; কিন্তু ৰিয়ান পৰাগৰ আকস্মিক উত্থানে দৃশ্যপট সলনি কৰি পেলালে।

 

২০১৮ বৰ্ষৰ ১৯ অনূর্ধ্ব বিশ্ব কাপ জয়ী ভাৰতীয় দলটোৰ অন্যতম সদস্যৰ ৰূপত উজলি উঠিছিল ৰিয়ান। এগৰাকী অলৰাউণ্ডাৰ হিচাপে বিশ্ব কাপৰ সেই প্রতিযোগিতাখনত প্ৰদৰ্শন কৰা দক্ষতাৰ সূত্রে ৰিয়ানে দৃষ্টি আকর্ষণ কৰিছিল ক্রিকেট বিশেষজ্ঞৰ আৰু ২০১৯ৰ আই পি এলৰ বাবে ৰাজস্থান ৰয়েলছৰ বাছনিত উঠিছিল অসমৰ প্ৰতিভাসম্পন্ন ক্রিকেটাৰজন। যোৱা বৰ্ষৰ আই পি এলত ৰাজস্থান ৰয়েলছ ফাইনেললৈ উত্তীর্ণ হোৱাৰ অন্যতম কাৰণ আছিল ৰিয়ান পৰাগৰ কেইবাটাও দৃষ্টিনন্দন ইনিংছ। সেই প্ৰদৰ্শনৰ সুবাদতে ভাৰতীয় জাতীয় টি-২০ দললৈও নির্বাচিত হ'বলৈ সক্ষম হয় ৰিয়ান। এইক্ষেত্রত তেওঁৰ ৰঞ্জি ট্ৰফী, বিজয় হাজাৰে ট্ৰফী, ছৈয়দ মুস্তাক আলী ট্ৰফীৰ কেতবোৰ গুৰুত্বপূৰ্ণ প্রদর্শন আৰু অভিলেখো বিচাৰৰ তুলাচনীত উঠিছিল। ৰাজস্থান ৰয়েলছৰ অন্যতম স্বত্বাধিকাৰী ৰঞ্জিত বৰঠাকুৰৰ পৃষ্ঠপোষকতাই আই পি এলৰ ফেন্সাইজী টীমটোত ৰিয়ানৰ স্থান অক্ষুণ্ণ ৰখাত কিছু সহায় কৰা বুলি ধাৰণা কৰাৰ থল থাকিলেও বেটে-বলে-ফিল্ডিঙে ৰিয়ানৰ চমক সৃষ্টি কৰিব পৰা দক্ষতা আছে আৰু ডাঙৰ মঞ্চত জিলিকি উঠিব পৰা তেওঁৰ সম্ভাৱনা প্ৰচুৰ আছে, সেই ভৰসা ৰঞ্জিত বৰঠাকুৰ বা বিশেষজ্ঞ নির্বাচকসকলক ৰিয়ানে দিছে নিজৰ প্ৰদৰ্শন জৰিয়তে। সেইবাবেই বিশ্বৰ সর্বশ্রেষ্ঠ ক্রিকেটাৰসকলে ভাগ লোৱা প্রতিযোগিতা এখনত ৰাজস্থান ৰয়েলছৰ ভাৰপ্ৰাপ্ত অধিনায়কৰ দৰে অতি গুৰুত্বপূৰ্ণ দায়িত্ব ৰিয়ানৰ ওপৰত সঁপি দিবলৈ দলটোৰ কৰ্তৃপক্ষই ভৰসা তথা সাহস কৰিব পাৰিছে। তেনে এখন প্রতিযোগিতাত অধিনায়কৰ ৰূপত ৰিয়ানক দেখিবলৈও পোৱাটো অসমবাসীৰ বাবে গৰ্বৰ বিষয়।

 

বর্ষাপাৰা ষ্টেডিয়ামত বিপুল দৰ্শকৰ সন্মুখত দেওবাৰে মহেন্দ্র সিং ধোনি, ৰবীন্দ্ৰ জাদেজাৰ দৰে তাৰকাৰে সমৃদ্ধ চেন্নাই ছুপাৰ কিংছ দলক শ্বাসৰুদ্ধকৰ এখন মেচত হৰুওৱাটো আই পি এল দলৰ অধিনায়ক হিচাপে ৰিয়ানৰ সাফল্যৰ প্ৰথম ঢাপ। ইয়াৰ পূৰ্বে ছানৰাইজাৰ্ছ আৰু কলকাতা নাইট ৰাইডাৰ্ছৰ বিৰুদ্ধে পূৰ্বৰ দুখন মেচত হাৰিলেও ৰাজস্থান ৰয়েলছৰ প্ৰশিক্ষক ৰাহুল দ্রাবিড়ে ৰিয়ানৰ অধিনায়কত্বক মুকলিকৈ প্রশংসা কৰিছে। ৰাহুল দ্রাবিড়ৰ দৰে বিশ্ববন্দিত ক্রিকেটাৰ এজনৰ মুখত ৰিয়ানৰ প্রশংসা শুনাটোও জানো অসমীয়াৰ বাবে গৌৰৱৰ বিষয় নহয়! দুদিন পূর্বে ভাৰতীয় দলৰ প্ৰাক্তন সদস্য স্বৰাজ বহুতুলেয়েও ৰিয়ানৰ মাধ্যমেৰে উজলি উঠা বৰ্তমানৰ অসম ক্রিকেটক উচ্চ প্রশংসা কৰিছে। আই পি এলৰ এইবাৰৰ সংস্কৰণৰ পৰৱৰ্তী মেচবোৰত ৰিয়ান অধিনায়কৰ দায়িত্বত নাথাকিব, স্থায়ী অধিনায়ক সঞ্জু ছেমচনে পুনৰ ল'ব দলৰ দায়িত্ব, কিন্তু চি এছ কেৰ বিৰুদ্ধে মেচখনৰ পৰা এইটো প্রতিপন্ন হ'ল যে এনেকুৱা 'হাইভল্টেজ' মেচত নেতৃত্ব দিব পৰাৰ সামর্থ্য ৰিয়ান পৰাগৰ পূৰ্ণমাত্ৰাই আছে। ৰিয়ানে কোনো সময়ত শক্তিশালী বলাৰক নির্দয়ভাৱে প্ৰহাৰ কৰি বিস্ফোৰক বেটিং কৰি দেখুৱাইছে, কেতিয়াবা নিয়ন্ত্রিত বলিঙেৰে বেটাৰক বান্ধি ৰাখিছে, ফিল্ডিঙতো তেওঁ সদায়েই দুর্দান্ত। অহা মেচবিলাকত এইকেইটা দিশতে ৰিয়ান পুনৰ উজলি উঠক, তেওঁ পুনৰ জাতীয় দললৈ উভতি আসন নিগাজি কৰি লওক, এদিন স্থায়ীভাৱে তেওঁলৈ আহক অধিনায়কৰ দায়িত্ব- এয়াই অসমবাসীৰ আশা। বর্ষাপাৰাৰ চি এছ কেৰ বিৰুদ্ধে মেচখনত অসম সন্তানৰ নেতৃত্বত ৰাজস্থান ৰয়েলছে বিজয় লাভ কৰাৰ ক্ষণটোত উদযাপন ষ্টেডিয়ামৰ ভিতৰে-বাহিৰে, ৰাজ্যৰ ঠায়ে ঠায়ে প্রত্যাশিতভাৱেই হৈছে, কিন্তু সেইদিনা গেলাৰীত দেখিবলৈ পোৱা কেতবোৰ দৃশ্যইহে অসমপ্রেমী বহুতৰে মনত বেদনা দিছে। এচাম দর্শকে (তেওঁলোকো অসমীয়াই) চি এছ কেৰ হালধীয়া টি ছার্ট পিন্ধি ধোনিয়ে প্রতিনিধিত্ব কৰা সেই দলটোক উৎসাহিত কৰাটোত অস্বাভাৱিকতা নাই। খেলত কোনোবা কাৰোবাৰ সমৰ্থক হ'ব পাৰে, কাৰোবাৰ বিৰোধী হ'ব পাৰে, কিন্তু বহুতকে ব্যথিত কৰা দৃশ্যটো হ'ল ৰিয়ান পৰাগ আউট হোৱাৰ সময়ত গেলাৰীৰ পৰিৱেশ।

 

অসম সন্তান আউট হোৱাৰ লগে লগে সেই দর্শকসকলে আনন্দত আত্মহাৰা হৈ চিঞৰ-বাখৰ কৰি সমগ্র ষ্টেডিয়ামত উল্লাসৰ বিস্ফোৰণ ঘটাইছিল। তাৰ বিপৰীতে ধোনি আউট হোৱাৰ সময়ত ষ্টেডিয়ামত বিৰাজ কৰিছিল বিষাদৰ মৌনতা। অসম সন্তানৰ প্ৰতি এচাম অসমীয়া দৰ্শকৰ সেই আচৰণক বহুতেই সহজভাৱে ল'ব পৰা নাই। সামাজিক মাধ্যমত ইয়াক লৈ বহুতেই ক্ষোভ উজাৰিছে। কথাটো হয়ো! বিশ্বমঞ্চত জিলিকি উঠা নিজৰ ৰাজ্যৰ ক্ৰীড়া প্রতিভা এটাক উৎসাহ প্ৰদৰ্শন কৰিব নোৱৰাটো কি ধৰণৰ মানসিকতা?

 

হিমা দাসে এছিয়ান গেমছত শ্রেষ্ঠত্ব অর্জনৰ সময়ত জাতীয় পতাকাখন লৈ আনন্দ প্রকাশ কৰাৰ সময়খিনিত, লাভলীনাই অলিম্পিকৰ পডিয়ামত পদক পিন্ধিবৰ সময়ত, জুবিন-পাপনে আন্তঃৰাষ্ট্ৰীয় মঞ্চত শ্রেষ্ঠ শিল্পীৰ বঁটা গ্ৰহণ কৰাৰ সময়ত অথবা জিতেন্দ্র নাথ গোস্বামীয়ে মঙল অভিযানত গুৰু দায়িত্ব লৈ দেশক গর্বিত কৰাৰ সময়ত অজান আনন্দত আমাৰ হৃদয়বোৰ উথলি উঠে কিয়? এয়াই জানো অসমীয়া স্বাভিমান নহয়? বর্ষাপাৰাৰ মেচখনত ৰিয়ানৰ ক্ষেত্রত এই কার্পণ্য এচামে কিয় প্ৰদৰ্শন কৰিলে, নিজৰ আত্মীয় এজনৰ চমৎকাৰিতাত তেওঁলোকৰ হিয়া কিয় উথলি নুঠিল, কিয় ৰিয়ানৰ সমৰ্থনত তেওঁলোকে এটা চিঞৰ মাৰিব নোৱাৰিলে সেইটোহে অবুজ সাঁথৰ হৈ ৰ'ল। কিন্তু যিয়েই নহওক, আৰু সাত-আঠ বছৰ ক্ৰিকেটৰ পথাৰত দপদপাই থাকিব পৰাৰ বয়স আৰু সামর্থ্য ৰিয়ানৰ আছে। সেই শক্তিৰে তেওঁ জিলিকি থাকক। সেই আশাই সকলোৱে কৰা উচিত- তেওঁ আমাৰ ৰিয়ান।

Share This