নীৰৱ ঘাতক

dainik janambhumi March 31, 2025

ডিজিটেল ডেস্ক : কাৰোবাৰ যদি লিভাৰৰ গুৰুতৰ ৰোগ ধৰা পৰিছে¸ তেনেহ'লে কিছু বছৰৰ আগলৈকে অধিকাংশ সাধাৰণ মানুহৰ ধাৰণা আছিল মানুহজনে (ৰোগী) নিশ্চয় অত্যধিক সুৰাপান কৰে, যাপন কৰে এক উচ্ছৃংখল জীৱন। কিন্তু বিগত কিছু বছৰৰ পৰা পৰিস্থিতি, ৰোগৰ ধৰণ সলনি হৈছে। এতিয়া জীৱনত এটোপালো মদ মুখত নিদিয়া মানুহো লিভাৰৰ গুৰুতৰ ৰোগত আক্রান্ত হ'ব পাৰে। সাধাৰণভাৱে ক'লে, নন এলক’হলিক ফেটি লিভাৰ ডিজিজ (NAFLD) এতিয়া এক নীৰৱ মৃত্যুদূত। সম্প্রতি ভাৰতবৰ্ষত দ্রুতগতিত বৃদ্ধি পাবলৈ ধৰিছে এই ৰোগত ভোগা ৰোগীৰ সংখ্যা। আনকি শিশুসকলো সাৰি যাব পৰা নাই। 'এইমছ্'ৰ এক তথ্য মতে, সমগ্ৰ ভাৰতৰ জনসংখ্যাৰ ৩৮ শতাংশ লোক এই ফেটি লিভাৰ বা নন এলক’হলিক ফেটি লিভাৰ ৰোগত আক্রান্ত। ইফালে নেশ্যনেল লাইব্ৰেৰী অব্ মেডিচিনৰ ২০২২ চনৰ এক তথ্য মতে প্রতি তিনিজন শিশু বা প্রাপ্তবয়স্কৰ মাজৰ এজন এই এন এ এফ এল ডিত আক্রান্ত। আনহাতে, এই এন এ এফ এল ডিত আক্রান্তসকলেই টাইপ-২ ডায়েবেটিছ ৰোগত ভোগাৰ সম্ভাৱনাও কঢ়িয়ায় ভয়ানকভাৱে। এই ৰোগৰ ভয়াৱহতা কেৱল ভাৰততে বৃদ্ধি হোৱা নাই, সমগ্র বিশ্ব এতিয়া এই নীৰৱ ঘাতকৰ আক্ৰমণত আক্রান্ত। পৰিসংখ্যা মতে বিশ্বৰ ২৫ৰ পৰা ৩০ শতাংশ লোকে এই ৰোগত ভুগিছে। দৰাচলতে জীৱনশৈলীজনিত যিবোৰ ৰোগ দ্রুতগতিত বৃদ্ধি পাইছে তাৰ ভিতৰত এই ফেটি লিভাৰ অন্যতম।

সহজ ভাষাত ক'লে এই ৰোগ হ'ল লিভাৰত অত্যধিক পৰিমাণে ফেট বা চর্বী জমা হোৱা ৰোগ। একেবাৰে কম পৰিমাণে মদ্যপান কৰা বা কোনো কালে মদ গ্রহণ নকৰা লোকো এই ৰোগত (NAFLD) আক্রান্ত হ'ব পাৰে। প্রধানতঃ মানুহৰ জীৱনশৈলীৰ দ্রুত পৰিৱৰ্তন, খাদ্যাভ্যাস তথা জিনীয় প্রভাৱৰ ফলত মেদবহুলতা, মধুমেহ আৰু ইয়াৰ লগতে নন এলক’হলিক ফেটি লিভাৰ ৰোগে ভাৰতকে ধৰি এছিয়াৰ প্ৰায়বিলাক দেশৰ লগতে সমগ্ৰ বিশ্বতে গুৰুতৰ ৰূপ ধাৰণ কৰিছে। সাধাৰণতে এই ৰোগত ৪০-৫০ বছৰ বয়সৰ লোকসকল অধিক আক্রান্ত হোৱা দেখা যায় যদিও শেহতীয়াকৈ শিশু আৰু কিশোৰৰ মাজতো এই ৰোগ বৃদ্ধি পোৱা দেখা গৈছে। পুৰুষ আৰু মহিলা উভয়ৰে ক্ষেত্ৰত এই ৰোগত আক্ৰান্ত হোৱাৰ সম্ভাৱনাও প্রায় সমান। মেদবহুল লোকৰ ক্ষেত্ৰত নন এলক’হলিক ফেটি লিভাৰ হোৱাৰ হাৰ ৫ গুণ বেছি। ক্ষীণকায় লোকৰ ক্ষেত্ৰত ইয়াৰ হাৰ ৩ শতাংশ, কিন্তু শকত লোকৰ ক্ষেত্ৰত ফেটি লিভাৰৰ হাৰ ১৯ শতাংশ। মেদবহুলতাৰ লগতে যদি ডায়েবেটিছ টাইপ ২ ৰোগ থাকে তেনেহ'লে এই ফেটি লিভাৰত আক্ৰান্তৰ হাৰ ৫০ শতাংশ বৃদ্ধি পায়। এইখিনিতে এটা গুৰুত্বপূৰ্ণ কথা, সাধাৰণতে যদিও এই নন এলক’হলিক ফেটি লিভাৰ ৰোগ স্থূলকায় লোকৰ সৈতে অধিক সম্পর্কিত, শেহতীয়াকৈ কিন্তু স্থূল নোহোৱা লোকৰ ক্ষেত্ৰতো এই ৰোগৰ প্ৰভাৱ ভয়ানকভাৱে পৰা পৰিলক্ষিত হৈছে।

এই ৰোগৰ প্ৰসংগত সঘনাই চর্চাত অহা কথা দুটা হৈছে জীৱনশৈলী আৰু খাদ্যাভ্যাস। আজিৰ প্ৰজন্মৰ মাজত অত্যন্ত জনপ্রিয় চিহ্ন, বিভিন্ন প্ৰকাৰৰ ৰ'ল, পিজ্জা, বাৰ্গাৰ, চিঙৰা, কচুৰী আদি বিভিন্নধৰণৰ জাংক ফুড আৰু ফাষ্ট ফুড এই ৰোগ সৃষ্টি কৰাৰ অন্যতম কাৰক বুলি ইতিমধ্যে চিকিৎসকসকলে জনাইছে। তালিকাত আছে ধূমপান আৰু শীতল পানীয়ৰ নামো। এইবোৰক যদিও ফেটি লিভাৰৰ মূল উৎস বুলি কোৱা হৈছে, কিন্তু দেখা যায় আজিৰ অধিকাংশ মানুহৰ প্রিয় খাদ্যৰ তালিকাত সেইবোৰৰ সহজ উপস্থিতি। গতিকে বুজাত অসুবিধা নহয় ফেটি লিভাৰৰ দৰে ঘাতকক আমি কেনেকৈ আমন্ত্রণ জনাইছোঁ। একেদৰে শাৰীৰিক শ্ৰমহীনতা, অলস, আৰামপ্রিয় জীৱনে আমাক মাতি আনিছে মেদবহুলতাৰ দিশত। চিকিৎসকসকলৰ মতে বডীমাছ ইনডেক্স বা বি এম আই ১৮.৫ৰ পৰা ২৪.৯ৰ ভিতৰত ৰাখিব পাৰিলে ভাল। শৰীৰৰ ওজন শতকৰা ১০ ভাগো কমাব পাৰিলে লিভাৰৰ ফেট কিছু হ'লেও কমে। ইয়াৰ পৰা বুজা যায় এই ৰোগৰ পৰা ৰক্ষা পোৱাৰ ছাবি-কাঠীও আছে আমাৰ নিজৰ হাততে। আমি মাত্র সচেতন হৈ এই ৰোগৰ ভয়াৱহতা তথা ক্রিয়া, পার্শ্বক্রিয়াক অনুভৱ কৰিব লাগে আৰু এই ৰোগৰ পৰা আঁতৰি থাকিবৰ বাবে কৰণীয়খিনিত মন দিব লাগে।

এই ৰোগৰ ব্যাপক প্ৰসাৰ আৰু আক্ৰমণাত্মক ৰূপ দেখি অনুভৱ হয় সহজ আৰু কম ব্যয়সাধ্য ৰোগ নিৰূপণ ব্যৱস্থা এটা আৰম্ভ হোৱাটো দেশৰ জনস্বাস্থ্যৰ বাবে প্রয়োজনীয়। অন্যথা সচেতন নোহোৱাৰ বাবে আৰু ৰোগ পৰীক্ষা ব্যয়ৰ বাবে অনেক ৰোগীয়ে চিকিৎসক আৰু স্বাস্থ্য পৰীক্ষাৰ কাষ নচপাৰ ফলত ৰোগে শৰীৰত ভয়ানকভাৱে থিতাপি লয়। নাগৰিক, চৰকাৰ সকলোৱে মনত ৰখা উচিত হ'ব ফেটি লিভাৰ কেৱল এক ৰোগেই নহয়, ই আন অনেক ৰোগৰ বাটো। সেয়ে সচেতনতাৰে ইয়াৰ পৰা হাত সাৰি থকাটো অতি প্রয়োজনীয়, অন্যথা দেহ ঘূণীয়া হ'ব এই নীৰৱ ঘাতকৰ আক্ৰমণত।

Share This