অপমানজনক

Dainik janambhumi February 08, 2025

ডিজিটেল ডেস্ক: খ্রীষ্টফাৰ কলম্বাছ নামৰ এজন ইটালিয়ান নাবিকে সমুদ্রত বাণিজ্য পথৰ (Trade route) সন্ধানত সমুদ্র যাত্রা কৰি গৈ ইউৰোপৰ বহু দূৰত এক বিশাল ভূখণ্ডত উপস্থিতি হৈছিলগৈ।চতুর্দশ-পঞ্চদশ শতিকাত ইউৰোপৰ আন দেশৰ নাবিকেও তেনেদৰে সমুদ্র পথেৰে পূব-পশ্চিম, উত্তৰ-দক্ষিণ দিশত নতুন নতুন স্থানৰ সন্ধান কৰি ফুৰিছিল। কলম্বাছে ১৪৯২ত উপনীত হোৱা সেই ভূখণ্ডক এজন ইটালীয় চিন্তাবিদ ভৌগোলিক এমেৰিগো ভেচবুচ্চিৰ নামেৰে আমেৰিকা বা এমেৰিকা ৰখা হয়। 

ব্ৰিটিছ আৰু ইউৰোপীয়সকলে এমেৰিকা আৰু এছিয়াৰ মানুহে আমেৰিকা বুলি কোৱা সেই ভূখণ্ড আচলতে এখন মহাদেশ। তাৰো দক্ষিণফালে আছে আন এখন মহাদেশ যাক দক্ষিণ আমেৰিকা বুলি কোৱা হয়। একালত লেটিনভাষী ইউৰোপীয়ৰ আধিপত্য থকা বাবে সেই মহাদেশৰ আন এটা নাম হ'ল লেটিন আমেৰিকা। এই দুই ভূখণ্ডৰ বিষয়ে সেই সময়লৈকে ইউৰোপীয়সকল অৱগত নাছিল।সেইবাবেই ইউৰোপীয়সকলৰ দৃষ্টিত কলম্বাছ সেই স্থানত উপস্থিত হোৱা ঘটনাক এক নতুন ভূখণ্ডৰ অৱিষ্কাৰ বোলা হৈছিল। আচলতে উত্তৰ-দক্ষিণ দুয়ো আমেৰিকাতে আছিল আদিম বাসিন্দা। এই আদিম বাসিন্দাসকল আছিল অশ্বেতকায়, যাক বোলা হৈছিল ৰেড ইণ্ডিয়ান। আন অশ্বেতকায় জনগোষ্ঠীৰো আছিল সেই ভূখণ্ড নিজস্ব বাসভূমি। কিন্তু তথাকথিত শ্বেতকায় 'সভ্য' ইউৰোপীয়সকলে নিজকে শ্রেষ্ঠ জ্ঞান কৰি বিশ্বৰ বিভিন্ন প্রান্তৰ বাসিন্দা আৰু তেওঁলোকৰ বাসভূমি বা দেশ কাঢ়ি লোৱা এটা প্রক্ৰিয়া আৰম্ভ কৰিলে। সেই প্রক্রিয়াকে আমি উপনিৱেশবাদ বোলোঁ। এই উপনিৱেশবাদেই পৰৱৰ্তী কালৰ সাম্রাজ্যবাদৰ পথ মুকলি কৰিছিল। ইউৰোপৰ ব্ৰিটিছ, পর্তুগীজ- স্পেনিছ-ফৰাছী আদি জাতিবোৰৰ আগ্রাসনত বিশ্বৰ বিভিন্ন মহাদেশৰ বহু ৰাজ্য-ৰাষ্ট্ৰই স্বাধীনতা আৰু সার্বভৌমত্ব হেৰুৱাই উপনিৱেশত পৰিণত হ'ব লগা হৈছিল। আমেৰিকালৈও ইউৰোপৰ পৰা এবিধ বণিক শ্ৰেণীৰ লোক, দুর্ধর্ষ জলদস্যু আদিৰ প্ৰব্ৰজন ঘটিল। আমেৰিকাৰ আদিম অধিবাসীসকলক নির্মমভাৱে দমন-নিপীড়ন কৰি, ক্রীতদাসত পৰিণত কৰি তেওঁলোক সেই দেশৰ অধিপতি হৈ পৰিল। আচলতে কোনো শ্বেতকায় লোকেই আমেৰিকাৰ আদিবাসী বা খিলঞ্জীয়া নহয়, বৰঞ্চ প্ৰব্ৰজনকাৰীহে। যোৱা প্রায় পাঁচশ বছৰত ইউৰোপৰ লগতে আন অঞ্চল আফ্রিকা, এছিয়া আদিৰ পৰাও চামে চামে লোক গৈ আমেৰিকাত বসতি স্থাপন কৰিছে। 

আমেৰিকাত ইউৰোপীয় প্ৰব্ৰজনকাৰীৰ ভিতৰত ইংৰাজ অর্থাৎ ব্রিটিছসকলৰ সংখ্যা তুলনামূলকভাৱে অধিক। সেইসূত্রে আমেৰিকাও একালত আছিল ব্রিটিছ উপনিৱেশ। এইসকলৰ অধিকাংশই ক্ৰমাৎ শিল্প-বাণিজ্য আৰু কৃষিৰ জৰিয়তে চহকী শিল্পপতি তথা বণিক শ্ৰেণীত পৰিণত হ'ল। শিক্ষা, শিল্প-উদ্যোগ, বিজ্ঞান প্রযুক্তিৰ উৎকৰ্ষৰ লগে লগে আমেৰিকা প্রভাৱশালী হৈ উঠিল। অৱশেষত পিতৃদেশ ব্রিটেইনৰ বিৰুদ্ধে যুদ্ধ কৰি, উপনিৱেশৰ কবলৰ পৰা মুক্ত হৈ এখন স্বাধীন দেশ হৈ পৰিল। চহকী বণিক শিল্পপতিৰ স্বাৰ্থৰ সুৰক্ষা দিব পৰা ধৰণৰ এটা গণতান্ত্রিক ব্যৱস্থাৰ প্ৰৱৰ্তন কৰি সংযুক্ত ৰাষ্ট্ৰ গঠন কৰিলে। অর্থাৎ আমেৰিকা হ'ল ভূমিপুত্ৰক অপসাৰণ কৰি বহিৰাগত প্ৰব্ৰজনকাৰীয়ে সৃষ্টি কৰা বিশ্বৰ প্ৰথমখন ৰাষ্ট্ৰ।উনৈশ আৰু কুৰি শতিকাত বিশাল ভূমি ভাগ আৰু তুলনামূলকভাৱে কম জনসংখ্যা,শিল্প উদ্যোগত উন্নত আমেৰিকালৈ জীৱন জীৱিকাৰ সন্ধানত বিভিন্ন দেশৰ পৰা বহুজন গ'ল। এইসকল এটা সময়ত তাৰ স্থায়ী বাসিন্দা বা নাগৰিক হৈ পৰিল। শিক্ষা গ্রহণ কৰিবলৈ গৈ, শিক্ষা সমাপ্ত কৰি বহুজন তাতেই নিয়োজিত হ'ল। ব্যৱসায়ৰ স্বাৰ্থতো গ'ল। আমেৰিকাত এনে কেতবোৰ সা-সুবিধা পোৱা গৈছিল যিবোৰ আন দেশত নাছিল।কিন্তু আমেৰিকাৰ ৰক্ষণশীল শ্বেতকায়সকল ক্রমে এই প্রশ্নত কঠোৰ হৈ উঠিল। নৱাগতসকলৰ ক্ৰমবর্ধমান সংখ্যা আৰু প্রভাৱে একালৰ শ্বেতকায় প্ৰব্ৰজনকাৰীসকলৰ বংশধৰসকলক শংকিত কৰি তুলিলে। তেওঁলোকে নিজকে আমেৰিকাৰ প্ৰথম নাগৰিক আৰু অভিভাৱক বুলি ভাবিবলৈ আৰম্ভ কৰে। আদিম বাসিন্দা, বর্তমান সংখ্যালঘু অশ্বেতকায়সকল আৰু বিভিন্ন ৰাষ্ট্ৰৰ পৰা জীৱিকাৰ সন্ধানত যোৱা লোকসকলক শত্রুজ্ঞান কৰি সেইসকলক অবাঞ্ছিত লোক ঘোষণা কৰে। এই শিবিৰৰ এজন শক্তিশালী নেতা ড'নাল্ড ট্রাম্প। তেওঁ নিজে আমেৰিকাৰ এজন আগশাৰীৰ শিল্পপতি। ভাৰতৰ প্ৰধানমন্ত্ৰী নৰেন্দ্ৰ মোদীয়ে তেওঁক বন্ধু বুলি উল্লেখ কৰে। ট্রাম্প ২য় বাৰৰ বাবে ৰাষ্ট্ৰপতি নির্বাচিত হৈয়েই ভাৰতকে ধৰি আন বহুকেইখন দেশৰ পৰা শেহতীয়াকৈ আমেৰিকালৈ জীৱিকাৰ সন্ধানত যোৱা লোকসকলক ধৰি নিজ নিজ দেশলৈ ঘূৰাই পঠোৱাৰ প্ৰক্ৰিয়া আৰম্ভ কৰিছে। প্রায় ওঠৰ হাজাৰ ভাৰতীয় লোকক আমেৰিকাই অবৈধ প্ৰব্ৰজনকাৰী আখ্যা দি ভাৰতলৈ ঘূৰাই পঠোৱাৰ প্ৰক্ৰিয়া ইতিমধ্যে আৰম্ভ কৰিছে। 

এই কথা ঠিক যে আমেৰিকাই বৈধ বুলি ধৰা নথিপত্ৰ নাথাকিলেও এইসকল লোক হত্যাকাৰী, চোৰ-ডকাইত নহয়। কিন্তু এখন সামৰিক বয়বস্তু কঢ়িওৱা বিমানত ভাৰতীয় প্ৰব্ৰজনকাৰীৰ প্রথম দলটো আনি অমৃতসৰ বিমান বন্দৰত নমাই দিয়া হ'ল। হাত-ভৰি বান্ধি গৰু-ছাগলীৰ দৰে অনা এইসকল লোকৰ ন্যূনতম মানৱ অধিকাৰকো সম্মান কৰা নহ'ল। ইফালে আকৌ সেই আমেৰিকাই সমগ্র বিশ্বতে মানৱ অধিকাৰৰ প্ৰবক্তাৰ ভূমিকা লৈ আহিছে। এয়া আৰম্ভণিহে। পর্যায়ক্রমে এনেধৰণে বন্দী কৰি ৰখা আৰু বহু ভাৰতীয় লোকক ভাৰতলৈ পঠোৱা হ'ব। এই ব্যবস্থা ভাৰতবৰ্ষৰ বাবে অত্যন্ত অপমানজনক। অথচ 'বিশ্বগুৰু' আখ্যায়িত মোদীবন্ধু ট্রাম্পে বহিষ্কৃত ভাৰতীয়সকলৰ প্ৰতি সামান্য মহানুভূতিও প্রদান নকৰিলে। ইয়াৰ বিপৰীতে এখন ভাৰততকৈ তুলনামূলকভাৱে সৰু ৰাষ্ট্ৰ কলম্বিয়াই নিজ দেশৰ নাগৰিকক গৰু-ছাগলীৰ দৰে বান্ধি কলম্বিয়ালৈ অনাৰ দুৰ্ঘোৰ বিৰোধিতা কৰি কয় যে কলম্বিয়াৰ মাটিত আমেৰিকাৰ বিমান নমাবলৈ দিয়া নহ'ব। কলম্বিয়াই নিজৰ যাত্রীবাহী বিমান পঠিয়াই নিজ দেশৰ নাগৰিকক ঘূৰাই অনাৰ লগতে আমেৰিকাৰ লগত বাণিজ্যিক সম্বন্ধও ছেদ কৰিছে।

 ইয়াৰ বিপৰীতে ভাৰত চৰকাৰৰ প্ৰতিক্রিয়া অতি সেমেকা। যিসকল ভাৰতীয়ক ধৰি-বান্ধি ওভতাই পঠোৱা হৈছে বা হ'ব, তাৰ এটা বুজন সংখ্যা প্রধানমন্ত্রী মোদীৰ ৰাজ্য গুজৰাটৰে। বৈদেশিক মন্ত্রীয়ে সংসদত প্রকাশ কৰা বিবৃতিও পালমৰা ধৰণৰ। ভাৰত-মার্কিন সম্পৰ্কৰ এনে তিক্ততা ইয়াৰ আগতে কেতিয়াও হোৱা নাছিল। এনেদৰে অপমানিত হৈ ভাৰতীয় আমেৰিকাৰ পৰা নিজদেশলৈ অহাৰ দৃষ্টান্ত তেনেকৈ নাই। আমেৰিকাই যিদৰে কৈছে 'আমেৰিকান ফাৰ্ষ্ট' বুলি ভাৰতে সেইদৰে 'ইণ্ডিয়ান ফাৰ্ষ্ট' ক'ব পৰা নাই। কেন্দ্ৰীয় চৰকাৰে যে বলে নোৱৰা শিলক পৰি নমস্কাৰ কৰিছে, সেই কথা স্পষ্ট হৈ পৰিছে।

Share This