দুর্নীতি বনাম এ পি এছ চি কেলেংকাৰি

Dainik janambhumi February 15, 2025

ডিজিটেল ডেস্ক: অসমত দুর্নীতিৰ বিৰুদ্ধে শূন্য সহনশীলতাৰ শ্ল'গানেৰে বিজেপি ক্ষমতাধিষ্ঠিত হৈছিল। অসমত ২০১৬ চনত বিজেপি ক্ষমতালৈ অহাৰ পাছত দুর্নীতি-বিৰোধী কিছুমান পদক্ষেপেৰে চমক সৃষ্টি কৰিছিল। চৰকাৰৰ সেই স্থিতি একে আছেনে? কার্যালয়ত উৎকোচ লোৱা অৱস্থাত হাতে-লোটে ধৰা পৰি ফটো ওলোৱা কম ওজনৰ বিষয়া-কৰ্মচাৰীৰ জৰিয়তে চৰকাৰৰ দুর্নীতি-বিৰোধী অবস্থানৰ বাৰ্তা জনসাধাৰণলৈ দি থকা হৈছে ঠিকেই, কিন্তু কোনোবা কোনোবা ৰৌ-বৰালি সাৰি গৈছে নেকি সেই সন্দেহ জাগ্রত হয় এইবাবেই যে কিছুমান গুৰুতৰ বিষয়ত দোষীৰ ছবিখন ধূসৰ হৈয়ে ৰৈ যায়। 

অলপতে ডিমা হাছাওৰ কয়লাখনিত জলপ্লাৱন হৈ বহু নিৰীহ শ্রমিকে অকাল মৃত্যুক সাবটিব লগা হ'ল। 'ৰেট হল মাইনিং' নিষিদ্ধ হৈ থকা সত্ত্বেও তাত শাসকীয় দলৰ বিয়াগোম পদাধিকাৰী এজনৰ পৰিয়ালে সেই কয়লাখনি অবৈধভাৱে চলাই থকাৰ অভিযোগ উঠাৰ পাছতো সেই মর্মন্তুক ঘটনাটোৰ বাবে কাকো জগৰীয়া কৰা দেখা নগ'ল। এনেকুৱা ঘটনাবিলাকে সন্দেহৰ বাতাৱৰণ সৃষ্টি কৰে। অফিচ-কাছাৰীত উৎকোচ লোৱা ধৰণৰ দুর্নীতি কিছুমানৰ বিষয়ে জানিলেও বিশাল বিশাল ক্ষেত্র কিছুমানত হোৱা দুৰ্নীতিৰ ভু সাধাৰণ মানুহে পোৱাৰ সুবিধা নাথাকে। সাধাৰণ মানুহৰ অজ্ঞতা বা অসমৰ্থতাৰ বাবে কিছুমান দুর্নীতি বিয়াগোম চক্ৰৰ মাজতে সীমাবদ্ধ হৈ থাকে বুলি সাধাৰণ মানুহে সন্দেহ কৰাৰ থল এনেকুৱা কিছুমান ঘটনায়ে দিয়ে। কংগ্ৰেছ আমোলৰ বহুচৰ্চিত আৰু আলোড়ন সৃষ্টিকাৰী কুখ্যাত এ পি এছ চি কেলেংকাৰিৰ কথাই ধৰা যাওক। ৰাকেশ পালৰ নেতৃত্বত এটা বিশেষ গোটে অসম লোকসেৱা আয়োগক চাকৰি কিনা-বেচাৰ এখন মুকলি বজাৰত পৰিণত কৰিছিল। কংগ্ৰেছ চৰকাৰৰ পতনৰ অন্যতম কাৰণ হৈ পৰিছিল এ পি এছ চি কেলেংকাৰি। এই কেলেংকাৰিৰ তদন্তৰ দাবীত আৰু ইয়াৰ লগত বিভিন্ন প্ৰকাৰে জড়িতসকলক পোহৰলৈ আনি কঠোৰ শাস্তি দিয়াৰ দাবীত বিভিন্ন সংগঠনে আন্দোলন কৰিছিল। 

কংগ্ৰেছ চৰকাৰৰ দিন তেনেকৈয়ে পাৰ হ'ল। ক্ষমতালৈ বিজেপি চৰকাৰ অহাৰ পাছত নতুন মুখ্যমন্ত্ৰী সৰ্বানন্দ সোণোৱালে অভিযোগৰ সূত্ৰ ধৰি তদন্তৰ ব্যৱস্থা কৰিলে। ৰাকেশ পাল আৰু কেলেংকাৰিত জড়িত অসম লোকসেৱা আয়োগৰ আন একাধিক সদস্য গ্ৰেপ্তাৰ হ'ল। আদালততো গোচৰ চলিল। বিষয়টোৰ উচ্চ পৰ্যায়ৰ তদন্তৰ কাৰণে গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাৰ নেতৃত্বত ন্যায়িক আয়োগ গঠন হয়। বিস্তাৰিতভাৱে সমগ্র প্রক্রিয়া আৰু অভিযুক্ত প্ৰাৰ্থীসকলৰ অৰ্হতা পৰীক্ষা-নিৰীক্ষাৰ তথ্যপাতিৰ পৰ্যবেক্ষণ কৰি, অভিযুক্ত প্রার্থীসকলৰ বিৰুদ্ধে স্পষ্ট অভিযোগসহ বিপ্লৱ কুমাৰ শৰ্মা আয়োগে প্রতিবেদন দাখিল কৰে। ইতিমধ্যে তেনে অভিযোগৰ ভিত্তিত একাংশ বিষয়াই চাকৰি হেৰুৱাব লগা হ'ল। এই প্রক্রিয়া চলি থাকোতেই বিজেপি চৰকাৰৰ দ্বিতীয়টো কাৰ্যকালত হঠাৎ শৰ্মা আয়োগৰ প্ৰতিবেদনত তথ্যসহ অভিযোগ থকা বিশেষ ওঠৰজন প্ৰাৰ্থীৰ বিৰুদ্ধে বিশেষ অনুসন্ধান গোট গঠন হ'ল। তদন্ত এটা পর্যায় আগবঢ়াৰ পাছত হঠাতে এই গোচৰৰ বিচাৰৰ দায়িত্বত থকা ন্যায়াধীশ দীপক ঠাকুৰীয়াক বদলি কৰি দিয়া হৈছিল।এনেকৈ বুজিব নোৱৰাকৈ প্রক্রিয়াটো চলি থাকোতেই উচ্চ ন্যায়ালয়ত তৰা গোচৰ মর্মে এটি স্থগিতাদেশ লাভ কৰিলে অভিযুক্ত প্ৰাৰ্থীসকলে।যাৰ ফলত তেওঁলোকে চাকৰি ঘূৰাই পোৱাৰ পথ প্ৰায় মুকলি হৈ পৰিল। ইয়াৰ মূল কাৰণ হ'ল চৰকাৰে বিপ্লৱ শৰ্মা আয়োগৰ প্ৰতিবেদন বিধানসভাত উত্থাপনেই নকৰিলে।তদুপৰি চৰকাৰে কেবিনেটতো আলোচনাৰ বাবে বিশেষ আগ্রহ প্রকাশ নকৰিলে। অৰ্থাৎ চৰকাৰৰ নিষ্ক্রিয়তাৰ সুবিধা লৈ প্ৰাৰ্থীসকলে চাকৰি ঘূৰাই পোৱাৰ ন্যায়িক ব্যৱস্থা প্রশস্ত হৈ পৰিল। 'ফাইট এগেইনষ্ট কৰাপশ্যন ইন এ পি এছ চি' নামৰ সংগঠনটোৱেও এই অভিযোগেই কৰিছে। এয়া ভৱিষ্যতৰ বাবে এটা অশুভ দৃষ্টান্ত হৈ ৰ'ব। এগৰাকী অৱসৰপ্ৰাপ্ত ন্যায়াধীশেৰে গঠিত আয়োগে তথ্যসহ অভিযোগ দাখিল কৰাৰ পাছতো যদি এজন বিষয়াৰ বিৰুদ্ধে যাৱতীয় কাৰ্যব্যৱস্থা গ্রহণ কৰা নহয় তেন্তে এয়া এটি ন্যায়িক আয়োগ আৰু এজন অৱসৰপ্ৰাপ্ত ন্যায়াধীশৰ প্ৰতিও অসন্মান কৰা বুলি গণ্য হ'ব। এই কথাই পৰোক্ষভাৱে হ'লেও এই ইংগিতে দিয়ে যে এ পি এছ চি কেলেংকাৰিৰ গুৰিত কেৱল ৰাকেশ পালেই নহয়, তাতোকৈ শক্তিশালী আন কোনো নেপঠ্যত আছিল। 

এই কেলেংকাৰিৰ অন্যতম প্রধান অভিযুক্ত, তৎকালীন অধ্যক্ষ ৰাকেশ পালৰ ভাতৃ আজিও ৰহস্যজনকভাৱে নিৰুদ্দেশ হৈ আছে। তেওঁ গ্ৰেপ্তাৰ হ'লে হয়তো কেঁচুৰ লগতে কোনোবা সাপো ধৰা পৰিলহেঁতেন। শেহতীয়াকৈ চি এম ভিজিলেন্সে পর্যটন বিভাগত অবৈধ নিযুক্তি সম্পর্কে তালাচী চলাইছে। যি সময়ৰ তথ্য বিচাৰিছে সেই সময়ত বিভাগীয় মন্ত্ৰী আছিল ৰকিবুল হুছেইন। সেইফালৰ পৰা এই তদন্ত আৰু তালাচীৰ এটা ৰাজনৈতিক দিশো থকাটো সম্ভৱ। এই তদন্তৰ বাবে কোনো ন্যায়িক আয়োগ বা বিশেষ অনুসন্ধান গোট গঠন কৰা হোৱা নাই। উত্তৰ কাছাৰৰ ৰেট হল মাইনিঙত হোৱা অঘটনৰো কোনো উচ্চস্তৰীয় তদন্ত হোৱা নাই, যাৰ ফলত প্রকৃত দোষী পোহৰলৈ আনিব পৰা যায়। ইয়াৰ বিপৰীতে প্ৰশাসন আৰু আৰক্ষীয়ে কিছুমান নিতান্তই সাধাৰণ বিষয়ত অধিক তৎপৰতা দেখুৱাব খোজে। কথাবোৰ স্বচ্ছ হোৱাটো জনসাধাৰণে বিচাৰে।

Share This