স্বাগতম্

Dainik janambhumi February 25, 2025

ডিজিটেল ডেস্ক: 'স্বাগত স্বাগত সতীৰ্থ/ তোৰে মোৰে আলোকৰে যাত্রা/অব্যর্থ... অব্যর্থ/আমি পালো জীৱনৰ অৰ্থ অভিনৱ...' ৰূপকোঁৱৰ জ্যোতিপ্ৰসাদ আগৰৱালাই 'তোৰে মোৰে আলোকৰে যাত্রা' গীতটোৰ মাজেৰে আলোকসন্ধানী যাত্ৰাৰ যি যুগমীয়া আহ্বান মানৱ জাতিক দি থৈ গৈছে তাৰে যেন এক ৰূপ প্রতিভাত কৰি আজি আমাৰ ৰাজ্যত অৰ্থনৈতিক প্ৰগতিৰ এটা নতুন ধাৰাৰ সূচনা হ'বলৈ আগবাঢ়িছে। 'এডভাণ্টেজ আছাম-২.০' নামটোৰ সৈতে আমাৰ ৰাজ্যৰ সাধাৰণ মানুহৰ সম্পৰ্ক ইমান শক্তিশালী নহয়, ২০১৮ বর্ষত 'এডভাণ্টেজ আছাম-১.০' অনুষ্ঠিত হৈছিল যদিও তাৰ পৰিসৰ আছিল সীমিত আৰু তাত অংশগ্ৰহণকাৰীৰ সংখ্যাও আছিল তাকৰীয়া। 

কিন্তু এইবাৰ 'এডভাণ্টেজ আছাম-২.০'ৰ আয়োজনৰ ৰূপটোৱেই আভাস দিছে যে ৰাজ্যখনৰ অৰ্থনৈতিক প্রগতিক মাত্ৰা প্ৰদানৰ বাবে এই 'বিনিয়োগ আৰু আন্তঃগাঁথনি সম্মিলনখনে এটা সবল ভিত্তি তৈয়াৰ কৰিবলৈ প্রচেষ্টা চলাইছে। আজি আৰু কাইলৈ গুৱাহাটী মহানগৰীৰ খানাপাৰাৰ পশু চিকিৎসা মহাবিদ্যালয় খেলপথাৰত আয়োজন কৰা সন্মিলনখনৰ কাৰ্যসূচীসমূহেই স্পষ্ট কৰে কোনবিলাক ক্ষেত্ৰক বিশেষ গুৰুত্ব আৰোপ কৰি ড° হিমন্ত বিশ্ব শৰ্মা চৰকাৰে ৰাজ্যখনৰ অৰ্থনৈতিক প্ৰগতিৰ পথেৰে অগ্ৰসৰ হোৱাৰ প্ৰয়াস চলাব খুজিছে। 'বিকশিত অসমৰ পথ', 'ইণ্ডো-ভূটান অর্থনৈতিক সহযোগিতা বৃদ্ধি', 'এক্ট ইষ্ট, এক্ট ফাষ্ট, এক্ট ফাৰ্ষ্ট', 'অসমৰ চাহ-দুশ বছৰীয়া উদ্যোগ', 'মাইক্র', স্মল এণ্ড মিডিয়াম এণ্টাৰপ্ৰাইজেছ আৰু ৱান ডিষ্ট্ৰিক্ট ৱান প্রডাক্ট', 'আয়ুস, চাহ, স্বাদ আৰু সুগন্ধি', 'অসম পর্যটন', 'স্বাস্থ্য হ'ৰাইজন', 'বায়' মেনুফেকচাৰিং এণ্ড বায়''ফাউন্ড্রিজ', 'এডভান্সিং ছেমি কণ্ডাক্টৰ হ'ৰাইজনছ', 'হাইড্র' কাৰ্বনছ', 'ৰ'ড ট্রেন্সপ'ৰ্ট, ৰে'লৱেজ এণ্ড শ্বিপিং', 'এক্সপ'র্ট প্রম'শ্যন', 'অগৰউড প্ৰ'ছেচিং এণ্ড ভেল্যু এডিশ্যন', 'ষ্টার্ট আপ পৰিৱেশ', 'ৰিনিউৱেব'ল এনার্জী, বেম্ব' গ্রীন গ'ল্ড পটেনচিয়েল', 'এৰ'স্পে'চ এণ্ড ডিফেন্স মেনুফেক্চাৰিং', 'স্পে'চ এণ্ড জিঅ'স্পেচিয়েল', 'মাল্টি ডেভেল'পমেন্ট বেংক ফাইনেন্সিং' আৰু 'ৰিয়েলইষ্টেট এণ্ড আৰবান ইনফ্রাষ্ট্ৰাকচাৰ'- এই বিষয়সমূহৰ দুদিনীয়া সন্মিলনত আলোচনা, মত বিনিময় হ'ব আৰু ৮গৰাকী কেন্দ্রীয় মন্ত্রীয়ে এই আলোচনা- সত্রসমূহত ভাগ ল'ব। সৰুসজাইত সোমবাৰে 'ঝুমইৰ বিনন্দিনী' সমাৰোহত বিশ্ব অভিলেখ সৃষ্টিকাৰী ৯ সহস্রাধিক ঝুমইৰ শিল্পীৰ নৃত্যানুষ্ঠান প্রত্যক্ষ কৰাৰ পিছত প্ৰধানমন্ত্ৰী নৰেন্দ্ৰ মোদীয়ে প্রদর্শনী উদ্বোধনেৰে এই সন্মিলনখনৰ সূচনা কৰি ইয়াক মহত্বপূৰ্ণ কৰি তোলাৰ লগে লগে বিনিয়োগৰাকী আৰু উদ্যোগী-উদ্যমীসকললৈও এটা বাৰ্তা দিলে যে অসমৰ অৰ্থনৈতিক প্রগতিমুখী এনেকুৱা প্ৰয়াসক কেন্দ্রীয় চৰকাৰে উৎসাহিত কৰি যাব। 

এই 'এডভান্টেজ আছাম'ৰ দুটা গুৰুত্বপূৰ্ণ আৰু উল্লেখযোগ্য দিশ হৈছে অংশগ্রহণকাৰী উদ্যোগী-ব্যৱসায়ীৰ পঞ্জীয়নৰ সংখ্যা আৰু ৰাজ্যিক কেবিনেটে ৰাজ্যিক আৰু জিলাস্তৰত বিনিয়োগৰ চুক্তি সম্পাদনৰ বাবে অনুমোদন দিয়া ধনৰ পৰিমাণ। এই সন্মিলনত 'ভাইব্রেন্ট গুজৰাট'ৰ সমসংখ্যক লোকে পঞ্জীয়ন কৰিছে আৰু প্রায় ১ লাখ ৫০ হাজাৰ কোটি টকাৰ বিনিয়োগৰ চুক্তি সম্পাদনৰ প্ৰক্ৰিয়া চূড়ান্ত কৰা হৈছে। ইমান বৃহৎ পৰিমাণৰ বিনিয়োগৰ ৰাজ্যখনত পূর্বে নজিব নাই। লক্ষণীয় অন্য এটা দিশ হ'ল ৬১খন ৰাষ্ট্ৰৰ ৰাষ্ট্ৰদূতসহ তিনি শতাধিক বিদেশী প্রতিনিধিয়ে এই সন্মিলন প্রত্যক্ষ কৰিব, য'ত দেশৰ আগশাৰীৰ উদ্যোগপতিসকলৰ সমাবেশ ঘটাৰ সম্ভাৱনা আছে। গতিকে ইয়াক আলোকসন্ধানী যাত্রা বুলি অভিহিত কৰিব পৰাৰ ভিত্তি আছে, যাৰ জৰিয়তে বাজ্যৰ উদ্যোগিক ক্ষেত্ৰখনৰ সুদূৰপ্ৰসাৰী পৰিৱৰ্তন ঘটাৰ সম্ভাৱনা প্ৰচুৰ। এতিয়া ৰাজ্যবাসীৰ মনত এটাই প্রশ্ন- দুদিনীয়া এই 'এডভান্টেজ আছাম'ৰ পৰা অসমবাসীৰ কি লাভ হ'ব? নিবনুৱাসকলৰ কৰ্মসংস্থাপনৰ দিশতেইবা ই কেনেধৰণৰ প্ৰভাৱ পেলাব? আমি চকুৰ আগতে দেখি আছোঁ দুশ বছৰীয়া গৌৰৱময় চাহ উদ্যোগটোৰ ক্ৰমান্বয়ে ঘটি থকা অৱনতিৰ এক ৰূপ, একালত জিলিকি থকা বিভিন্ন উদ্যোগৰ মৃত্যু বা মৃতপ্রায় অৱস্থা, কৃষি ক্ষেত্ৰখন খিলঞ্জীয়াৰ হাতৰ পৰা নোহোৱা হৈ পৰাৰ আগন্তুক ঘটা উদ্বেগজনক পৰিৱেশ। স্বনিৰ্ভৰশীল হ'ব পৰা ক্ষেত্ৰসমূহলৈ আগবাঢ়ি যাবলৈ ভাৰসা নথকা পৰিৱেশ এটা ৰাজ্যখনত গঢ় লৈ উঠিছে। এই হতাশাৰ পৰিৱেশবোৰক সম্ভাৱনালৈ ৰূপান্তৰ ঘটাবলৈ 'এডভান্টেজ আছাম-২.০' সমর্থ্য হ'ব নে নাই তাৰ জৰিয়তেহে প্ৰকৃতাৰ্থত মূল্যায়ন হ'ব ৰাজ্যৰ এই বৃহত্তম বিনিয়োগ আৰু আন্তঃগাঁথনি সম্মিলনখনৰ সফলতা-বিফলতা। জনসাধাৰণৰ লগতে এই সন্মিলনৰ উদ্যোক্তা ৰাজ্য চৰকাৰেও এটা কথা ভালদৰে জানে যে বর্তমান ৰাজ্যৰ অৰ্থনীতি ইয়াৰ খিলঞ্জীয়া মানুহৰ হাতত নাই। যুৱ সমাজৰ সন্মুখত এটাই প্রশ্ন- কি কৰিম, সংস্থাপনৰ পথ কি? ফলত যুৱপ্ৰজন্মৰ হাজাৰ হাজাৰজনে ন্যূনতম দৰমহাৰ চাকৰি এটাৰ বাবে ৰাজ্যৰ বাহিৰলৈ ঢাপলি মেলিছে। এই অনিশ্চয়তা দূৰ কৰিবলৈ 'এডভান্টেজ আছাম ২.০ ই আশাপ্রদ ঔদ্যোগিক ভেটি ৰাজ্যখনত গঢ় দিবলৈ সক্ষম হ'বনে? সক্ষম হ'বনে কৃষিক পুনৰ জাতীয় জীৱনৰ মূল ৰেখাৰ ৰূপত সঞ্জীৱিত কৰিব? সন্মিলনৰ প্ৰতিগৰাকী অংশগ্ৰহণকাৰীলৈ স্বাগতম জনাইছোঁ l

Share This