পাঁচবাৰ স্বৰ্ণ জিনি নয়নমণিৰ অভিলেখ

dainik janambhumi February 09, 2025

ডিজিটেল ডেস্ক: অসমে উত্তৰাখণ্ডত অনুষ্ঠিত ৰাষ্ট্ৰীয় ক্রীড়াত তৃতীয়টো সোণ লাভ কৰাৰ লগতে দুটা ব্ৰঞ্জৰ পদক জয় কৰে। অসমে এতিয়ালৈকে মুঠ ৩৩টা পদক জয় কৰিছে। লন বলৰ মহিলাৰ ডাবলছ শাখাত অসমৰ নয়নমণি শইকীয়া আৰু বনগীতা হাজৰিকাই সোণৰ পদক জয় কৰে। আনহাতে, এথলেটিকছৰ এশ মিটাৰ দৌৰত সোণৰ পদক জয় কৰাত ব্যর্থ হয় অম্লান বৰগোহাঁই। তেওঁ ব্ৰঞ্জৰ পদকহে লাভ কৰে।

আনহাতে, টাইকোৱাণ্ডোত পুমছেৰ মহিলাৰ দলীয় শাখাত মর্ণিতা আচার্যী, বেনলা কাম্প্রাই আৰু পঞ্চমী দাসৰে গঠিত অসম দলে ব্ৰঞ্জৰ পদক অর্জন কৰে। লন বলৰ তিনিটা ইভেন্টৰ ছেমি ফাইনেলত প্ৰৱেশ কৰি অসমে ইতিমধ্যে পদক জয় নিশ্চিত কৰিছিল। অনুষ্ঠিত হোৱা ছেমি ফাইনেলত পুৰুষ এককত পুতুল সোণোৱাল তথা মেন ফ'ৰ্চত বিতোপন ৰাভা, অমল টেৰণ, বিমান নাথ আৰু বিশ্বনাথ খাওন্দ পৰাস্ত হৈ ব্ৰঞ্জতে সন্তুষ্ট থাকে। কিন্তু প্রত্যাশিতভাৱে ফাইনেলত প্রৱেশ কৰে দুই অভিজ্ঞ খেলুৱৈ নয়নমণি 'আৰু বনগীতা। মধ্যাহ্ন ভোজনৰ পাছত অনুষ্ঠিত ফাইনেলত নয়নমণি আৰু বনগীতাই ওড়িশাক ১৯-১০ৰ ব্যৱধানত পৰাস্ত কৰি লন বলত প্রথম তথা অসমক তৃতীয়টো সোণ দিয়ে। এইবাৰৰ ৰাষ্ট্ৰীয় ক্রীড়াত এটা সোণ, তিনিটা ৰূপ আৰু পাঁচটা ব্ৰঞ্জ জয়ৰে অসম লন বল দলে অভিযান সামৰে। 

উল্লেখযোগ্য যে একেৰাহে পাঁচখন ৰাষ্ট্ৰীয় ক্রীড়াৰ, লন বলত সোণ লাভ কৰি অনন্য অভিলেখ গঢ়ে নয়নমণিয়ে। ২০১১-ৰ ঝাৰখণ্ড ৰাষ্ট্ৰীয় ক্রীড়াৰ পৰাই নয়নমণিৰ সোণৰ পদক জয়ৰ যাত্ৰা আৰম্ভ হৈছিল। ইয়াৰ পাছত ২০১৫-ৰ কেৰালা, ২০২২-ৰ গুজৰাট তথা ২০২৩-ৰ গোৱা ৰাষ্ট্ৰীয় ক্রীড়াতো সোণ জয় কৰিছিল নয়নমণিয়ে। অসম সন্তান অম্লানে এশ মিটাৰত ১০.৪৩ ছেকেণ্ড লৈ ব্রঞ্জ অর্জন কৰে। কিন্তু অম্লান আৰু অসমৰ বাবে দুর্ভাগ্যজনক কথাটো হ'ল উত্তৰাখণ্ডত তেওঁ দুশ মিটাৰ দৌৰত অংশ ল'ব নোৱাৰিব। ৱাইল্ড কাৰ্ডৰ জৰিয়তে খেলা অম্লানৰ নাম ৰাজ্যিক এথলেটিকছ সন্থাই কেৱল এশ মিটাৰৰ বাবেহে প্ৰেৰণ কৰিছিল। দুশ মিটাৰত অন্তর্ভুক্ত নকৰিলে। এই বিষয় লৈ অম্লানো হতাশ।

Share This