গুৱাহাটীত ২৯ অক্টোবৰত বিশ্ব কাপৰ ছেমি ফাইনেল, ইংলেণ্ড বনাম দক্ষিণ আফ্ৰিকাৰ হ'ব যুঁজ

dainik janambhumi October 28, 2025

ডিজিটেল ডেস্ক :  আই চি চি মহিলা বিশ্ব কাপ ক্রিকেটৰ প্ৰথমখন ছেমি ফাইনেলত মুখামুখি হ'ব ইংলেণ্ড আৰু দক্ষিণ আফ্রিকা। মহানগৰীৰ বর্ষাপাৰা ক্রিকেট ষ্টেডিয়ামত অহা ২৯ অক্টোবৰত বিয়লি ৩ বজাত আৰম্ভ হ'ব লগা মেচখনৰ প্রস্তুতি সম্পূৰ্ণ কৰিবলৈ বি চি চি আই আৰু অসম ক্রিকেট সন্থাই দিনে-ৰতিয়ে কাম চলাই আছে। 

কালি এক সংবাদমেলত এই কথা সদৰী কৰে বি চি চি আইৰ সচিব দেৱজিৎ শইকীয়াই। দক্ষিণ আফ্রিকা দলটো ইতিমধ্যে গুৱাহাটীত উপস্থিত হৈছেহি। ইংলেণ্ড দলটো আজি আহিব। প্রৱেশ- পত্ৰৰ মূল্য ১০০ টকা। মুম্বাইৰ বৰষুণ বতৰৰ বিপৰীতে গুৱাহাটীৰ বতৰ ফৰকাল হোৱাৰ বাবে দৰ্শকৰ সংখ্যা অধিক হোৱাৰ আশা ৰাখিছে আয়োজক সংস্থাই। 

২৯ অক্টোবৰত বিয়লি ৩ বজাত আৰম্ভ হ'বলগীয়া খেলখনৰ বাবে নিৰাপত্তা আৰু পথৰ নিৰ্দেশনা পূৰ্বৰ ৪খন মেচৰ দৰে বাহাল থাকিব। মন কৰিবলগীয়া যে ইংলেণ্ড দলে ইতিমধ্যে ৭খন মেচ খেলি ১১ আৰু দক্ষিণ আফ্রিকাই ১০ পইন্ট অর্জন কৰিছে। সংবাদমেলত অসম ক্রিকেট সন্থাৰ বিষয়ববীয়া তথা প্রাক্তন সভাপতি ৰমেন দত্ত, সনাতন দাস উপস্থিত থাকে।

Share This